Nexta: Jak raznastaić žyćcio tych, chto raźbiŭ aparaturu, treba jašče padumać
Jak aceńvaje ŭčorašniuju akcyju na płoščy Svabody ŭ Minsku jaje inicyjatar — błohier Nexta? Z takim pytańniem «Naša Niva» źviarnułasia da jaho praz Telehram.
«Materyjał «Našaj Nivy» z analizam svajoj vuličnaj akcyi ja, viadoma, čytaŭ, i nijak nie mahu ź im pahadzicca, — napisaŭ nam Nexta. —
Pa-pieršaje, toje, što na sustreču pryjšło ad 500 da 1000 čałaviek, zusim nie aznačaje, što stolki ž jaje i bačyła. Žyvyja efiry ź mierapryjemstva viali telekanał «Biełsat» i radyjo «Svaboda». Hetyja strymy ŭ ahulnaj sumie hladzieli kala 150 tysiač unikalnych karystalnikaŭ. Usie jany pierakanalisia ŭ tym, što akcyja, kali nie ličyć incydentu z raźbitaj kałonkaj i złamanym kardonnym «mnoj», abyšłasia biez zatrymańniaŭ i źbićcia.
Pa-druhoje, važnaja sama atmaśfiera mierapryjemstva. Strym jaje ŭ poŭnaj miery pieradać nie moža, adnak, jak mnie raspaviadajuć ŭdzielniki, tam łunaŭ duch svabody. A hałoŭnaje — zaviazvalisia novyja znajomstvy i kantakty, užo nie virtualnyja. U naš čas kanapavych voinstvaŭ, paśla 25 hadoŭ strachu, heta darahoha varta. Možna ličyć heta pieršym etapam kanviertacyi virtualnaj armii prychilnikaŭ pieramien u realnuju. I ŭsio ŭ nas udasca. Treba pačynać z małoha. Ź siabie.
Narešcie, pa-treciaje, nieabchodna rabić papraŭku na čas i siły, jakija byli adviedzieny na padrychtoŭku akcyi. Šmattysiačnyja akcyi rychtujucca niekalki miesiacaŭ, a ŭ mianie było krychu mienš za tydzień. Taki vynik za hetak abmiežavany čas pierasiahnuŭ maje čakańni. Tym bolš, što ŭłady vielmi spałochalisia našaha mirnaha schodu: šmatlikich błohieraŭ previentyŭna zatrymlivali, nahnali aŭtazakaŭ i «intelihientaŭ» u cyvilnym, pastavili traktar i svaje pikiety, kanfiskavali aparaturu i prajektary. 80 % arhanizacyjnych momantaŭ z-za hetaha pravalilisia. Lohka klajmić i krytykavać, kali ŭsiaho 10 čałaviek dapamahali heta rabić. Tym nie mienš, akcyja ŭdałasia.
Takoha ž mierkavańnia, darečy, prytrymlivajucca i sami ŭdzielniki akcyi. Ciapier jany pišuć mnostva paviedamleńniaŭ z padziakaj za jaje praviadzieńnie. Taki vopyt vyjaviŭsia adnaznačna pazityŭny — i dla mianie, i dla adnadumcaŭ», — napisaŭ «Našaj Nivie» Nexta.
Jak vy aceńvajecie toje, što vam raźbili aparaturu? I jak heta paŭpłyvaje na vašu dalejšuju taktyku? — spytali my.
«Pa-pieršaje, u mianie ŭžo jość niamała fota i videa z tvarami tych, chto hetuju aparaturu raźbivaŭ. Kali ich apublikavać na 170-tysiačnuju aŭdytoryju, ich apaznajuć na praciahu niekalkich chvilin. A jak dalej raznastaić ich žyćcio — treba jašče padumać. mahčyma, uładalnik raźbitaj kałonki budzie dziejničać pa zakonie i napiša ŭ milicyju zajavu ab chulihanstvie i naŭmysnym źniščeńni majomaści. A mahčyma, my prosta apublikujem ich asabistyja dadzienyja na tuju ž aŭdytoryju i pahladzim, što atrymajecca.
Na dalejšuju taktyku heta paŭpłyvaje užyvańniem roznych techničnych chitrykaŭ. Naprykład, mnie ŭžo padkazali rašeńnie z małahabarytnymi partatyŭnymi kałonkami (ich možna prynieści niekalki dziasiatkaŭ), jakija abjadnoŭvajucca ŭ supolnuju sietku pa Bluetooth. Atrymlivajecca hučna i nie zanadta doraha, a zmahacca — biessesoŭna», — miarkuje Nexta.
Što aznačaje zahadkavy kod R99 u pryčynach śmierci Uładzimira Makieja i Vitolda Ašurka?5
Kamientary