Haładoŭku pa-raniejšamu trymajuć 25 čałaviek

Aktyvisty moładzievych ruchaŭ praciahvajuć haładoŭku pratestu. Častka haładoŭnikaŭ spyniła akcyju – u asnoŭnym heta niepaŭnaletnija siabry niezarehistravanaj arhanizacyi «Małady front». Ale da akcyi dałučylisia niekalki novych udzielnikaŭ u rehijonach. Moładź patrabuje spynić kryminalnyja spravy suprać aktyvistaŭ «Maładoha frontu», vyzvalić palitviaźniaŭ, adnavić na vučobie apazycyjaneraŭ, a taksama spynić pieraśled viernikaŭ-chryścijanaŭ.

U Miensku i ŭ rehijonach niapoŭnahadovyja ŭdzielniki akcyi spynili haładoŭku. U Žodzinie čatyry čałavieki vyjšli z akcyi pratestu. Jany patłumačyli, što ličać biessensoŭnym udzielničać u akcyi, jakaja nie była dobra padrychtavanaja infarmacyjna i tamu nie nabyła vialikaha rozhałasu ŭ hramadztvie. U Žodzinie šostyja sutki trymaje haładoŭku 18-hadovy Siaržuk Hudzilin. 11 červienia jamu spoŭnicca 19 hadoŭ. Siaržuk zajaviŭ, što budzie praciahvać haładoŭku, i navat u svoj dzień narodzinaŭ nia kinie haładać.

(Hudzilin: ) «Aleś Čyryjka spyniŭ haładoŭku, bo jon pracuje. Čatyry dni, što jon haładaŭ, byŭ na pracy. Jon fizyčna nia zdoleŭ praciahvać haładoŭku, bo ŭ jaho vielmi adkaznaja praca. Ja adzin praciahvaju haładoŭku ŭ Žodzinie na znak salidarnaści z tymi, chto jaje pačynaŭ u Salihorsku. Ja viedaju, što Dzianis Karnoŭ tam praciahvaje haładoŭku. Siońnia ŭžo šostyja sutki, jak ja haładaju. Ale pakul ruchajusia pa horadzie, bo treba vykonvać svaje funkcyjanalnyja abaviazki. Sprabuju prachodzić kamisiju ŭ vajenkamat, bo mianie, chutčej za ŭsio, zabiaruć u vojska».

Aktyvist niezarehistravanaj arhanizacyi «Małady front» Źmicier Chviedaruk haładaje 10-ja sutki ŭ Miensku. Razam ź im u akcyi pratestu ŭdzielničajuć 12 maładafrontaŭcaŭ.

(Chviedaruk: ) «Stan zdaroŭja bolš-mienš narmalovy. Jość tolki ciažkaści z rucham, bo niejak ciažka stała chadzić. Haładoŭku ja spyniać nie źbirajusia, bo, na vialiki žal, ułada nie źbirajecca pakul vykonvać patrabavańniaŭ haładoŭnikaŭ: nie spyniła kryminalnyja spravy, začynienyja cerkvy, nie vyzvalili palitviaźniaŭ. Budu haładać da apošniaha. U Miensku razam sa mnoj trymajuć haładoŭku bolš za dziasiatak maich paplečnikaŭ. My spadziajemsia, što ciaham tydnia da akcyi dałučacca bolš za 50 čałaviek».

Da haładoŭki dałučylisia niekalki čałaviek ŭ Babrujsku, Mahilovie, Niaśvižy, Horadni, Lidzie, Mastach, Baranavičach, Miensku. Ad 30 traŭnia čatyry čałavieki trymajuć haładoŭku na znak salidarnaści z aktyvistami biełaruskaj apazycyi va ŭkrainskim Łucku. Padtrymku ŭdzielnikam akcyi vykazaŭ Alaksandar Milinkievič, a taksama siabry ŭkrainskich moładzievych arhanizacyjaŭ – «Nacyjanalny aljans» i «Studenckaje bractva».

Aficyjnyja ŭłady pakul nie dali adkazu maładafrontaŭcam na ichnyja patrabavańni. Zhodna z zakanadaŭstvam, prakuratura musić dać adkaz ciaham miesiaca albo dałučyć zvarot da materyjałaŭ kryminalnaj spravy.

Radyjo Svaboda

• 0
• 0
• 0
• 0
• 0
• 0
• 0
• 0