U Breście na čas śviatkavańnia 1000-hodździa ŭ žycharoŭ kanfiskoŭvajuć zarehistravanuju zbroju
Napiaredadni śviatočnych mierapryjemstvaŭ, pryśviečanych śviatkavańniu 1000-hodździa Bresta, u miascovych žycharoŭ kanfiskoŭvajuć zbroju, paviedamiŭ na svajoj staroncy ŭ sacsietcy brescki videabłohier Siarhiej Piatruchin.
Pra heta błohieru raspaviała bieraściejka. Jana napisała, što 3 vieraśnia joj patelefanavaŭ supracoŭnik milicyi, jaki paviedamiŭ ab nieabchodnaści apiačatać siejf, u jakim muž žančyny zachoŭvaje palaŭničuju strelbu.
«Ja skazała, što zaraz ja nie doma, znachodžusia na dačy ŭ siabroŭ, i mahčymaści pryjechać niama. Jon adkazaŭ: «Tady ja apiačataju vašu kvateru i da 9-ha [9 vieraśnia zavieršycca śviatkavańnie tysiačahodździa] budźcie łaskavyja, nie zachodzicie tudy, nie majecie prava». Ja patelefanavała dziažurnamu Maskoŭskaha rajona horada Bresta i jon paćvierdziŭ: da 8-j ranicy ŭsiu hładkastvolnuju zbroju pavinny časova kanfiskavać, a naraznuju — apiačatać. Pry adsutnaści doma haspadaroŭ žyllo pavinna być apiačatana da 9 vieraśnia», — raspaviała žančyna błohieru Piatruchinu, vykazaŭšy zdahadku, što takija miery mohuć być źviazanyja z pryjezdam na śviatkavańnie 1000-hodździa «važnych asob».
U pres-słužbie MUS TUT.BY paćvierdzili: napiaredadni śviata ŭ Breście hładkastvolnuju zbroju ŭ nasielnictva vyrašyli na čas zabrać, a naraznuju — apiačatać. Robicca heta dla taho, kab zabiaśpiečyć biaśpieku hramadzian padčas praviadzieńnia masavych mierapryjemstvaŭ, paviedamiła aficyjny pradstaŭnik viedamstva Volha Čamadanava.
Sapraŭdy, u zakonie «Ab zbroi» ŭkazana, što supracoŭniki orhanaŭ unutranych spraŭ majuć prava «adbirać na časovaje zachoŭvańnie zbroju i bojeprypasy, jakija znachodziacca va ŭłaśnikaŭ, uładalnikaŭ na zakonnych padstavach, u metach zabieśpiačeńnia biaśpieki achoŭnych asob i achoŭnych abjektaŭ».
A voś na pytańnie, ci moža supracoŭnik milicyi ŭ adsutnaści haspadaroŭ apiačatać kvateru, u jakoj zachoŭvajecca siejf z zarehistravanaj zbrojaj, pradstaŭnica MUS adnaznačnaha adkazu nie dała:
— Nie vyklučaju, što takoje moža być na samaj spravie, — skazała Volha Čamadanava.
Nahadajem, śviatkavańnie 1000-hodździa ŭ Breście projdzie 6—8 vieraśnia. U adzin ź dzion tut čakajuć prezidenta.
Ciapier čytajuć
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata1616
Kamientary