Kiraŭnik Słonima źmienšyŭ sumu pazovu suprać Nexta i žurnalistaŭ u 5 razoŭ
Staršynia Słonimskaha rajvykankamu Hienadź Chomič, jaki padaŭ pazoŭ ab abaronie honaru, hodnaści i dziełavoj reputacyi, ciapier patrabuje ad Śviatłany Kalinkinaj 10 tysiač rubloŭ kampensacyi maralnaj škody. Na pačatku pracesu jon patrabavaŭ z žurnalistki 50 tysiač, piša «Radyjo Svaboda».
30 kastryčnika ŭ Savieckim sudzie Miensku razhladaŭsia pazoŭ staršyni Słonimskaha rajvykankamu Hienadzia Chomiča da ŭładalnicy sajta «Biełaruski partyzan» Śviatłany Kalinkinaj za publikacyju źviestak z pasta Telegram-kanału Nexta.
Ni pazoŭnik, ni adkazčyk u sud nie źjavilisia, ich intaresy pradstaŭlali advakaty Maryja Kolesava-Hudzilina i Aleh Ahiejeŭ.
Hienadź Chomič, jaki raniej zajaviŭ, što atrymanyja praz sud u žurnalistaŭ hrošy pojduć na ramont infekcyjnaha adździaleńnia Słonimskaj balnicy, admoviŭsia patłumačyć karespandentu Svabody svajo rašeńnie źmienšyć pretenzii.
Maryja Kolesava-Hudzilina skazała, što Chomič «prosta źlitavaŭsia nad žurnalistami».
«Heta nie aznačaje, što my na mienš paciarpieli, my paciarpieli bolš čym na 10 tysiač. Bolš źmianšać sumu nia budziem — takoha ŭ planie nie było», — skazała jana.
U sudzie advakatka zajaviła, što adkazčyk nie raskajaŭsia, tamu kampensacyja ŭ 10 tysiač rubloŭ «źjaŭlajecca razumnaj».
Paśla druhoha pierapynku sudździa Maryja Laškievič pastanaviła prypynić praces «pa zhodzie bakoŭ» da 18 listapada. Čakajecca, što jakraz da hetaha dnia ŭ sudzie Mienskaha rajonu budzie razhledžany analahičny pazoŭ Chomiča da ŭładalnika Telegram-kanału Nexta Ściapana Puciły.
Na papiarednim pasiadžeńni sud Mienskaha rajonu vyrašyŭ razhladać spravu ŭ adsutnaść adkazčyka. Asnoŭnaje pasiedžańnie tam pryznačyli na 12 listapada.
Pradstaŭnik Śviatłany Kalinkinaj Aleh Ahiejeŭ skazaŭ, što Chomiču treba poŭnaściu admović u pazovie. Artykuł na «Biełaruskim partyzanie» maje dva punkty pohladu — błohiera Nexta i Słonimskaha rajvykankamu — pra toje, ci byŭ Chomič pjany ŭ niepracoŭny čas.
Ahiejeŭ prasiŭ sud poŭnaściu admović u zadavalnieńni pazovu Chomiča. Pamier kampensacyi maralnaj škody jon nazvaŭ «jaŭna zavyšanym».
Aproč «Biełaruskaha partyzana», analahičnyja pazovy Chomič taksama padaŭ suprać ułaśnikaŭ niezaležnych vydańniaŭ 21.by i «Viečiernij Bobrujsk», jakija taksama pieradrukavali post Nexta.
Pavodle Maryi Kolesavaj-Hudzilinaj, sud Maskoŭskaha rajonu zaćvierdziŭ miravoje pahadnieńnie pamiž Chomičam i vydańniem 21.by, jakoje spłacić hrašovuju kampensacyju i apublikuje abviaržeńnie. Adnosna «Viečiernieho Bobrujska» praces praciahniecca 6 kastryčnika, tam pamier kampensacyi zajaŭleny ŭ 7 tysiač rubloŭ.
Pavodle advakatki, u Chomiča «jašče jość prava vystavić pazovy da astatnich vydańniaŭ, jakija raspaŭsiudzili niepraŭdzivuju infarmacyju».
Asnoŭnaje pasiadžeńnie pa pazovie Chomiča ŭ Mienskim rajonnym sudzie suprać stvaralnika Telegram-kanału Nexta Ściapana Puciły pryznačana na 12 listapada.
Kamientary