Palčys, Andrejeva, Łojka i inšyja imiony — paśla vizitu amierykanskich dypłamataŭ u Minsk vyzvalili 250 palitviaźniaŭ
Siońnia ŭ Minsku z Alaksandram Łukašenkam sustrakałasia amierykanskaja delehacyja na čale sa śpiecpasłańnikam ZŠA Džonam Koŭłam. Paśla hetaj sustrečy stała viadoma pra vyzvaleńnie čarhovaj partyi palitviaźniaŭ.
Vyzvalenyja 250 palitviaźniaŭ. 15 ź ich departavanyja z krainy ŭ Litvu, 235 zastanucca ŭ Biełarusi.
U śpisach vyzvalenych — žurnalistka Kaciaryna Andrejeva, błohier Eduard Palčys, pravaabaronca Nasta Łojka.
Vyzvaleny taksama Mikita Załataroŭ. Chłopca pasadzili jašče niepaŭnaletnim. Jamu prysudzili 5 hadoŭ vychavaŭčaj kałonii za ŭdzieł u pratestach. Paśla chłopcu dadali paŭtara hoda za šturchaninu z kanvairam.
A ŭrešcie pasadzili i baćku Mikity, Michaiła Łapunova. Jon taksama palitviazień.
Jašče adzin čałaviek u śpisach — Siarhiej Maŭšuk. Jamu prysudzili 6,5 hoda za ŭdzieł u pratestach u Pinsku. Jaho žonku Alenu Maŭšuk pamiłavali i departavali ŭ lutym 2025 hoda.
Vyzvaleny i Kirył Kaziej. U 2020 hodzie jon ź siabrami pajechaŭ, kab parazmaŭlać z chulihanam, jaki nakinuŭsia na čałavieka sa ściaham. U vyniku byŭ aryštavany i atrymaŭ 7 hadoŭ źniavoleńnia.
Na svabodzie Mikałaj Kulašoŭ — były mytnik, jaki dapamahaŭ pierachodzić miažu ludziam, jakim pahražaŭ aryšt. Jamu prysudzili piać hadoŭ kałonii, kali nakryli čarhovuju takuju hrupu.
U śpisie vyzvalenych Dzianis Žalazko. Uradženca Pietrykava asudzili pa dzieviaci palityčnych kryminalnych artykułach. Jon atrymaŭ piać hadoŭ źniavoleńnia, ź jakich adsiadzieŭ kala dvuch hadoŭ.
Vyzvaleny anarchist Pavieł Špietny. Jamu prysudzili šeść hadoŭ źniavoleńnia pa spravie «Revalucyjnaha dziejańnia», a paśla nakinuli jašče dva hady.
Na svabodzie Kim Samusienka. Jon atrymaŭ 6,5 hoda źniavoleńnia. Jaho brat Alaksiej taksama byŭ palitviaźniem, ale ŭžo vyzvaliŭsia.
Vyzvaleny Alaksandr Kaźlanka — aktyvist «Revalucyjnaha dziejańnia».
Jaho pasadzili ŭ 2021 hodzie, ale za padziei 2018 hoda — tady anarchisty pierakryli try pałasy trasy M1, pratestujučy suprać budaŭnictva akumulatarnaha zavoda. Ahułam Kaźlanku prysudzili 7,5 hoda źniavoleńnia.
U śpisach vyzvalenych Dźmitryj Kubaraŭ.
Dyzajniera aryštavali adrazu paśla vybaraŭ 2020 hoda. Siłaviki zajavili, što jon zachoŭvaŭ u kvatery rečyvy, kab vyrablać kaktejli Mołatava. Ahułam jamu pryznačyli 8 hadoŭ kałonii.
Siarod vyzvalenych i Valancin Stefanovič, adzin ź lidaraŭ «Viasny». Jaho asudzili da 9 hadoŭ źniavoleńnia.
Aleś Bialacki i Uładź Łabkovič trapili ŭ papiaredniuju partyju departavanych. Ciapier na svabodzie i Valancin. Pravaabaroncu trymali ŭ turemnych umovach u Mahilovie.
Na svabodzie Marfa Rabkova. Pravaabaronca znachodziłasia za kratami ź vieraśnia 2020 hoda. Sud, jaki adbyŭsia ŭ vieraśni 2022 hoda, prysudziŭ joj 15 hadoŭ kałonii.
Siarod vyzvalenych i departavanych u Litvu — Alaksiej Mielnikaŭ. Žychara Mahilova zatrymali 9 žniŭnia 2020 hoda. Jaho sudzili pa č. 2 art. 293 (padrychtoŭka da ŭdziełu ŭ masavych biesparadkach) i pa art. 295 KK (niezakonnaje zachoŭvańni zbroi). Dali 7 hadoŭ kałonii. Paźniej dadali jašče paŭtara hoda pazbaŭleńnia voli pa art. 411 KK (złosnaje niepadparadkavańnie patrabavańniam administracyi papraŭčaj ustanovy).
Vyzvaleny Dźmitryj Navažyłaŭ, jaho nie departavali. Były dyrektar BiełaPAN byŭ zatrymany ŭ žniŭni 2021 hoda. Jamu prysudzili 6 hadoŭ kałonii.
Vyzvaleny vikipiedyst Illa Baryskievič. Administratar Biełaruskaj Vikipiedyi taraškievicaj byŭ asudžany na dva hady pazbaŭleńnia voli za dyskredytacyju Biełarusi.
Vyzvalenaja palitołah Valeryja Kaściuhova. U 2023‑m joj prysudzili 10 hadoŭ kałonii.
Na volu vyjšaŭ brescki žurnalist Aleh Supruniuk. 8 žniŭnia 2025 hoda jaho asudzili da troch hadoŭ kałonii za «ŭdzieł u ekstremisckim farmavańni». Žurnalistu, jaki maje invalidnaść pa słychu, u kałonii nie dali mahčymaści karystacca słychavym aparatam. Aleh Supruniuk praktyčna ničoha nie čuŭ i mieŭ vializnyja prablemy ŭ kamunikacyi ź inšymi ludźmi.
Na voli taksama Maryna Pietražyckaja, zavuč minskaj himnazii №34. Jaje zatrymali ŭ 2024 hodzie pa spravie dvarovych čataŭ i asudzili na 2 hady kałonii.
U śpisach vyzvalenych — uładalnik hrodzienskaj etnakramy «Cudoŭnia» Andrej Nieściarovič. Jaho zatrymali ŭ lutym 2025 hoda i asudzili pa «narodnym» 342 artykule. Andreju dali paŭtara hoda chimii z nakiravańniem.
Siarod vyzvalenych, kamu dazvolili zastacca ŭ Biełarusi, bieraściejka Nadzieja Leskaviec. Žančynu zatrymali ŭ studzieni 2024 hoda, kali siłaviki rabili «rejd salidarnaści» — zatrymańni ludziej, jakija dapamahali palitviaźniam. Leskaviec abvinavacili ŭ «sadziejničańni ekstremisckaj dziejnaści, i za dapamohu palitviaźniam dali 3 hady kałonii.
Vyzvaleny naftanaviec i bubnač z Navapołacka Dźmitryj Šałak.
Dźmitryj byŭ zatrymany ŭ śniežni 2023 hoda i asudžany na 3,5 hoda za abrazu Łukašenki.
Vyzvalenyja taksama niadaŭna asudžanyja za dapamohu palitźniavolenym Viera Kananienka i jaje muž Siarhiej Kardaš. U studzieni 2026 hoda im prysudzili pa 3 hady kałonii. Jany byli zatrymanyja ŭ kastryčniku 2024 hoda padčas čarhovaha chapuna za dapamohu palityčnymi źniavolenym.
Siarod vyzvalenych — baranavicki aktyvist ź invalidnaściu treciaj hrupy Ihar Šumiłaŭ, piša «Viasna». Raniej jon trapiŭ u DTZ i straciŭ nahu, a taksama praz heta maje surjoznuju prablemu z pravaj rukoj.
Jaho asudzili pavodle art. 369 KK (Abraza pradstaŭnika ŭłady), č. 1 art. 368 KK (Abraza Łukašenki) i č. 2 art. 367 KK (Paklop u dačynieńni da Łukašienki). Sudździa Mikałaj Kmita prysudziŭ 4 hady 6 miesiacaŭ pazbaŭleńnia voli ŭ kałonii ahulnaha režymu.
Siarod vyzvalenych i palitźniavolenaja rasijanka Jarasłava Chromčankava, piša «Viasna». Žančyna žyła ŭ Mazyry i była zatrymanaja pa «spravie Hajuna». Jarasłavu pryznali vinavataj pavodle č. 1 i č. 2 art. 361‑4 (sadziejničańnie ekstremisckaj dziejnaści) i 369‑1 (dyskredytacyja Biełarusi) Kryminalnaha kodeksu.
Homielski abłasny sud pryznačyŭ joj try hady pazbaŭleńnia voli ŭ kałonii va ŭmovach ahulnaha režymu.
Vyzvalili taksama kaardynatara pošukavaha atrada «Anioł» Maksima Fiedaroviča, piša «Viasna». Jonbyŭ zatrymany pa «spravie Hajuna». Fiedaroviča asudzili pavodle č. 1 i č. 2 art. 361‑4 (sadziejničańnie ekstremisckaj dziejnaści) Kryminalnaha kodeksu da troch hadoŭ pazbaŭleńnia voli ŭ kałonii va ŭmovach ahulnaha režymu.
Mužčynu sudzili za dzieviać vypadkaŭ pieradačy danych u «Hajun». Taksama jamu pryznačyli štraf — 500 bazavych vieličyń.
Maksim — kaardynatar pošukavaha atradu «Anioł». Raniej jon pracavaŭ technołaham na «Minsk-Kryštali», ale całkam źmianiŭ žyćcio paśla taho, jak u 2017 hodzie dałučyŭsia da ruchu paśla maštabnych pošukaŭ Maksima Marchaluka ŭ Biełaviežskaj puščy. Viadoma, što ŭ eks-palitviaźnia jość maleńkaje dzicia.
Hladzicie poŭny śpis.
Ciapier čytajuć
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie2
Kamientary
nu ....