Ceny ŭ kramach źmienšacca? Nacbank razasłaŭ šmatabiacalny list
Nacbank Biełarusi pryznaŭ zahannaj praktykaj, pavodle jakoj absalutna ŭsie pakupniki pierapłočvajuć za tavary, jakija možna kupić pa kartkach rasterminoŭki («Mahnit» ad Biełarusbanka, «Chałva» ad MTBanka, «Čarapacha» ad banka VTB, «Kartka pakupak» ad Biełhazprambanka).
Schiema vyhladaje tak: pakolki bank «pryvodzić» u kramu novaha pakupnika, to prosić za heta bonus. Bank taksama zakładaje tudy ryzyki za nieviartańnie hrošaj na kartu rasterminoŭki.
Pryčym pamier uznaharody banka za apieracyju składaje časam da 30% cany za tavar.
U vyniku kramy vymušany zakładać u canu dadatkovyja vydatki i «raskidvać» ich na ŭsich pakupnikoŭ niezaležna ad taho, ci karystajucca jany kartkami rasterminovak.
Pra heta havorycca ŭ liście Nacbanka.
Ź lista vynikaje, što dla abmiežavańnia takoj schiemy Nacbank prapanuje bankam brać z kramaŭ uznaharodu, nie bolšuju za 4% ad koštu tavara.
Što heta aznačaje? Ab hetym raskazaŭ ekanamist Dźmitryj Kruk.
«Nacbank miarkuje, što raspaŭsiudžanaja praktyka kartak rasterminovak upłyvaje na ceny, ale ja asabista sumniajusia, što heta ŭpłyŭ ažno da 30%, — kaža Kruk. —
Kali kiravacca hetaj łohikaj, to ŭ liście Nacbanka čytajecca žadańnie zapavolić rost cenaŭ, tamu, mahčyma, u roźničnych sietkach sapraŭdy adbudziecca niejkaje źnižeńnie cenaŭ».
Ale ekanamistu tut bačycca i dvuchpaviarchovaja stratehija Nacbanka.
«Užo ciaham hoda Nacbank kaža, što jość chatnija haspadarki ŭ zonie ryzyki pa svaim materyjalnym stanie. I miarkuje, što kredytavańnie fizičnych asobaŭ treba strymlivać, a srodki pieranakiroŭvać na kredytavańnie jurydyčnych asob: biznesu, pradpryjemstvaŭ i hetak dalej. Maŭlaŭ, chutkaje narastańnie kredytavańnia «fizikaŭ» — heta pahroza.
I druhi momant — ŭžo niedzie z sakavika 2019 hoda Nacbank choča, kab banki nie zarablali na fizičnych asobach niejkuju «zvyšdachodnaść». I hety list musić stać jašče adnym faktaram, jaki budzie matyvavać banki najpierš kredytavać jurydyčnyja asoby. Bo kali narmatyŭna abmiežavać dla kramaŭ mahčymaść uklučeńnia kamisij bankaŭ u canu, to kramy stanuć mienš pryvabnymi dla bankaŭ i jany stanuć skaračać usie hetyja instrumienty kštałtu «Chałvy», i ŭ ich budzie bolš svabodnych resursaŭ, jakija možna nakiroŭvać u hetak zvany «realny siektar» — u bok jurydyčnych asobaŭ», — dadaŭ Kruk.
Ciapier čytajuć
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu36
Kamientary