Nieśli pryntary, papieru. Smarhoncy padtrymali pradprymalnika Ułana, u jakoha kanfiskavali techniku pa spravie ab paklopie
Fota z fejsbuka
Smarhoniec Ramuald Ułan — pryvatny pradprymalnik, jaki akazvaje pasłuhi druku. Taksama jon były vydaviec i zasnavalnik «Novaj haziety Smarhoni» (1996-2005). U ramkach kryminalnaj spravy pa artykule 188 KK (Paklop) 26 vieraśnia ŭ jaho doma i ŭ ofisie prajšli pieratrusy, kanfiskavali nieabchodnuju dla pracy arhtechniku, telefony. Adnak nieabyjakavyja smarhoncy dapamahli svajmu pradprymalniku, piša «Rehijalnalnaja hazieta».
— Tak, u horadzie źjavilisia ŭlotki. U ich — infarmacyja pra niekalkich smarhonskich milicyjanieraŭ i adnaho čynoŭnika. Ja ŭbačyŭ ulotki ŭ niekalkich miescach horada, sfatahrafavaŭ ich i raźmiaściŭ u haradskim pabliku «UKantakcie». Ciapier mianie abvinavačvajuć u apublikavańni niepraŭdzivych źviestak.
A jašče padazrajuć, što nibyta na abstalavańni Ułana drukavali tyja samyja ŭlotki.
— Ja adrazu zajaviŭ śledčamu, što ŭlotki drukavalisia nie na maim abstalavańni, na palihrafie heta možna paćvierdzić. Mianie nie pasłuchali. 26 vieraśnia kanfiskavali ŭsiu techniku na pracy, u tym liku kalarovyja pryntary, sistemnyja błoki. I jašče doma — telefony, płanšet, pryntar.
U rospačy, pazbaŭleny techniki, na jakoj jon zarablaje hrošy, pradprymalnik viečaram u subotu źviarnuŭsia da smarhoncaŭ, kab dapamahli z arhtechnikaj, dali pakarystacca na niekatory čas.
— Byŭ vielmi pryjemna ździŭleny, što ludzi adhuknulisia na maju prośbu. Da paniadziełka ŭžo było 90% techniki dla pracy. Smarhoncy pryvozili, prynosili pryntary, sistemnyja błoki. Dva čałavieki navat prapanoŭvali pieraličyć hrošy na kartku. Dla pradprymalnika, jaki pryvyk hrošy zarablać, heta było niazvykła. Ja, viadoma, admoviŭsia.
Vielmi ŭdziačny svaim smarhoncam za takuju padtrymku.
Surazmoŭca dadaje, što mnohija klijenty spačuvajuć jamu. Niekatoryja bačyli, jak u subotu ŭ ofisie adbyvaŭsia pieratrus i kanfiskacyja.
Da siońnia ludzi prynosiać u ofis pački ofisnaj papiery, niešta zamaŭlajuć, kuplajuć, kab padtrymać Ramualda Ułana.
Pa jaho słovach, dziakujučy dapamozie smarhoncaŭ, u pieršy dzień pracy paśla vobšuku, dachod byŭ amal taki, jak i ŭ astatnija dni. Nu moža, krychu mienšy.
Vylecieła ŭ nieviadomym kirunku śpikierka KR Anžalika Mielnikava30
Kamientary