Žonka viciebskaha artysta, jaki ŭ reanimacyi z karanavirusam: My byli ŭ troch balnicach, jany pierapoŭnienyja
Viciebski teatr imia Jakuba Kołasa admianiaje śpiektakli — u adnaho z artystaŭ karanavirus, jon u reanimacyi. «Naša Niva» vyśvietliła, što hety artyst — 75-hadovy Viktar Daškievič.
Žonka Daškieviča raskazała «Našaj Nivie» pra jaho chvarobu.
«My zachvareli na pnieŭmaniju, i ja, i muž. U paliklinicy zrabili fluarahrafiju, renthien i paśla pastavili hety dyjahnaz, — raspaviała Śviatłana Mikałajeŭna. — Nas nakiravali na špitalizacyju. My spačatku pajšli ŭ tubdyspanser, ale tam było pierapoŭniena. Tamu my adprasilisia dadomu, daktary dali nam antybijotyki i adpuścili.
Doma ŭ muža padniałasia tempieratura. Kali nas pryjšła pravieryć dziažurnaja doktarka, to skazała, što treba nieadkładna jechać u balnicu.
Nas nakiravali ŭ skurviendyspanser, jaki ciapier abstalavali pad pulmanałohiju.
Pakłali ŭ roznyja pałaty. Tam uziali analizy na karanavirus, ale skazali, što analiz admoŭny.
Razam z mužam lažaŭ mužčyna, jakoha paśla zabrali z balnicy. Čamu, kudy — nichto ničoha nie skazaŭ. Paśla muž lažaŭ z tryma mužčynami.
Raptam 24 sakavika muža pieraviali ŭ čyhunačnuju balnicu, bo jamu stała horš. I tam uziali novy analiz na karanavirus. 26 sakavika stała viadoma, što analiz pazityŭny.
Ja zastałasia ŭ skurviendyspansiery. Mianie vypisali 26 sakavika. U mianie paŭtorny analiz nie brali, skazali izalavacca i być doma 14 dzion. Dačka mnie nosić pradukty, pakidaje ich u padjeździe».
Śviatłana Mikałajeŭna kaža, što nie viedaje, jak Viktar Daškievič moh zarazicca. Za miažoju jon nie byŭ.
«10—11 sakavika muž hraŭ śpiektakli, 18 sakavika byŭ u teatry taksama. Pobač z mužam siadzieŭ mastacki kiraŭnik teatra, a pobač z mužam — rasijski režysior Dolnikaŭ. Ale ci muž zaraziŭsia ad kaho ź ich, ci ad kaho ŭ balnicy, my nie viedajem. Ciapier my ŭ teatry stelefanoŭvajemsia, praviarajem zdaroŭje adno adnaho. Daktary kažuć, što kali apošni raz muž byŭ u teatry 18 sakavika, to da 1 krasavika simptomy mohuć prajavicca ŭ kahości z kaleh, — kaža Śviatłana Mikałajeŭna.
— Siońnia muž u reanimacyi, na štučnaj vientylacyi lohkich. Kali jaho pakłali pad aparat, jamu spačatku stała lepiej, a paśla prajaviłasia lichamanka. Jaje źniali. I ciapier za 6 dzion nijakich pazityŭnych ruchaŭ niama. Kažuć — stan ciažki, ale stabilny, usio.
U muža jość zachvorvańnie — chraničnaja abstruktyŭnaja chvaroba lohkich. Heta ŭskładniaje situacyju. Znajomyja daktary kažuć, što jon vykaraskajecca, ale što tam budzie pa vyniku, chto jaho viedaje».
Pa jaje słovach, siem artystaŭ teatra znachodziacca ŭ balnicy. U piaci ź ich pnieŭmanija.
***
Viktar Daškievič
Naradziŭsia 3 studzienia 1945 ŭ vioscy Viacicieraŭka Čašnickaha rajona Viciebskaj vobłaści. Navučaŭsia ŭ Biełaruskim dziaržaŭnym teatralna-mastackim instytucie, pracavaŭ u Nacyjanalnym akademičnym dramatyčnym teatry imia Jakuba Kołasa, byŭ dyrektaram Biełaruskaha teatra «Lalka» (Viciebsk). Z 1981 pa 1990 hod, z 1991 pa 2007 hod vykonvaŭ abaviazki zahadčyka trupaj teatra imia Jakuba Kołasa.
Zasłužany artyst Biełarusi, uznaharodžany miedalom Skaryny.
Ciapier čytajuć
Łukašenka apraŭdvajecca za ideju z pryjezdam 150 tysiač pakistancaŭ — heta, kab «zachavać naš narod»28
Kamientary