Rasija pahadziłasia pavialičyć źnižku na naftu, što pastaŭlajecca ŭ Biełaruś, da $15,7 za tonu, što na $12 bolš, čym prapanoŭvałasia raniej, paviedamlaje Reuters sa spasyłkaj na try krynicy ŭ naftavaj halinie. Krynica RBK, blizkaja da adnoj z naftavych kampanij, paćvierdziła RBK paradak źnižki.
Pa słovach surazmoŭcaŭ Reuters, rasijskija naftaviki hatovyja z 1 krasavika ŭ poŭnym abjomie adnavić pastaŭki nafty ŭ Biełaruś. Adnak Biełaruś, čyje ŭłady raniej zajaŭlali pra žadańnie naładzić zakupki ŭ alternatyŭnych pastaŭščykoŭ, pakul nie paviedamiła, kolki mienavita nafty z Rasii joj treba.
Reuters adznačaje, što ździełka ź Biełaruśsiu stała mahčymaja na fonie padrychtoŭki Rasii da spynieńnia dziejańnia zaklučanaha raniej u ramkach APIEK+ pahadnieńnia pra abmiežavańnie naftazdabyčy. 9 sakavika — paśla razryvu ździełki APIEK+ — košt barala nafty marki Brent upaŭ na 24,1%, a 18 sakavika ŭpieršyniu z maja 2003 hoda apuściŭsia nižej za $25. Takim čynam, mienš čym za dva tydni baral Brent upaŭ u košcie bolš čym na 40%, a z pačatku hoda — amal utraja (8 studzienia nafta tarhavałasia kala $72 za baral). U siaredzinie dnia 23 sakavika Brent tarhujecca kala $25,5 za baral.
Zhodna ź mižuradavym pahadnieńniem ad 2017 hoda, da 2024 hoda Rasija pavinna pastaŭlać Biełarusi 24 młn t nafty ŭ hod, heta značyć pa 2 młn t nafty ŭ miesiac. Adnak rasijska-biełaruski kantrakt na pastaŭki nafty skončyŭsia 1 studzienia, i baki pakul nie damovilisia pra novaje pahadnieńnie. Hałoŭnaj pieraškodaj ličycca pytańnie cany.
21 sakavika Alaksandr Łukašenka zajaviŭ, što rasijanie «całkam pajšli» na prapanovy Biełarusi pa pastaŭkach nafty. Raniej krynica, blizkaja da biełaruskaha ŭrada, kazała RBK, što Rasija prapanavała krainie źnižku ŭ $7 na tonu nafty, ale Biełaruś hetaja prapanova nie zadavoliła.
U toj ža dzień pres-słužba ŭrada Rasii paviedamiła, što premjer-ministry dźviuch krain Michaił Mišuścin i Siarhiej Rumas u chodzie pieramoŭ dasiahnuli «pryncypovych damoŭlenaściaŭ pa paramietrach supracoŭnictva ŭ naftavaj śfiery, jakija ŭličvajuć uzajemnyja intaresy bakoŭ».
Ciapier čytajuć
U Sudanie paŭstancy źbili samalot ź biełaruskim vajskovym lotčykam. Voś što pra jaho viadoma2
Kamientary