Šachcior Jury Korzun, jaki prykavaŭ siabie na hłybini: Heta była akcyja suprać hvałtu i biezzakońnia, jakija panujuć u krainie

Ranicaj 10 vieraśnia mašynist kambajnu 1-ha rudaŭpraŭleńnia «Biełaruśkaliju» Jury Korzun prykavaŭ siabie da abstalavańnia na hłybini 305 metraŭ i admaŭlaŭsia padymacca na pavierchniu.

Jon zajaviŭ, što budzie zastavacca ŭ šachcie da pačatku vykanańnia jaho patrabavańniaŭ da ŭładaŭ. U ich liku — adstaŭka Alaksandra Łukašenki; pakarańnie siłavikoŭ za źbivańni, katavańni i vykradańni mirnych hramadzianaŭ; spynieńnie zapałochvańnia i zvalnieńnia pracoŭnych, vyzvaleńnie zatrymanych pradstaŭnikoŭ strajkamu.

«Zamoviŭ u internet-kramie milicejskija kajdanki i prykavaŭ siabie da abstalavańnia»

Paśla biezvynikovych pieramovaŭ u zaboj spuścilisia hornaratavalniki, razrezali kajdanki i prymusova vynieśli Juryja Korzuna z šachty. Na pavierchni ŭžo čakała mašyna chutkaj dapamohi, rabočaha adpravili ŭ pryjomny pakoj Salihorskaj centralnaj lakarni. Tudy ž vypraviłasia kalona ź niekalkich dziasiatkaŭ salidarnych šachtaroŭ.

Čytajcie:
Salihorski šachcior Jury Korzun pratestavaŭ u šachcie na 300-mietrovaj hłybini — jon admaŭlaŭsia vychodzić

Paśla vychadu z medustanovy Jury raskazaŭ Radyjo Svaboda pra svoj adzinočny strajk pad ziamloj.

«Siońnia ja pravioŭ akcyju pratestu suprać hvałtu i biezzakońnia, jakija panujuć u našaj krainie — najpierš z boku ŭładaŭsuprać mirnych ludziej, — patłumačyŭ jon. — Ja mašynist kambajna, paśla zakančeńnia źmieny prosta nie padniaŭsia na pavierchniu. Kab niejak siabie ŭtrymać i nie dazvolić vyvieści, zahadzia zamoviŭ u internet-kramie milicejskija kajdanki, mnie ich prysłali, akazalisia dastatkova mocnyja. Tam byŭ 3-metrovy łancuh, i ja siabie takim čynam pryčapiŭ da abstalavańnia».

Kali jon byŭ užo ŭ takim vyhladzie, pa adnym pačali prybyvać inžynerna-techničnyja rabotniki rudnika, praciahvaje Jury Korzun. Sprabavali ŭščuvać, adhavorvali ad nieabdumanych učynkaŭ.

«Ja im skazaŭ, što davioŭ patrabavańni da viedama hiendyrektara i, pakul nie pačniecca ich vykanańnie, zastanusia pad ziamloj. Tady pieramoŭnikaŭ stała jašče bolš, čałaviek 12. Urešcie pryviali ludziej z benzarezam. Skazali, što nia maju prava znachodzicca ŭ šachcie, bo niebiaśpiečna być adnamu ŭ dalokim zaboi. Dastatkova hruba, usim natoŭpam adsunuli dalej ad abstalavańnia i pierarezali łancuh. Fizyčny supraciŭ byŭ biessensoŭny», — udakładniŭ Jury Korzun.

«Načalstva zapatrabavała zaklučeńnie psychijatra, ale ja absalutna zdarovy»

Svaju akcyju jon pačaŭ u 5:20 ranicy, a na pavierchniu jaho prymusova padniali kala 9-j hadziny. Zahad neŭtralizavać pratestoŭca pastupiŭ chutka i byŭ vykanany nieadkładna, kaža Svabodzie harniak.

«Mnie stała kiepska — pačało baleć serca, uźniaŭsia cisk. Vidać, mocna raschvalavaŭsia, pakul usio adbyvałasia. Tamu mianie ŭžo sustrakała «chutkaja», tut ža była i milicyja, pačynajučy ad samaha vysokaha načalstva.

Kajdanki ź mianie źniać nia zdoleli, tamu 3-metrovy łancuh ciahnuŭsia śledam. Usiudy jaho nasiŭ, navat u «chutkaj» na katałcy lažaŭ ź im. Kab źniać, pavieźli adrazu nie ŭ špital, a da ratavalnikaŭ. Hidraŭličnymi nažnicami pierakusili kajdanki, a paśla baŭharkaj adrezali sam «branzalet».

U lakarni pacyjenta abśledavali, zrabili kardyjahramu. Skazali, što ŭsio ŭ paradku, chiba krychu padvyšanaja temperatura. Tudy ž pryjšli supracoŭniki rudnika, padtrymali, za što Jury Korzun usim vielmi ŭdziačny.

«Naturalna, uvieś čas pobač było kiraŭnictva — i ŭ špitali, i kali mianie viarnuli nazad. Prasačyli, kab ja schadziŭ u dušavuju i zdaŭ specadzieńnie, zatym vyvieli na prachadnuju. Ciapier moj propusk zablakavany. Choć nichto mianie nie zvalniaŭ, niama nijakich zahadaŭ, ale trapić na terytoryju svajho pradpryjemstva ja ŭžo nie mahu. Što heta takoje, ja nia viedaju. Ale jašče ŭ lakarni patrabavali zaklučeńnia psychijatra. Bałazie tam skazali, što ja absalutna zdarovy», — adznačaje Jury Korzun.

Na pytańnie pra dalejšyja plany adkazaŭ, što ad 11 vieraśnia dałučajecca da strajku rabočych «Biełaruśkaliju» i praciahnie adstojvać svaje raniejšyja patrabavańni. A ci nie aścierahajecca pieraśledu, pad jaki ŭžo trapili najbolš aktyŭnyja zavadatary strajkamu?

«Dumaju, pieraśled niepaźbiežny, ale čaho bajacca? Nieŭzabavie ŭžo kožny biełarus adsiedzić svaje sutki. Da taho ž ja ničoha nie parušaŭ, kab mianie pryciahvać da kryminalnaj adkaznaści. Zhodny, što mieła miesca parušeńnie pracoŭnaj dyscypliny. Ale maksymalnaje pry hetym pakarańnie — pazbaŭleńnie premii. Zvolnić nia majuć prava. Za strajk — tak, całkam mahčyma. U takim vypadku budziem zmahacca, padavać u sud», — nia tracić vytrymki surazmoŭca.

«Pra akcyju nikoha nie papiaredžvaŭ, bo paŭsiul pamočniki siłavych strukturaŭ»

Jury Korzun nikoha nie papiaredžvaŭ pra akcyju, bo, pavodle jaho, paŭsiul jość ludzi, jakija supracoŭničajuć ź siłavymi strukturami. U inšym vypadku jaho ŭžo ź viečara prosta nie puścili b na pracu. Nia viedała navat žonka, dadaje jon. Uziaŭ kajdanki, jakija nabyŭ u internet-kramie, i pajechaŭ. Adzinaje, što z zatrymkaj času publikacyi padrychtavaŭ post «UKantakcie». Takim čynam, pra jahonyja plany daviedalisia, kali jon užo byŭ u zaboi.

«Majoj metaj było, kab rabočyja, inžynerna-techničnyja rabotniki zrazumieli: u krainie treba adnaŭlać prava, zakonnaść. Ciapier u nas pravavy defołt, zakony nie pracujuć. Heta samaje strašnaje. Pračynajemsia, idziom na pracu, i nichto nia viedaje, što zdarycca, kali budzieš pozna ŭviečary viartacca dadomu. Chto zaŭhodna moža zatrymać, schapić, aryštavać nieviadoma za što. Znoŭ ža, našy dzieci. Majoj dačce chutka 15 hadoŭ, ja čytaju, što pa ŭsioj krainie bjuć padletkaŭ, dzieści jany navat źnikajuć. Chaciełasia b, kab kalehi taksama adreahavali, a ŭłada pačuła i viarnuła pravavoje pole. I tady šlacham dyjalohu budzie pryniataje rašeńnie na vychad z kryzisu».

Raniej administracyja «Biełaruśkaliju» prakamentavała sytuacyju ź Juryjem Korzunam. Zhodna z tłumačeńniem, paśla zakančeńnia pracoŭnaj źmieny ŭ 6:15 harniak admoviŭsia pakinuć pracoŭnaje miesca. A pakolki nazvanyja dziejańni parušali patrabavańni achovy pracy, hornaratavalniki vyvieli rabotnika z šachty. Nadzvyčajnaje zdareńnie nie paŭpłyvała na vytvorčy praces, adznačyła kiraŭnictva pradpryjemstva.

• 0
• 0
• 0
• 0
• 0
• 0
• 0
• 0