Čyrvony kaścioł vinavaty dziaržavie 156 tysiač rubloŭ padatkaŭ? Vierniki źviartajucca da Łukašenki
12 lipienia padčas słužby ŭ kaściole Śviatych Symona i Aleny ŭ Minsku viernikam paviedamili, što ŭłady naličyli padatak na ziamlu i amartyzacyju budynka ŭ pamiery 13 000 rubloŭ štomiesiac. «Za što my pavinny płacić? Za toje, što molimsia ŭ svaim kaściole?», — havoryć śviatar na videa, zapisanym padčas słužby. Vierniki źbirajuć podpisy da Alaksandra Łukašenki, kab budynak chrama pieradali parafii ź dziaržaŭnaj ułasnaści, piša «Radyjo Svaboda».
Adzin sa śviataroŭ Čyrvonaha kaścioła, ksiondz Stanisłaŭ Stanieŭski, patłumačyŭ, što taki zvarot vyklikany niepadjomnaj dla kaścioła sumaj padatkaŭ, jakuju patrabujuć vypłacić mienskija ŭłady.
«My znoŭ źviartajemsia, užo vyšej — da samoha jaho, prezydenta našaha, kab jon urešcie addaŭ nam toje, što naležyć nam. Kaścioł nikoli nie naležaŭ dziaržavie, u nas jość padzieł carkvy i dziaržavy. Tamu my i źviartajemsia da vas, kab vy padpisvali hety zvarot. Za šeść miesiacaŭ naličyli 156 tysiač rubloŭ. Tamu vialikaja-vialikaja da vas prośba, kab hetyja podpisy sabrać. Čym bolš nas budzie, tym budzie lepš», — zajaviŭ a. Stanisłaŭ, źviartajučysia da viernikaŭ padčas kazani ŭ Čyrvonym kaściole.
«Zbor podpisaŭ za viartańnie Čyrvonaha kaścioła va ŭłasnaść parafii sv. Symona i Aleny abumoŭleny tym, što mienskija ŭłady vystavili apłatu za amartyzacyju kaścioła i padatki za karystańnie ziamloj u sumie kala 13 tysiač rubloŭ štomiesiac. Ujaŭlajecie, jakaja heta suma?» — rastłumačyŭ Stanieŭski.
«Čamu kaścioł pavinien płacić dziaržavie za toje, što karystajecca? Za što my pavinny płacić našaj dziaržavie 13 tysiač u miesiac? Za toje, što molimsia ŭ svaim kaściole. Tamu pry vychadzie z kaścioła možna pakinuć podpis za toje, kab dziaržava addała nam naš kaścioł», — zajaviŭ ksiondz.
«Heta nia pieršy zvarot — majem cełuju tečku prośbaŭ. Mienharvykankam adkazaŭ: nia bačyć nieabchodnaści addavać kaścioł ludziam», — paviedamiŭ Stanieŭski.
Pavodle jaho, «słuha Božy Edvard Vajniłovič budavaŭ kaścioł tolki dla ludziej, kab jany tut mahli prasłaŭlać Boha».
Pazycyja «Mienskaj spadčyny»
U kamunalnym budaŭniča-ekspluatacyjnym unitarnym pradpryjemstvie «Mienskaja spadčyna» karespandentu «Svabody» skazali, što, kab była padatkovaja lhota dla relihijnaj arhanizacyi, treba ŭnosić źmieny ŭ padatkovaje zakanadaŭstva.
«Usie ŭ kursie, ja dumaju, što pavinny ŭnieści źmieny ŭ padatkovaje zakanadaŭstva, — skazała hałoŭnaja buchhaltarka Taciana Hardukievič. — Na hety momant my svaimi hrašyma zapłacili padatki, a ciapier jany nam viartajuć pavodle ŭkazu №150».
Na hety momant parafija Čyrvonaha kaścioła vinavataja 156 tysiač rubloŭ padatku na ziamlu i padatku na nieruchomaść. Parafija karystajecca kaściołam na pravach «biazvypłatnaha karystańnia».
«Jany ž padniali heta pytańnie i va ŭrad telefanavali, ja dumaju, pavinny vyrašyć heta pytańnie». Nakont taho, ci mohuć kaścioł addać va ŭłasnaść parafii, jak hetaha chočuć vierniki, namieśnik dyrektara «Mienskaj spadčyny» skazaŭ, što ŭłaśnikam budynka źjaŭlajecca horad:
«My ž nie ŭłaśniki, ułaśnikam źjaŭlajecca Mienharvykankam, jaki im užo adkazvaŭ, što ŭ hetym niama nieabchodnaści. Tamu «Mienskaja spadčyna» nie vyrašaje hetaha pytańnia, heta nie ŭ jaje kampetencyi. My prosta pravodzili rekanstrukcyju kaścioła, jaki znachodzicca ŭ biazvypłatnym karystańni, heta značyć kaścioł pieradadzieny ŭ karystańnie parafii. U nas usie płaciać. Tamu padatak naličany zakonna».
Atrymać kamentar u Mienharvykankamie pakul nie atrymałasia.
Probašč Čyrvonaha kaścioła ksiondz Uładzisłaŭ Zavalniuk ličyć, što kankretna niešta kazać pra sytuacyju možna budzie zaŭtra ci paślazaŭtra paśla taho, jak zvarot budzie pieradadzieny ŭładam.
«Zaraz my pakul sabrali podpisy, źviartajemsia, kab usio ž pieradali Božy chram na balans kaścielnaha kamitetu», — skazaŭ karespandentu «Svabody» probašč ksiondz Uładzisłaŭ Zavalniuk.
Raniej kiraŭnictva kaścioła źviartałasia ŭ Mienharvykankam z prośbaj nie zabirać chram i nia ŭvodzić novaha padatku na ziamlu. Ale atrymali admovu na toj padstavie, što budynak zdajecca viernikam u arendu.
La ŭvachodu ŭ kaścioł i ŭ kancylaryi źbirajuć podpisy za zachavańnie chrama dla viernikaŭ. Paźniej podpisy buduć adpraŭlenyja ŭ prezydenckuju administracyju.
«My budziem prasić dziaržavu addać toje, što naležyć nam», — havorycca ŭ kalektyŭnym zvarocie.
Kamientary