Pokier z Łukašenkam

Nasupierak šmatlikim zapeŭnivańniam biełaruskich uład u svaim žadańni pravieści ŭvosień 2008 hoda demakratyčnyja vybary, jak sam chod kampanii, tak i padlik hałasoŭ nie adpaviadali mižnarodnym standartam demakratyi. Heta znajšło paćviardžeńnie ŭ papiaredniaj i kančatkovaj spravazdačach naziralnaj misii ABSIE. Tym nie mienš, Brusiel nie vystupiŭ z kateharyčnaj zajavaj pra zryŭ tolki što adnoŭlenaha dyjałohu, źviarnuŭšy zamiest hetaha ŭvahu na mienš represiŭny charaktar vybaraŭ, a taksama na bolšuju adkrytaść uład u dačynieńni da mižnarodnych naziralnikaŭ. Bolš taho, 3 kastryčnika biełaruski ministr zamiežnych spraŭ Siarhiej Martynaŭ atrymaŭ aficyjnaje zaprašeńnie na zapłanavany na 13 kastryčnika ŭ Luksiemburhu samit ministraŭ zamiežnych spraŭ. Padčas sustrečy na vyšejšym uzroŭni ŭdałosia dasiahnuć zhody i pryniać rašeńnie ab prypynieńni na šeść miesiacaŭ vizavych sankcyj u dačynieńni da tryccaci šaści z saraka adnaho biełaruskaha čynoŭnika, u tym liku i da samoha Alaksandra Łukašenki. Aficyjna hety krok byŭ patłumačany adsutnaściu ŭ dadzieny čas u Biełarusi palityčnych źniavolenych. Adnačasova biełaruskamu boku byŭ vystaŭleny šerah umoŭ, vykanańnie jakich mahło b padoŭžyć režym prypynieńnia sankcyj ci navat pryvieści da ich poŭnaha skasavańnia ŭ krasaviku 2009 hoda, h. zn. paśla taho jak minie pieršy vyprabavalny termin. Heta byŭ vyrazny sihnał ab hatoŭnaści adyści ad palityki izalacyi i adnačasova zaklik da reformaŭ. Adnak pryniaćcie takoha važnaha i dalokasiažnaha rašeńnia nieŭzabavie paśla niedemakratyčnych vybaraŭ stvarała ŭražańnie pryniaćcia biełaruskaha status‑kvo dziela vyšejšych met. Z hetaj pryčyny častka biełaruskaj apazicyi (hałoŭnym čynam u kułuarnych razmovach) vystupiła z krytykaj paciapleńnia ŭzajemaadnosin pamiž Minskam i Brusielem. Siarod najbolš častych abvinavačańniaŭ vyłučalisia tezisy pra zdradu palitycy adstojvańnia demakratyčnych kaštoŭnaściaŭ na karyść zdabyćcia ekanamičnaj i hieapalityčnaj vyhady, pra padzieł biełaruskaj ekanomiki pamiž paasobnymi dziaržavami, zacikaŭlenymi ŭ inviestycyjach, pra cyničny «handal» palityčnymi viaźniami, narešcie, pra viadzieńnie pierahavoraŭ ź biełaruskim uradam pry poŭnym adchileńni ad hetaha pracesu pradstaŭnikoŭ apazicyi. Hučała taksama mierkavańnie, što ŭ suviazi z rasijskim presinham i finansavym kryzisam varta było b jašče bolš izalavać režym Alaksandra Łukašenki i takim čynam zmusić jaho da demakratyzacyi. Pakidajučy ŭbaku istotny emacyjny składnik takich abvinavačańniaŭ, varta adznačyć, što realizacyja padobnych kancepcyj mahła b pryvieści da destabilizacyi ŭnutranaj situacyi na Biełarusi, a pry ciapierašnim stanie apazicyjnych hrupovak heta zusim nie abaviazkova paciahnuła b za saboj pieramohu demakratyi nad aŭtarytaryzmam.

• 0
• 0
• 0
• 0
• 0
• 0
• 0
• 0