Ukrainski Bravarski mižrajonny sud pryniaŭ rašeńnie vyzvalić narodnaha deputata Nadzieju Saŭčanka i kiraŭnika arhanizacyi «Aficerski korpus» (zajmajecca vyzvaleńniem pałonnych) Uładzimira Rubana z-pad varty.
U aboich — Saŭčanka i Rubana — apoŭnačy 16 krasavika pavinna była minać miera strymańnia. Prakurory chadajničali ab jaje padaŭžeńni, adnak sud z hetym nie pahadziŭsia i pastanaviŭ vyzvalić padazravanych z-pad varty. Saŭčanka i Ruban vypuścili prosta ŭ zale suda.
«Ja vychodžu z hetaj zały jak volny čałaviek. Ja viarnuła sabie volu i budu zmahacca za Ukrainu», — zajaviła zatym narodny deputat. Taksama Saŭčanka paabiacała dakazać u sudzie svaju nievinavataść.
Paśla vyzvaleńnia jana taksama dała kamientar žurnalistam.
«Ja vam skažu adno, — adznačyła Saŭčanka, — heta była vielmi dziŭnaja situacyja — paśla dvuch hadoŭ turmy ŭ Rasii atrymać hod turmy va Ukrainie».
«Dziŭna» zakanadaŭcu, pa jaje słovach, taksama było adčuć, jak ukraincy «chutka začaroŭvacca i jak chutka rasčaroŭvajucca». «Jak možna być hierojem Ukrainy, a na nastupny dzień voraham naroda, tolki tamu, što ŭłada tak skazała», — zaŭvažyła Saŭčanka, dadaŭšy, što «jak palityk jana vielmi dobra zrazumieła, što takoje prapahanda».
Narodny deputat była zatrymanaja 22 sakavika minułaha hoda. Za niekalki hadzin da hetaha ŭkrainskija zakanadaŭcy ŭ Viarchoŭnaj Radzie prahałasavali za źniaćcie ź jaje niedatykalnaści. Kijeŭskija ŭłady padazravali Saŭčanka ŭ tym, što razam z Rubanam jana nibyta źbirałasia padarvać Viarchoŭnuju Radu i zładzić zamach na kiraŭnikoŭ dziaržavy, u tym liku Piatra Parašenku.
Hienprakuror Ukrainy Jury Łucenka ŭ minułym hodzie śćviardžaŭ, što va ŭładaŭ jość dokazy padobnych płanaŭ Saŭčanka. Razam z Rubanam, pa jaho słovach, jana rychtavała «terarystyčny pieravarot» u Kijevie. Zmoŭščyki, pakazvaŭ kiraŭnik viedamstva, źbiralisia abstralać centr ŭkrainskaj stalicy ź minamiotaŭ kalibra 120-mm, što pavinna było pryvieści da šmatlikich achviar siarod mirnaha nasielnictva.
Ciapier čytajuć
Novyja detali źniknieńnia Anatola Kotava. Jachta ź im źmianiła kurs na Abchaziju, dzie jaho vyvieli supracoŭniki FSB. Ale vykradańnie ci insceniroŭka?2828
Kamientary