Šrajbman pra pieršuju pres-kanfierencyju Capkały: Navat nie sprabuje zdavacca palitykam

1. Jość bačańnie, jakoje dla jaho važniejšaje za ŭsio, uklučajučy chacia b sprobu zdavacca palitykam. Prosta Biełaruś pavinna stać sučaśniejšaj. Jaje treba madernizavać. Nabiarom lepšaje z usiaho śvietu i zrobim cukierku.

Heta libieralny technakratyzm jak ideałohija. Sproba pabudavać z usioj krainy PVT, a ŭsio astatniaje — choć rasiejcam raspradać.

2. Adkazvać na pytańni jamu niecikava. «Ci baiciesia paŭtaryć los Hančara?» — «U mianie jość kanstytucyjnaje prava abiracca». «Kali vy rasčaravalisia ŭ Łukašenku?» — «Nam treba budavać Sinhapur». Jamu cikava raspaviadać ab svaich viedach i pražektach. Nu što vy prykałupalisia da hetaha Łukašenki i naohuł minułaha, ja chaču kazać pra Biełaruś CHCHII stahodździa, a vy mnie ŭsio pra 90-ja.

3. Jak i Babaryka, uchilaŭsia ad pramoj krytyki prezidenta, ale dazvoliŭ sabie haručy ściob pra toje, što Łukašenka — kumir babul, jaki dobra raźbirajecca ŭ tym, kolki parsiučkoŭ daje śvinka, ale nam treba ruchacca dalej. Ja nie ŭpeŭnieny, što jon zrazumieŭ, nakolki heta było na miažy.

4. Tema biełaruskaj identyčnaści čałavieka cikavić prykładna hetak ža, jak Łukašenku. Heta dla ich pieryfieryjnaje pytańnie, važniej budavać horad-sad. 

I padobnyja pohlady. My z ruskimi — častki adnaho cełaha (i z ukraincami), ich ruskaja mova — heta naša ruskaja mova, my zachodniaja častka histaryčnaj Rusi, my im jašče i kulturu ź Jeŭropy praz Skarynu prynieśli. 

Jon nie ruski šavinist i nie biełaruski nacyjanalist, hetaj temy prosta niama ŭ jaho ŭ hałavie. A tam jość pamiać ab MHIMO i ab tym, što adroźnieńniaŭ pamiž tryma ŭschodniesłavianskimi narodami jon nie adčuvaje. 

5. U adkaz na pytańnie pra svabodu słova vydaje hłyboka kamiercyjny padychod da presy. Kali ŚMI naš — jon pavinien pisać, jak nam padabajecca. Kali piša inakš — majem prava zabirać hrošy. Heta značyć ŚMI — instrumient biznesu, svaboda słova — svaboda biznesaŭ prasoŭvać svaje intaresy praz svaje ŚMI.

To-bok raspavioŭ heta jon byccam by i ščyra i maje prava na taki pohlad. Ale nakolki palityčna razumna tak pazicyjanavać siabie ŭ adnosinach da žurnalistaŭ na pieršaj presusie — pytańnie adkrytaje. 

Pikantnaść jašče i ŭ tym, što, pretendujučy na rolu palityčnaha pradstaŭnika IT-siektara, u jaho, zdajecca, horšyja adnosiny z hałoŭnym ajcišnym ŚMI — dev.by i administracyjaj PVT, jakaja, miarkujučy pa šmatlikich raskazach znutry, paśla jaho vyłučeńnia tłumačyła svaim rezidentam, čamu jaho nie treba padtrymlivać.

6. Maniera padačy — antypalityčnaja. Manatonna i zaciahnuta, šmat biurakratyčnaj leksiki. Nie daje vuchu padstaŭ začapicca za vyraznyja łozunhi, zakliki, płany. 

Šyrokaja aŭdytoryja heta prosta nie ŭsprymie, tamu što jon nie kaža ab prablemach ludziej, jakija nie razumiejuć sensu frazy Rejhana pra złuju dziaržavu i što takoje IPO.

Mianie nie pakidała pačućcio, što ja słuchaju lekcyju prahresiŭnaha čynoŭnika na KEF abo startap-kanfierencyi, a nie prahramnaje vystupleńnie palityka. Materyjał cikavy, padača — nie tudy.

• 0
• 0
• 0
• 0
• 0
• 0
• 0
• 0