«Samaj pažyłoj pacyjentcy było 77: jaje chvalavała, što źnik arhazm». Intervju z seksołaham Minzdaroŭja
Letam i ŭzimku ŭ seksołahaŭ napłyŭ pacyjentaŭ. «Letam, bo chočuć padrychtavacca da adpačynku, a ŭzimku, bo bolš niama čaho rabić», — dzielicca seksołah Haradskoha kliničnaha psichijatryčnaha dyspansiera Minska, pazaštatny śpiecyjalist Ministerstva achovy zdaroŭja Vasil Šaŭlakoŭ. Pra tempieramient biełarusaŭ, patajemnyja žadańni žančyn, prahlad parnafilmaŭ i palihamiju — hutarym u intervju.
«Samaj pažyłoj pacyjentcy było 77: jaje chvalavała, što źnik arhazm»
«Naša Nina»: Chto źviartajecca da seksołahaŭ čaściej?
Vasil Šaŭlakoŭ: I mužčyny, i žančyny. Prablemy krychu roznyja. Asnoŭnymi pytańniami dla mužčyn zastajucca erekcyja i praciahłaść pałavoha aktu. Bo kali ŭ mužčyny niešta nie pracuje, to heta adrazu bačna — jon prosta nie ŭ stanie vykonvać svaje seksualnyja funkcyi. A žančyn chvalujuć jakaść uzbudžeńnia i prablemy seksualnaj ciahi. Pa pytańniach pałavoha kantaktu źviartajucca radziej, bo tyja składanaści, jakija ŭźnikajuć, nie tak pieraškadžajuć im — prosta tady seksualnyja adnosiny stanovicca nie takimi jarkimi ci vyklikajuć dyskamfort.
Uličvajučy, što našy žančyny kirujucca vyrazam «Boh ciarpieŭ, i nam nakazaŭ», kaniečnie, mužčyny prybiahajuć raniej, kali štości zdarajecca.
«NN»: U jakim uzroście prychodziać?
VŠ: Nasamreč, seksualnyja prablemy vielmi pamaładzieli, i siaredni ŭzrost tych, chto źviartajecca, — 21—30 hadoŭ. Samamu pažyłomu pacyjentu było 82 hady, a pacyjentcy — 77: u mužčyny byli składanaści z uzbudžeńniem, a žančynu chvalavała, što źnik arhazm. Ale ŭ starejšym uzroście čaściej prablemy nie psichałahičnyja i treba iści da kliničnaha seksołaha ci da ŭrołaha (hiniekołaha).
«NN»: Atrymlivajecca, kali prablemy ŭ maładym uzroście — heta psichałohija?
VŠ: U asnoŭnym tak. Ja zhodny z ahulnasuśvietnaj statystykaj, što bolš za 70% usich seksualnych parušeńniaŭ — psichahiennyja. Potym užo druhasna da hetaha moža dadavacca ci raźvivacca niejkaja arhaničnaja patałohija — niajakasnaja pracy sasudaŭ, endakrynnaj, niervovaj sistemy.
«NN»: Ci časta da vas źviartajucca pa parady, jak stać dobrym kachankam?
VŠ: Ciapier stolki litaratury na hetu temu napisana, stolki artykułaŭ u žoŭtaj presie, što, mnie zdajecca, iści da śpiecyjalista nikomu ŭ hałavu nie prychodzić. «Okiej, huhł» — i ŭsio zrazumieła. Da seksołaha iduć užo ŭ tym vypadku, kali ŭsio pieračytali, usio pasprabavali, viedaŭ chopić na try biblijateki, a niešta nie pracuje.
«Palihamija — heta stereatyp»
«NN»: Što robić mužčyn i žančyn seksualnymi?
VŠ: Seksualnaść — heta šyrokaje paniaćcie, źviazanaje z tym, jak my siabie ŭsprymajem, jak pavodzim, nakolki jakasna adbyłasia naša sacyjalnaja adaptacyja, nakolki žanockaść ci mužnaść u nas raźvita i nakolki my dazvalajem sabie heta tranślavać.
«NN»: U hramadstvie seksualnaść časta źviazvajuć z daŭhimi nahami, vialikimi vusnami — źniešnimi prykmietami.
VŠ: Jość seksualnaść, a jość seksapilnaść. Mnie zdajecca, ciapier razmova idzie pra druhoje. Usio ž taki seksualnaść — heta bolš ahulny stan našaha cieła, psichiki, sacyjalnych navykaŭ.
U bolšaści vypadkaŭ składanaści z raźvićciom seksualnaści viaduć da źnižanaj samaacenki. Bo tady naša prezientacyja stanovicca nie takoj važnaj, jak nam chaciełasia b.
«NN»: A duchi ź fieramonami pracujuć?
VŠ: Častkova. Fieramony pracujuć tolki ŭ tym vypadku, kali ŭžo jość vodhuk ad partniora, uzbudžeńnie, naprykład. Kali jaho niama, to fieramony bieskarysnyja.
«NN»: Adzin z seksołahaŭ vykazvaŭ mierkavańnie, što žančyny bolš palihamnyja za mužčyn. Ci pahadziciesia?
VŠ: Nie znachodziŭ hetamu paćviardžeńnia ni ŭ navukovych daśledavańniach, ni ŭ svaim nazirańni. Naohuł, mnie zdajecca, što palihamija — heta stereatyp.
«NN»: I adnosna mužčyn taksama?
VŠ: Tak. Usio ž taki heta zanadta indyvidualna. Pa vialikim rachunku, my tut chutčej kažam pra vybar asobnaha čałavieka, jakim čynam jamu dziejničać u kankretnaj situacyi. U pryvatnaści — ci raźvivać šmatlikija adnosiny adnačasova. Časam hety vybar byvaje nie vielmi jakasny, jak pakazvaje praktyka ŭ dalejšym. Ličycca, što vybar nie byvaje drennym, ale jon moža mieć peŭnyja nastupstvy.
«NN»: Atrymlivajecca, palihamija — śviadomy vybar, a nie pryrodny instynkt?
VŠ: Nu my ž istoty myślačyja — svaje instynkty možam strymlivać. Kali nie my, to Kryminalny kodeks dapamahaje (uśmichajecca).
«U našaj krainie seksualnaść ščylna źviazana ź finansavym stanoviščam»
«NN»: Nakolki seks važny ŭ adnosinach?
VŠ: U niejkim płanie možna kazać, što jaho rola była krychu zavyšana, čym jana jość na samaj spravie. Bo ŭ sučasnym hramadstvie daminujučaja rola seksu va ŭzajemaadnosinach adychodzić na zadni płan.
Ale naturalna, što seksualnyja adnosiny źjaŭlajucca adnym z važnych kampanientaŭ harmonii. Kali jość niejkija składanaści ŭ seksie, jany buduć adbivacca na ŭzajemaadnosinach ahułam. I naadvarot.
Čamu heta važna? Napeŭna, samy hałoŭny momant — samaraskryćcio. Pa vialikim rachunku seks — heta samaja vialikaja blizkaść, jakoj mohuć dasiahnuć mužčyna i žančyna. Bližej užo niemahčyma — kali ty nie chirurh, kaniečnie. Cialesnaja blizkaść źjaŭlajecca adnym z samych važnych kampanientaŭ farmiravańnia davieru ŭ adnosinach. Nu i seks — heta dobraja mahčymaść dyjałohu pamiž partniorami.
«NN»: Kali para nie supadaje pa tempieramiencie, patrabavańniach, jana moža raspaścisia?
VŠ: Na žal, tak byvaje. Časta šerah składanaściaŭ uźnikaje prosta praź niestykoŭku bijałahičnych hadzińnikaŭ. Naprykład, mužčyna žaŭruk i choča seksualnych adnosin rankam, a žančyna sava, i ŭ jaje hałoŭnyja enierhietyčnyja resursy zastajucca na viečar. Nu voś niestykovačka. Svaracca, svaracca, a da kansensu mohuć nie pryjści.
«NN»: Z časam u adnosinach seksu stanovicca mienš. Heta narmalna?
VŠ: Narmalna. Bo pieršym časam seks padahrajecca žarściu i vielmi mocnymi emacyjnymi pieražyvańniami — toje, što nazyvajecca zakachanaściu. Adpaviedna na niejkim etapie emacyjnyja pieražyvańni hublajuć svaju jarkaść, stanoviacca bolš spakojnymi, a ŭ adnosinach žarść źmianiajuć bolš ustojlivyja pačućci, davier u pryvatnaści. I seksualny kantakt z žarsnych paryvaŭ pakrysie stanovicca spakojnym, raźmieranym, ź lohkaj piaščoty, kłopatu. Heta zusim nie toje, što pakazvajuć u kino.
«NN»: Kab raznastaić adnosiny, param rajać ekśpierymientavać. Ci jość ekśpierymienty, jakija nie ličacca prymalnymi? Naprykład, seks utraich?
VŠ: Fantazii biaźmiežnyja i dobryja ŭ stasunkach u lubym farmacie. Kali my ich realizujem i zaprašajem treciaha, to tady heta pytańnie, što nazvajecca, parnaj normy — nakolki dla nas heta prymalna i nakolki situacyja ŭzajemnapažadanaja. Kali tak, to ŭsio dobra. Na žal, nie zaŭsiody heta adbyvajecca pa ŭzajemnym žadańni ŭ pary. U bolšaści vypadkaŭ heta niejki elemient hvałtu, prymusu, i tady takija ekśpierymienty asudžajuć adnosiny na zaviaršeńnie.
«NN: Kolki razoŭ seksu na tydzień ličycca dastatkovym?
VŠ: Jość ahulnasuśvietnaja norma, jakaja charakterna dla čałavieka paśla 30 hadoŭ i ŭ siamiejnych adnosinach paśla dvuch hadoŭ. Heta adzin-dva razy na tydzień. A dalej usio zaležyć ad tempieramientu.
«NN»: Pa vašych nazirańniach, u bolšaści biełarusaŭ tempieramient jaki? Pra charaktar ža kažuć, što pamiarkoŭnyja.
VŠ: Mnie zdajecca, heta słova «pamiarkoŭnyja» bolš adnosicca da taho, što biełarusy ŭmiejuć ciarpieć, ale nijak nie charaktaryzuje enierhietyku. Nasamreč, biełarusy davoli aktyŭnyja. Kali paraŭnoŭvać nas z najbližejšymi susiedziami, to my žyŭčyki. Ale ŭ siłu našaj vialikaj «ciarpiełki» svaju enierhietyku prytrymlivajem da lepšych časoŭ, na čorny dzień.
Byvajuć pieryjady, kali seksualnaść padaje i seksu moža nie być miesiacami. U našaj krainie heta ščylna źviazana ź finansavym stanoviščam. Bo, kaniečnie, kali ŭmoŭna situacyja ŭ krainie nie vielmi dobraja, budzie nie da seksu. I ŭsia enierhija pojdzie na padtrymańnie žyćciadziejnaści, zarablańnie hrošaj. Jak tolki ŭ krainie stanovicca stabilna, seksualnyja adnosiny vychodziać na piaredni płan i zvarotaŭ pa seksualnych pytańniach adpaviedna stanovicca bolš.
«NN»: Miarkujučy pa zvarotach, jakaja ŭ nas ciapier situacyja ŭ krainie?
VŠ: Pakul stabilna, ludziej bolš idzie (śmiajecca). Ale ŭžo pakrysie napružvajucca.
«NN»: Jakaja praciahłaść pałavoha aktu ličycca narmalnaj?
VŠ: Kali my kažam vyklučna pra pałavy akt, to ad 1,5 da 3 chvilin. Kali biarom niejkuju bolš šyrokuju charaktarystyku, to ŭ siarednim ad 5 da 15 chvilin. Kali brać u cełym seksualny kantakt, to jaho praciahłaść budzie vyšejšaj, bo ŭ ideale papiarednija łaski pavinny zajmać nie mienš za 15 chvilin. Ličycca, što heta minimalny čas, kab žančyna dasiahnuła piku ŭzbudžeńnia, dastatkovaha dla praniknieńnia i dasiahnieńnia arhazmu.
«Dla mužčyny patrebna zvarotnaja suviaź nakont taho, jak jon staraŭsia — pažadana z dobraj acenkaj»
«NN»: Raskažycie pra samyja raspaŭsiudžanyja stereatypy pra seks, jakija davodziłasia čuć.
VŠ: Jak ni dziŭna, bolš za ŭsio stereatypaŭ pra mužčyn. Naprykład, što mužčyna pavinien chacieć žančynu 24 hadziny na sutki. Kali žančyna raździełasia, jon tut ža pavinien jaje zachacieć. I naohuł, mužčyny takija mašyny, jakija mohuć zajmacca seksam, što b ni zdaryłasia. I, napeŭna, asnoŭnaja składanaść u tym, što žančyny vierać u heta i vielmi kryŭdziacca, kali heta nie tak.
Kali biarom stereatypy adnosna žanočaj seksualnaści, to samy raspaŭsiudžany — što žančynie naohuł heta ničoha nie kaštuje. To-bok mužčynie treba napružvacca, kab erekcyja była, a žančyna prosta lahła — i ŭsio atrymałasia. Druhi stereatyp — pra toje, što jakaść seksu dla žančyny charaktaryzujecca arhazmam. Naturalna, mužčyny čaściej za ŭsio nie ŭdakładniajuć u žačyn, jak jano nasamreč. Jak ułasna i žančyny.
Heta, darečy, adna z samych vialikich składanaściaŭ, bo dla mužčyny patrebna zvarotnaja suviaź nakont taho, jak jon staraŭsia — pažadana z acenkaj, pažadana z dobraj. A dla žančyny vielmi važna supravadžeńnie, u tym liku vierbalnaje — łaskavyja słovy, časam pytańni.
Bo ŭ žančyn bolš niuansaŭ u adnosinach uzbudžeńnia i jakaści seksualnaha kantaktu. Mužčynam z hetym praściej — u nas bijałohija nie praduhledžvaje piaščoty i santymientaŭ (uśmichajecca).
«NN»: Što majecca na ŭvazie pad acenkaj? Paśla seksu žančyna pavinna skazać: «Małajčyna»?
VŠ: «Ty lepšaje što było ŭ maim žyćci», «ty ideał» i h.d. Mužčynie praŭda vielmi važna adčuvać svaju značnaść u dasiahnieńni ŭzbudžeńnia i arhazmu ŭ žančyny. Voś taki ŭ nas punkcik dziŭny. Kamplimienty zališnija nie byvajuć. Žančynie ŭ mužčynie važna padtrymlivać upeŭnienaść va ŭłasnaj sile, mužnaści i stojkaści, a mužčynie ŭ žančynie — hnutkaść, piaščotu.
«NN»: Ci maje značeńnie, kolki ŭ čałavieka było pałavych partnioraŭ? Naprykład, kab zrazumieć, ci dobry jon paluboŭnik.
VŠ: Hety pakazčyk ni na što nie ŭpłyvaje. U mianie byli pacyjenty, u jakich było ŭmoŭna 50 žančyn u anamnezie, ale pry hetym u seksualnym płanie jany byli absalutna biazhramatnyja. A byli tyja, u kaho druhija stabilnyja adnosiny pa 15 hadoŭ, ale pry hetym jany dobra aryjentavalisia ŭ seksualnaj śfiery.
«NN»: A jakaja samaja vialikaja kolkaść partnioraŭ była ŭ vašych klijentaŭ?
VŠ: 59.
«NN»: Adzin ź biełaruskich sielebryci raskazvaŭ, što ŭ jaho było 500 žančyn. Ci moža heta być praŭdaj abo prosta vychvalańnie?
VŠ: Heta jak u aniekdocie: usie kažuć — i vy kažycie. Ale mahčyma. Čysta fizijałahična — lohka.
«Žanočaja masturbacyja — samaje cudoŭnaje, što možna ŭbačyć»
«NN»: Jak seksołahi staviacca da porna?
VŠ: Nie zaprašajuć paŭdzielničać (žartuje). Hladzieć jaho — dakładna narmalna, kali heta nie stanovicca zamienaj natulnych seksualnych adnosin. Akramia taho, parnahrafičnaja i eratyčnaja pradukcyja, asabliva pa etapie padletkavaści, padšturchoŭvajuć raźvićcio ŭ halinie seksualnaści.
Jak ni kruci, parnafilmy, pa-pieršaje, raźvivajuć fantaziju, pa-druhoje, dapamahajuć spraŭlacca z seksualnaj frustracyjaj pry adsutnaści pastajannaha partniora.
Jość šmat par, jakija razam hladziać parnahrafičnyja filmy i takim čynam padtrymlivajuć svaju enierhietyku, uzbudžeńnie.
«NN»: A što nakont masturbacyi?
VŠ: Pa sutnaści, toje ž samaje, što i z parnahrafijaj, ale bolš važna, bo masturbacyja — nieadmiennaja častka seksualnaha raźvićcia. Ludziam, u jakich jana adsutničaje, u žyćci ciažej adaptavacca i ŭstupać u seksualnyja adnosiny.
Masturbacyja dapamahaje raźvivać adčuvalnaść ułasnaha cieła da seksualnych pasyłaŭ. U pryvatnaści, heta tyčycca raźvićcia erahiennych zon, fantazij, źviazanych z dotykam. Asabliva važna dla žančyn.
Akramia taho, heta cudoŭny varyjant hulni ŭ pary. Jak kažuć mužčyny: žanočaja masturbacyja — samaje cudoŭnaje, što možna ŭbačyć.
«NN»: Što z ubačanaha ŭ parnafilmach lepš nie paŭtarać u žyćci?
VŠ: Dy amal usio. Toje, što tyčycca hvałtu, — adrazu nie. Heta jak kaskadziorskija truki, dzie pišuć: «u žyćci nie paŭtarajcie, bo niebiaśpiečna». Kali ludzi hladziać pornapradukcyju, jakaja krychu vybivajecca z razumieńnia narmalnych adnosin, naprykład BDSM, rolevyja hulni, to časta ŭ imknieńni raznastaić svajo seksualnaje žyćcio razyhryvajuć takija situacyi, zabyvajučy, što prafiesijnyja akciory — heta dobra padrychtavanyja ludzi. I naturalna, što bolšaść takich ekśpierymientaŭ toić u sabie roznaj stupieni traŭmatyzacyju i sapsavany ŭik-end. Kali partniory chočuć štości paŭtaryć, treba hramatna da hetaha rychtavacca.
«NN: Da temy BDSM. Paru hadoŭ tamu biestsieleram stała kniha «50 adcieńniaŭ šeraha». Heta što-niebudź kaža pra žančyn, jakija masava jaje čytali?
VŠ: Heta kaža pra ssoŭvańnie dynamiki adnosin u płanie maskulinnaści i fieminnaści. Ciapier vielmi šmat kažuć pra hiendarnuju roŭnaść. I ŭ našym hramadstvie žančyny praŭda maskulinazavanyja. Takaja litaratura budzie ŭzdymać fieminnaść u vyhladzie pakornaści, hnutkaści, addačy.
Daŭno byŭ taki dematyvatar ź sieryi «Tak chočacca być krochkaj i piaščotnaj žančynaj, a koni ŭsio biahuć, a chaty ŭsio harać». Mnie zdajecca, heta jakraz pra heta. Pra toje, što luboj žančynie čysta bijałahična chočacca adčuć niejki fienomien pakornaści, krychu skinuć samakantrol i prosta rassłabicca.
«Ciapier u socyumie vielmi šmat sublimacyi seksualnaści»
«NN»: Na jaki ŭzrost prypadaje pik seksualnaści?
VŠ: Ličycca, što ŭ mužčyny heta 26—30 hadoŭ. Nastupny pik — bližej da 40. U žančyn — u 33—38 hadoŭ. Ale ŭsio adnosna.
«NN»: Ci praŭda, što maładoje pakaleńnie aseksualnaje?
VŠ: Nie zusim. Mnie zdajecca, što krychu terminałohija błytajecca. Jany nie aseksualnyja, a nie staviać seks jak daminantu. Dla ich seks — heta chutčej raznastajnaść u adnosinach.
Ciapier u socyumie vielmi šmat sublimacyi seksualnaści. Pramy dostup da parnahrafičnaj i eratyčnaj pradukcyi, šmat seksualizacyi ŭ kino, litaratury, ŚMI. Naturalna, heta taksama daje niekaje vyjście seksualnaj enierhietycy ludziej. I tamu maładoje pakaleńnie bolš spakojna stavicca da seksu, čym ich baćki.
Viarnuŭsia z vajny, uładkavaŭsia ŭ Varšavie, pasvaryŭsia z usimi — i źnik. Pryjacieli pra eks-kalinoŭca Maksima Ralko, jakoha zatrymali ŭ Biełarusi1919
Kamientary