Z nastupnaha hoda ź piedahohami pačnuć pravodzić psichałahičnyja sumoŭi
U Biełarusi z 2026 hoda pačnuć uviadzieńnie psichałahičnych sumoŭjaŭ dla tych, chto pracuje ŭ śfiery adukacyi abo źbirajecca pracavać piedahoham. Heta praduhledžana pastanovaj Savieta ministraŭ №706 ad 5 śniežnia 2025 hoda, apublikavanaj na Nacyjanalnym pravavym partale.
Dakumient zaćviardžaje novy paradak, jaki vyznačaje, kali i jak najmalniki — jak arhanizacyi, tak i indyvidualnyja pradprymalniki, — pavinny pravodzić psichałahičnaje sumoŭje z asobami, što płanujuć zajmacca piedahahičnaj dziejnaściu, u tym liku ŭ śfiery sportu i fizičnaj kultury.
Abaviazkovaje sumoŭje budzie datyčyć nie tolki piedahohaŭ, ale i ŭsich, čyja praca źviazanaja z pastajannym kantaktam ź dziećmi i vykanańniem vychavaŭčych funkcyj. Najmalnik maje prava nakiravać čałavieka na takuju pravierku, kali ŭ charaktarystykach z papiaredniaha miesca pracy abo vučoby zhadvajucca niehatyŭnyja maralnyja rysy.
Akramia taho, na sumoŭje mohuć adpravić i ŭ vypadku, kali pra supracoŭnika pastupaje niehatyŭnaja infarmacyja ad inšych asob abo dziaržaŭnych struktur, jakaja stavić pad sumnieŭ jaho prafiesijnyja, dziełavyja abo maralnyja jakaści. Heta ž tyčycca situacyj, kali ŭ dačynieńni da jaho siamji viadziecca sacyjalnaje rasśledavańnie.
Pravodzicca psichałahičnaje sumoŭje budzie ŭ dziaržaŭnych ustanovach, dzie ŭ štatnym raskładzie jość pasada psichołaha abo piedahoha-psichołaha. Płanujecca, što pracedura budzie častkova kampjutaryzavanaj. Ahulnaje mietadyčnaje kiraŭnictva daručana Ministerstvu adukacyi sumiesna ź Ministerstvam achovy zdaroŭja.
Novyja praviły pačnuć dziejničać z 17 studzienia 2026 hoda.
Ciapier čytajuć
Vyzvalenym i departavanym va Ukrainu palitviaźniam nie addali pašparty9
Kamientary