«Buntary» zbuntavali Viciebsk

Fota Sieržuka Sierabro

Demakratyčnyja aktyvisty zrabili pieršy rejd u rehijony.

Najbolšy rozhałas zrabiła akcyja z vyviešvańniem bieł-čyrvona-biełaha ściahu na aśviatlalnaj viežy letniaha amfiteatru, bačnaj sotniam žycharoŭ Viciebsku. Zamacavała na viežy ściah i pryviazałasia da kanstrukcyi aktyvistka moładzievaha ruchu Kryścina Šacikava. Jaje aryštoŭvali z užyćciom hrubaj fizyčnaj siły AMAPaŭcy. Paźniej sud Kastryčnickaha rajonu aštrafavaŭ jaje na 150 bazavych vieličyniaŭ (4 młn 150 tys. biełaruskich rubloŭ).

U nastupnuju noč pa horadzie źjavilisia palityčnyja hrafici i ŭlotki, źmiest katorych śćviardžaŭ pra salidarnaść z aryštavanymi tavaryšami, a na abłasnym dramatyčnym teatry «buntaŭcy» vyviesili raściažku.

Hrafici maładziony robiać pryncypova tolki na darohach, nie psujučy ścienaŭ budynkaŭ. Milicyja Viciebsku ciaham apošnich dzion pravodzić zatrymańni siarod moładzievych aktyvistaŭ. Pry hetym niekatorych ź ich adpuskajuć paśla pravierki dakumentaŭ. RUUSy horadu pracujuć va ŭzmocnienym režymie.

Dzianis Dzianisaŭ, adzin z aktyvistaŭ Sakavickaj Płoščy, nie pažadaŭ patłumačyć, čamu «Bunt» pačaŭ dziejničać mienavita ź Viciebsku: «Sakret! Ale nia dumajcie, što Viciebskam usio abmiažujecca, bo heta pačatak ahulnanacyjanalnaj mabilizacyjnaj kampanii. Pryčym chaču padkreślić – heta niehvałtoŭny supraciŭ».

Pavodle słovaŭ Dzianisa, pieršaja bujnaja akcyja była zaplanavanaja na 17-ha, ale viciebskaja milicyja vyjaviła ŭ toj dzień nadzvyčajnuju aktyŭnaść, i mierapryjemstva daviałosia adkłaści. Na nastupny dzień vyrašyli pravieści akcyju z vyviešvańniem ściahoŭ – usiaho planavałasia vyviesić čatyry – na kožnuju ź viežaŭ, adnak udałosia toje adnoj Kryścinie. Sp.Dzianisaŭ zaznačyŭ, što pryniać udzieł u akcyjach «Buntu», jaki nia jość niejkaj strukturavanaj arhanizacyjaj, moža kožny niazhodny z uładami čałaviek: «Bunt» – heta pieravažna maładyja ludzi z roznych niezarehistravanych moładzievych ruchaŭ, a taksama tyja, chto da apošnich vybaraŭ nia mieŭ nijakaha dačynieńnia da palityki. Kaściak składajuć udzielniki namiotavaha miastečka». I dadaŭ: «Pačatak dobry. Zdoleli źviarnuć na siabie ŭvahu i trochi razvarušyć ludziej – daŭno Viciebsk takoha nia bačyŭ, asabliva hetkaj kolkaści milicyjantaŭ na vulicach».

«Heta nie arhanizacyja, – padkreśliła K.Šacikava, – heta zaklik da nieabyjakavych, znak taho, što my jość i budziem zmahacca». Viciebsk byŭ abrany admysłova dla taho, kab uskałychnuć rehijony. «My časta sutykajemsia z tym, što navat u abłasnych haradach ničoha nia viedajuć pra mienskija padziei. Kab vypravić sytuacyju, my abjedziem usie harady Biełarusi».

Pravaabaronca Aleś Kalita paviedamiŭ pra raspačatuju kryminalnuju spravu, u ramkach katoraj u jakaści śviedki ŭžo dapytali Kryścinu Šacikavu. «Zroblena heta było z šmatlikimi parušeńniami, i my padrychtujem skarhu ŭ prakuraturu», – zaznačyŭ A.Kalita.

Siamion Piečanko

• 0
• 0
• 0
• 0
• 0
• 0
• 0
• 0