Redaktar niezaležnaj haziety «Volnaje Hłybokaje» ad vieraśnia čakaje adkazu hłybockaj pošty.
Redaktar i vydaviec niezaležnaha tydniovika «Volnaje Hłybokaje» Ŭładzimir Skrabatun jašče pry kancy vieraśnia napisaŭ zajavu na imia načalnika hłybockaha vuzła suviazi z prośbaj razhledzieć mahčymaść viartańnia vydańnia ŭ dziaržaŭnuju sistemu raspaŭsiudu.
«Adkazu dahetul niama» — kaža vydaviec. U telefonnaj hutarcy načalnik hłybockaj pošty paviedamiŭ, što asabista nie suprać afarmleńnia padpiski na «VH» praz «Biełpoštu», bo raniej damova z redakcyjaj prynosiła miascovamu filijału pošty niebłahi prybytak. Ale, pa słovach U. Skrabatuna, načalnik hłybockaj «Biełpošty» admaŭlajecca vyrašać hetaje pytańnie, spasyłajučysia na toje, što nie maje na heta paŭnamoctvaŭ. «Źviartacca ŭ abłasnoje adździaleńnie nie baču sensu, bo mnie tam naŭprost zajavili, što nie pacierpiać u siabie apazicyjnaj haziety», — kaža vydaviec. Što ŭ Minsku dazvolena, toje nie dazvolena ŭ Hłybokim, dadaje jon.
Hazieta «Volnaje Hłybokaje» — bieź pierabolšvańnia siamiejnaje pradpryjemstva. Nad vydańniem i raspaŭsiudam pracuje sam redaktar, a taksama jahonyja rodnyja — žonka i dočki. «Pradajom udvaich z žonkaj na haradskim rynku hazietu. Taksama dźvie kramy nas biaruć. A taksama praz redakcyjnuju padpisku raspaŭsiudžvajem, u kanviertach». Pavodle prezidenckaha ŭkazu U. Skrabatun nie moža najmać na pracu starońnich ludziej. Z heta pryčyny pad pytańniem zastajecca raźvićcio rehijanalnaj karespandenckaj sietki.
Na siońnia nakład adzinaj niezaležnaj na Hłyboččynie haziety składaje kala 2000 as. Dalejšy los vydańnia zastajecca pad pytańniem. Z materyjałami haziety, a taksama štodzionnymi navinami rehijonu možna aznajomicca na sajcie Westki.info.
Nahadajem, što ad pačatku 2006 hodu hazieta «Volnaje Hłybokaje» razam z šeraham niedziaržaŭnych vydańniaŭ była vyklučanaja ź sistemy dziaržaŭnaha raspaŭsiudu praz «Biełpoštu» i «Biełsajuzdruk».
Kamientary