Urad Biełarusi ŭnios źmieny i dapaŭnieńni ŭ paradak arhanizacyi i praviadzieńnia centralizavanaha testavańnia (CT).
Sioleta siertyfikaty centralizavanaha testavańnia buduć vydavacca niezaležna ad atrymanaha bała. Pra heta BiełaPAN paviedamili ŭ Respublikanskim instytucie kantrolu viedaŭ.
Jak paviedamlaje pres‑słužba ŭrada, pastanovaj Saŭmina № 421 ad 6 krasavika 2009 hoda vyklučana norma,
pavodle jakoj na siertyfikat ab prachodžańni CT moh pretendavać abituryjent, jaki atrymaŭ pa pradmiecie testavy bał, što pa pieravodnaj škale Ministerstvy adukacyi adpaviadaje adznacy, vyšejšaj za dva bały pa dziesiacibalnaj škale.
Novaŭviadzieńnie zaklikana pavialičyć šansy maładych ludziej na pastupleńnie ŭ VNU i SSNU jak dziaržaŭnaj, tak i pryvatnaj form ułasnaści, zaznačajuć u pres‑słužbie.
Jak padkreślivajecca ŭ paviedamleńni, asablivuju aktualnaść źmieny va ŭmovach vydačy siertyfikata nabuduć hetym letam, kali budzie pavialičany vypusk navučencaŭ bazavaj i siaredniaj škoł.
Aprača taho, u hetym hodzie abituryjent pry adsutnaści pašpartu moža pryjści na testavańnie z daviedkaj, što jaho zamianiaje.Jak havorycca ŭ kamientary da dakumienta dyrektara Respublikanskaha instytuta kantrolu viedaŭ Ministerstva adukacyi Mikałaja Fiaśkova, vadzicielskaje paśviedčańnie nie moža być pradjaŭlena ŭ jakaści dakumienta pry prachodžańni testaŭ. «My vielmi prosim abituryjentaŭ, jakija płanujuć zdavać u hetym hodzie CT, nie zabyvać doma pašpart, nie hublać jaho abo, u krajnim vypadku, atrymać daviedku, jakaja vydajecca ŭ vypadku zhuby abo zamieny pašpartu», — padkreśliŭ M.Fiaśkoŭ.
Aprača taho, zhodna z pastanovaj, piedahoham‑arhanizataram, jakija buduć sačyć padčas ispytaŭ za paradkam u aŭdytoryjach, zabaraniajecca mieć pry sabie mabilnyja telefony i inšyja srodki pryjomu‑pieradačy infarmacyi, a taksama prynosić i (abo) vykarystoŭvać ručki (hielevyja abo kapilarnyja) z čarniłam čornaha koleru.
Kankretyzujecca norma, zhodna ź jakoj «abituryjentam zabaraniajecca prynosić, a taksama vykarystoŭvać u aŭdytoryjach, dzie pravodzicca CT, lubyja pradmiety, aprača dakumienta, jaki śviedčyć asobu (abo daviedki), propuska, ručki (hielevaj abo kapilarnaj) z čarniłam čornaha koleru; falsifikavać danyja ŭ miescy rehistracyi błanka adkazaŭ; mianiacca miescami, vykarystoŭvać dapamohu inšych asobaŭ dla vykanańnia testavych zadańniaŭ».
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii18
Kamientary