Vyjšaŭ pieršy trejler da filma «Nie čas pamirać» pra pryhody Džejmsa Bonda, u jakim, jak čakajecca, Denieł Krejh źjavicca ŭ vobrazie ahienta 007 u apošni raz. Premjera karciny pryznačanaja na krasavik 2020 hoda, piša bbc.com.
Heta budzie 25-j film ź sieryi pra Džejmsa Bonda i pieršy z udziełam Rami Maleka, viadomaha hledaču pa sazie «Źmiarkańnie» i filmach «Ołdboj» i «Bahiemskaja rapsodyja», u jakim jon syhraŭ Fredzi Merkjury.
Malek syhraje Safina, bondaŭskaha antyhieroja.
Dla Denieła Krejha «Nie čas pamirać» stanie piatym pa liku filmam pra Bonda.
Režysior novaha filma — amierykaniec Kiery Dziodzi Fukunaha, jaki źniaŭ sieryjał «Mańjak» dla Netflix i pieršyja epizody sieryjała «Sapraŭdny detektyŭ» dla HBO.
Jon byŭ zaprošany na zdymki bandyjany ŭ kancy minułaha hoda, kali brytanski režysior Deni Bojł ( «Na ihołcy», «Plaž», «Miljanier z truščob») pakinuŭ prajekt z-za tvorčych roznahałośsiaŭ.
Nad scenarom filma pracavali Kiery Fuhunaha, Skot Bierns, a taksama Fibi Uoler-Brydž, aŭtarka idej sieryjałaŭ «Dreń» i «Zabivajučy Jevu». Heta pieršaja za paŭstahodździa žančyna, jakaja prykłała ruku da scenara filma pra Bonda.
Jak raspaviadali pradziusary karciny, u pačatku filma Bond nie źjaŭlajecca dziejnym sakretnym ahientam — jon pakinuŭ słužbu i atrymlivaje asałodu ad spakojnaha žyćcia na Jamajcy. Adnak da jaho pryjazdžaje jaho pryjaciel z CRU i prosić dapamohi ŭ vyratavańni vykradzienaha navukoŭca.
«Zadača akazvajecca bolš niebiaśpiečnaj, čym zdavałasia. U vyniku Bond idzie pa śledzie zahadkavaha złodzieja, uzbrojenaha novymi niebiaśpiečnymi technałohijami», — havorycca ŭ aficyjnym apisańni karciny.
Što aznačaje zahadkavy kod R99 u pryčynach śmierci Uładzimira Makieja i Vitolda Ašurka?5
Kamientary