U Polščy pra vykazvańni Pucina ab Miunchienskaj zmovie i pakcie Mołatava — Rybientropa: Falš!
Słovy Uładzimira Pucina ab tym, što Druhuju suśvietnuju vajnu raźviazała Miunchienski zmova 1938 hoda z udziełam Polščy, falsifikujuć realnaść. Pra heta zajavili ŭ MZS Polščy.
«Z turbotaj i niedavieram my ŭspryniali vykazvańni pradstaŭnikoŭ ułady Rasijskaj Fiederacyi, u pryvatnaści prezidenta Uładzimira Pucina, jakija tyčacca hieniezisu Druhoj suśvietnaj vajny, jakija pradstaŭlajuć falšyvy vobraz padziej. Jany nahadvajuć prapahandysckija naratyvy epochi stalinskaha tatalitaryzmu, jakija asudzili navat saviecki lidar Mikita Chruščoŭ», — havorycca ŭ zajavie.
U svaju čarhu Instytut nacyjanalnaj pamiaci Polščy nazvaŭ falsifikacyjaj historyi sproby Rasii reabilitavać pakt Mołatava — Rybientropa, zaklučany pamiž SSSR i Niamieččynaj u 1939 hodzie.
«Pad padstavaj «pakta ab nienapadzie» Hiermanija i Saviecki Sajuz akreślili svaje śfiery ŭpłyvu ŭ sakretnym pratakole, padzialiŭšy pamiž saboj terytoryi inšych niezaležnych dziaržaŭ», — adznačyŭ instytut.
«Hety pakt staŭ pieradumovaj Druhoj suśvietnaj vajny», — dadaŭ instytut.
Taksama ŭ instytucie adznačyli, što Polšča nie ŭdzielničała ŭ Miunchienskaj kanfierencyi 1938 hoda, i paraŭnoŭvać hetuju kanfierencyju z paktam Mołatava — Rybientropa niekarektna.
Nahadajem, raniej prezident Rasii Uładzimir Pucin na pres-kanfierencyi 19 śniežnia patłumačyŭ, što savieckija vojski źjavilisia ŭ Polščy paśla taho, jak urad krainy «straciŭ kantrol za svaimi ŭzbrojenymi siłami i za tym, što adbyvajecca na terytoryi». Pavodle jaho słoŭ, na toj momant tam nie było z kim vieści pieramovy, pakolki kiraŭnictva krainy ŭžo znachodziłasia na polska-rumynskaj miažy.
Taksama Pucin raskazaŭ ab udziele Polščy ŭ raździele Čechasłavakii ŭ 1938 hodzie. «Tak, kažuć, tam sakretnyja pratakoły, padzieł Polščy. Polšča sama paŭdzielničała ŭ raździele Čechasłavakii. Zajšła ŭ dva rajony — Ciešynski i jašče tam druhi rajon. I ŭsio, i zabrała ich. <…> Darečy kažučy, tak, savieckija vojski zajšli ŭ Polšču ŭ adpaviednaści z hetymi pratakołami», — adznačyŭ Pucin.
Kamientary