«Kali b nie vyžyŭ — kamu b byli dzieci patrebnyja?» Vyzdaravieŭ padpałkoŭnik Vajennaj akademii, jaki pravioŭ dva tydni na ŠVŁ
Rusłan Ušakoŭ — padpałkoŭnik Vajennaj akademii, adzin ź pieršych vajskoŭcaŭ, jaki zachvareŭ na karanavirus. Ušakoŭ dva tydni pravioŭ na štučnaj vientylacyi lohkich, byŭ u komie, za jaho losam sačyła ŭsia vajskovaja supolnaść stalicy.
Čytajcie: 40-hadovy padpałkoŭnik Vajennaj akademii na ŠVŁ. Žonka aburajecca fejkami ŭ internecie
Nasupierak prahnozam Rusłan adužaŭ, viarnuŭsia da słužby i navat ŭśmichajecca. «Naša Niva» paprasiła jaho raskazać, jak heta ŭsio było. Jon pahadziŭsia.
Rusłan adčuŭ, što zachvareŭ, 25 krasavika. Hulaŭ ź dziećmi paśla abieda, jak raptam adčuŭ, što pačynaje hareć — hraduśnik pakazaŭ za 39!
«Spačatku dumaŭ pra zvyčajnuju prastudu, maŭlaŭ: sabju tempieraturu i ŭsio budzie narmalna. Ale nie źbivałasia. U paniadziełak užo vyklikali doktara, a toj pryjšoŭ biez abarony, bieź ničoha, vypisaŭ ukoły. Ale na nastupny dzień žonka nastajała na tym, što treba ŭ špital», — raskazvaje vajskoviec.
Usio raźvivałasia imkliva. U 432-y hałoŭny vajenny kliničny miedycynski centr uzbrojenych sił Ušakoŭ trapiŭ 28 krasavika, praz try dni paśla pieršaha ŭzdymu tempieratury.
A 29 krasavika, vychodzić, jaho ŭžo ŭviali ŭ komu i padklučyli da ŠVŁ.
«Kali ja pryjechaŭ, dumaŭ, što nu maksimum kropielnicy buduć stavić, a praz tydzień pajedu dadomu. Surjoznaść situacyi ja nie razumieŭ, — kaža Ušakoŭ. — Ja navat nie viedaŭ značeńnia słova «saturacyja». Nu niešta na palec čaplali, mierali, tam ličby byli 93, 92, 90… Ale heta ŭ kisłarodnaj mascy. Potym pamierali bieź jaje i ŭsio — doktar skazaŭ pieravodzić u reanimacyju. Ale ja heta ŭžo słaba pamiataju, viedajecie, vielmi mocna chaciełasia spać. Ja hladžu na hetych ludziej pierada mnoj: doktar, sanitarki, ja adzin raz mirhaju, potym druhi… I ŭsio, jany źnikajuć, nastupny raz ja ich ubačyŭ 8 maja».
Vajskoviec kaža, što ŭ komie jamu zapomnilisia tolki biełyja plamy pierad vačyma, jakija časam razbaŭlali ciemru — nibyta pierad zapluščanymi vačyma ŭklučali i adklučali lichtaryk. Bolš ničoha.
«Kali raskaturchaŭsia — pierada mnoj staić doktar. Kaža: «Budu zadavać pytańni, havaryć vy nie možacie, kivajcie hałavoj «tak» ci «nie» abo pakazvajcie rukami». A ja nie zrazumieŭ, pačaŭ havaryć, a atrymlivałasia tolki «chrrrchrr» — trubka ŭ horle. Ja ž nie viedaŭ, što sa mnoj adbyłosia. Heta mnie jany patłumačyli, kolki dzion ja byŭ u komie», — kaža Ušakoŭ.
Vielmi vysoka vajskoviec adhukajecca pra daktaroŭ i sanitarak.
«Usio mahčymaje rabili, a dziaŭčaty-sanitarki — miedyki ź vialikaj litary. Mianie padtrymlivali, usio rabili — heta ž i ŭ tualet treba niejak i inšaje», — dziakuje Ušakoŭ.
Na ŠVŁ aficera trymali ažno da 14 maja. Pieršy čas jaho aściarožna karmili praz špryc, potym jon sprabavaŭ jeści sam u momanty, kali adklučali aparat dla treniroŭki ŭłasnych lohkich.
Kaža, što raboty ŠVŁ nie adčuvaŭ — padstroiŭsia pad jaho.
«Pieršyja dni ja byŭ vielmi-vielmi słaby, ruki treślisia, treniroŭkaj było prosta padymać ich. Niedzie 14 maja ŭpieršyniu napisaŭ žoncy pa vajbiery: «Pryvitańnie, lubaja». Jana adkazała, što ja małajčyna, skinuła fota ź dziećmi. Ja tady jašče nie viedaŭ, što jany taksama chvarejuć. Ale jany lohka pieranieśli. A taksama ŭsie ich vielmi padtrymlivali: pradukty pryvozili, hrošy pieraličvali. Padtrymka była», — kaža Ušakoŭ i dadaje, što zrabiŭ važnuju vysnovu paśla hetaj historyi.
«Uśviadomiŭ, što samaje hałoŭnaje — siamja. Mianie jak pieraviali na reabilitacyju, dyk tady pieršy raz pačaŭ dumać pra śmierć, što moh i nie vykaraskacca. Stała strašna, što kali b nie vyžyŭ — kamu b byli dzieci patrebnyja? Važniej za siamju ničoha niama! Raniej niejak praściej staviŭsia, jak da naturalnaha, a ciapier jak da samaha darahoha», — reziumuje Rusłan.
Taksama jon za čas chvaroby skinuŭ 16 kiłahram, pryniaŭ rašeńnie pravilna charčavacca i nie zakidvać sport.
Ale dzie zaraziŭsia, tak i nie zrazumieŭ: kaža, mo ŭ hramadskim transparcie, mo ŭ kramie.
«Ale ja ž raniej nijakich praviłaŭ biaśpieki i nie vykonvaŭ, a ciapier voś staŭ nasić masku. I dumaju, što ŭsio mahčymaje treba rabić, kab nie zachvareć. Bierahčy siabie i blizkich. Vykonvać usio, pra što havorycca adusiul: treba nasić maski, myć ruki, trymać dystancyju», — kaža Ušakoŭ.
Ciapier čytajuć
U minskim mietro prachodziać vyprabavańni novyja ciahniki FOTY3
U minskim mietro prachodziać vyprabavańni novyja ciahniki FOTY
Rasijskaja nieanacystka, jakaja adsiadzieła 16 hadoŭ za zabojstva advakata i žurnalistki: Jon naprošvaŭsia svaimi pohladami na čačenskuju kampaniju2020
Kamientary