U Minsku startuje novaja intelektualnaja hulnia «ViečaR». Raskazvajem, u čym sens
U hulni jość adzin raŭnd u farmacie papularnaj «Mazhabojni», ale jašče try tury absalutna inšyja. Pieršy «ViečaR» adbudziecca ŭžo ŭ hety aŭtorak, 23 krasavika, a 19-j hadzinie ŭ restaracyi «Publika» (Minsk, praśpiekt Pieramožcaŭ, 21). Hetym razam udzieł biaspłatny, zarehistravacca možna tut.
A ciapier — pra farmat i praviły.
Kožnaja hulnia pryśviačajecca asobnaj temie, ź jakoj my sutykajemsia ci nie kožny dzień. Zadańni kožnaha z čatyroch raŭndaŭ vybudoŭvajucca vakoł jaje. Jak praviła, heta dyskusijnaje hramadskaje pytańnie.
Pieršy tur — «Detektyŭ». Piać zahadak-rebusaŭ, na jakija kamandzie treba adšukać adkazy. Cikava, što pry hetym dajucca padkazki, ale praŭdzivaja ź ich tolki adna. Udzielnikam treba zrazumieć, jakaja mienavita. Na pošuk adkazaŭ dajecca 100 siekundaŭ.
Paśla taho, jak kamandy zdajuć svaje kartki, na ekranie pakazvajucca pravilnyja adkazy.
Druhi tur — «Bijatłon». Usim kamandam dajecca zadańnie nakštałt: nazavicie arhumienty na karyść padvyšeńnia koštu prajezdu ŭ hramadskim transparcie. Udzielniki musiać za dźvie chviliny ich sfarmulavać, paśla čaho pa adnym pradstaŭniku ad kamandy vychodziać da sceny. Jany pa čarzie začytvajuć pa adnym arhumiencie sa svajho śpisu. Vyjhraje toj, u kaho ich naźbirajecca najbolš.
Pry hetym źniešni ekśpiert sočyć za tym, kab arhumienty nie paŭtaralisia i kab udzielniki nie nazyvali nierealistyčnyja rečy.
Dadamo, što kamanda maje prava zamianić svajho śpikiera i adzin raz dać jamu padkazku.
Treci tur — «Mazhabojnia». Tut usio prosta: siem pytańniaŭ, na jakija treba apieratyŭna dać adkazy, plus jašče 100 siekundaŭ na padumać.
Čaćviorty tur — dyskusija. Tema jaje suhučnaja z temaj usioj hulni (dapuścim, haradskaja prablema). U kožnaj kamandy — svaja rola i adpaviedny joj pohlad na prablemu i rašeńnie. Zadańnie — sfarmulavać hety pohlad i ahučyć rašeńnie prablemy. Naprykład, jak zrabić u Minsku hramadski transpart biaspłatnym? Svaje prapanovy ahučvajuć čynoŭnik, biznesoviec, hramadski aktyvist — jakaja kamanda jakuju rolu vyciahnie. Na abaronu pazicyi śpikieram dajecca 90 siekundaŭ.
Paśla randamajzier vypadkovym čynam raźmiarkoŭvaje, jakaja kamanda jakomu śpikieru zadaje dadatkovyja pytańni.
Kali ŭ pieršych troch turach možna zarabić maksimalna pa 20 bałaŭ za kožny, to ŭ čaćviortym, dyskusijnym, adrazu 40 bałaŭ. Kožny ŭdzielnik paśla apošniaha raŭnda piša na kartcy, jakaja kamanda, na jaho dumku, była najbolš pierakanaŭčaj (viadoma, aproč svajoj). Paśla ŭsie hałasy padličvajucca i kamandam dajucca adpaviednyja bały. 100 bałaŭ — maksimalna mahčymaja ahulnaja kolkaść.
Dla hulni aptymalna, kali ŭ kamandzie ad čatyroch da vaśmi ŭdzielnikaŭ.
Čamu «ViečaR»?
Dyskusijnaja hulnia natchniajecca spradviečnymi tradycyjami pradziedaŭ, a dakładniej — Połackaj tradycyjaj supolnaha abmierkavańnia hramadskaha žyćcia na admysłovym Viečy.
Vieča — heta narodny schod u Siaredniavieččy, adna z rańnich formaŭ demakratyi. Sklikałasia Vieča dla abmierkavańnia i pryniaćcia rašeńniaŭ pa tych pytańniach, jakija tyčylisia ŭsioj supolnaści — u palityčnaj, hramadskaj, ekanamičnaj, a taksama kanfiesijnaj i kulturnaj śfierach.
Vieča — forma pramoj demakratyi, dzie asnoŭnyja rašeńni inicyjujucca, prymajucca i vykonvajucca samimi čalcami supolnaści, a paźniej — hramadzianami. Pramaja demakratyja — heta toje, što abjadnoŭvaje hramadstva Uschodniaj Jeŭropy CHII—XV stst. (Połack, Vialiki Noŭharad, Pskoŭ) z antyčnym śvietam (Afinskaja demakratyja VI—IV stst.), z poźniesiaredniaviečnaj i reniesansnaj Italijaj (Fłarentyjskaja respublika).
U biełaruska-litoŭskich chronikach XVII st. skłałasia tradycyja paraŭnoŭvać dziaržaŭna-palityčny ład staražytnaha Połacka ź vieniecyjanskim. Adpaviedny raździeł «Chroniki Litoŭskaj i Žamojckaj» mieŭ nazvu «Ab połackaj svabodnaści abo Vieniecyi».
Novaja intelektualnaja hulnia «ViečaR» — heta adnaŭleńnie tradycyi hramadskich abmierkavańniaŭ dyskusijnych pytańniaŭ. Tolki ŭžo ŭ novaj sučasnaj hulniavoj formie. Heta spabornictva razumnych i talenavitych, jakoje daje mahčymaść atrymać hramadskaje pryznańnie, dy prosta asałodu.
Pieršaja hulnia adbudziecca ŭžo ŭ hety aŭtorak, 23 krasavika, a 19-j hadzinie ŭ restaracyi «Publika» (Minsk, praśpiekt Pieramožcaŭ, 21).
Kali ŭ vas jość kamanda (ci kali jašče niama), to rehistrujciesia pa spasyłcy: https://bit.ly/2GzvgT3
Kamientary