Pareštki abaroncaŭ Bieraścia znajšli pad płotam vajskovaj častki

Jak zdaryłasia, što čarapy i kości ŭ čornych cyratovych miachoch znajšli na Lepielščynie vypadkovyja ludzi, ciapier vyśviatlaje Viciebskaja vajskovaja prakuratura.

Pačałosia ŭsio z taho, što ŭ vajskovaj častcy, jakaja mieścicca ŭ pasiołku Zasłonava Lepielskaha rajonu, vyrašyli pastavić novy płot. Stavili novy płot uzdoŭž staroha, jaki potym źnieśli, vyzvaliŭšy takim čynam niekalki kvadratnych metraŭ «ničyjnaj» terytoryi. Miascovyja žychary vyrašyli vykarystać ich na svaje patreby - zrabić hrady. Pierakopvajučy ziamlu, niechta ź viaskoŭcaŭ i natrapiŭ na dva vialikija miachi z čornaj cyraty. Na bircy, prymacavanaj da adnaho ź miachoŭ, było napisana, što ŭ ich - pareštki sałdataŭ savieckaha vojska, znojdzienyja ŭ časie raskopak na vulicy Šasejnaj u Bieraści.

Vyklikanyja milicyjanty apisali toje, što było ŭ miachoch - try čałaviečyja čarapy i frahmenty kaściej. Paśla hetaha pareštki časova vyrašyli zachoŭvać u Lepielskaj rajonnaj prakuratury, jakaja raspačała śledztva. Ciapier, jak raskazaŭ namieśnik prakurora Ihar Biełavusaŭ, usie materyjały hetaje spravy pieradadzienyja ŭ Viciebskuju vajskovuju prakuraturu.

(Biełavusaŭ: ) «Pravodziłasia pravierka. Było ŭstanoŭlena, što terytoryja, dzie byli znojdzienyja hetyja pareštki, naležyć vajskovaj častcy. Tamu my nakiravali materyjały dla pravierki ŭ Viciebskuju mižharnizonnuju vajskovuju prakuraturu. Jany kančatkovaje rašeńnie buduć prymać».

Pravierka Lepielskaj prakuratury, pavodle namieśnika prakurora Ihara Biełavusava, ustanaviła chiba tolki toje, što ź lipienia pa kastryčnik 2003-ha hodu sałdaty 52-ha pošukavaha bataljonu, što mieścicca ŭ vajskovaj častcy ŭ Zasłonavie, sapraŭdy brali ŭdzieł u raskopkach u Bieraści. Heta admysłovy bataljon, jaki specyjalizujecca na ekshumacyi pachavańniaŭ, i amal try hady tamu ź jaho dapamohaj adbyłosia pierapachavańnie pareštkaŭ kala 500 udzielnikaŭ minułaje vajny - abaroncaŭ Bieraścia.

Usie znojdzienyja pareštki byli spakavanyja spačatku ŭ čornyja cyratovyja miachi, jakija potym kłali ŭ draŭlanyja truny. Pierapachavańnie było ŭračystym - z muzykaj i hanarovym salutam. Čamu na dva miachi zabylisia i čamu jany trapili razam z vajskoŭcami na miesca dyślakacyi ichnaj častki, u Lepielski rajon, pakul što nieviadoma.

I tolki kali heta vyśvietlicca, nieviadomyja abaroncy Bieraścia ŭrešcie znojduć viečny spačyn: prakuratura pastanaviła pa zaviaršeńni śledztva pachavać pareštki savieckich sałdataŭ u brackaj mahile dzie-niebudź na terytoryi Lepielščyny.

Radyjo Svaboda

• 0
• 0
• 0
• 0
• 0
• 0
• 0
• 0