Iranskija ŭłady zapatrabavali admianić šlub z 9-hadovaj dziaŭčynkaj
Ułady Irana zapatrabavali, kab isłamski sud akruhi Bachmaj pravincyi Bojer-Achmad admianiŭ šlub pamiž 28-hadovym mužčynam i 9-hadovaj dziaŭčynkaj. Pra heta paviedamlajecca ŭ tvitary žurnalista Babaka Tahvieja.
Takoje rašeńnie było pryniata pad ciskam hramadskaści paśla taho, jak kadry ź viasiella pary byli apublikavanyja ŭ ŚMI i sacyjalnych sietkach. Akramia taho, paviedamlajecca, što miascovyja vydańni pišuć, byccam mužčynu nie 28 hadoŭ, a 22 hady. Adnak žurnalisty paćviardžajuć, što jaho žoncy ŭsiaho 9 hadoŭ.
Babak Tahviej taksama raskryŭ asobu 28-hadovaha mužčyny. Pavodle jaho źviestak, muža dziaŭčynki zavuć Miład Češani, jon bajec narodnaha apałčeńnia Basidž, jakoje ŭvachodzić u Korpus vartavych isłamskaj revalucyi. Češani atrymaŭ dazvoł na šlub u isłamskim sudzie akruhi.
Iranskaja žurnalistka Masich Aliniežad apublikavała ŭ tvitary videa ź viasiella dziaŭčynki ź Irana i raspaviała, što jano prymusiła jaje płakać. Žurnalistka zajaviła, što dziaŭčyncy mienš za 13, i aburyłasia isłamskimi zakonami. Karystalniki sacsietki zaklikali hramadskija arhanizacyi źviarnuć uvahu na šlub.
U Iranie pa zakonie dziaŭčyna moža ŭstupać u šlub z 13 hadoŭ, mužčyna — z 15 hadoŭ. Da 2002 hoda ŭ krainie dazvalałasia zaklučać šluby z 9-hadovymi dziaŭčynkami. Isłamskaja duchavienstva zaachvočvaje rannija šluby, bo heta, na ich dumku, praduchilaje pazašlubnyja suviazi, za jakija ŭ krainie praduhledžany ciažkija pakarańni.
Kamientary