Pryčynaj spynieńnia pieršaha enierhabłoka Biełaruskaj AES 8 listapada, pavodle papiarednich źviestak, stała pałomka elektratechničnaha abstalavańnia zamiežnaj zborki, paśla zamieny transfarmataraŭ błok moža adnavić padaču elektraenierhii na nastupnym tydni, paviedamiŭ haziecie «Kommiersant'» vice-prezident «Atambudeksparta», kiraŭnik prajekta budaŭnictva BiełAES Vital Palanin.
«Adrazu skažu, što situacyja nie krytyčnaja, a absalutna rabočaja dla hetaha etapu ŭvodu błoka ŭ ekspłuatacyju. Papiarednie było vyjaŭlena, što z ładu vyjšli transfarmatary napružańnia z vymiaralnaj schiemy abarony błokavaha transfarmatara ŭ vyniku ŭnutranaha karotkaha zamykańnia. Abstalavańnie heta italjanskaj vytvorčaści, ciapier my mianiajem transfarmatary na rasijskija z zapasaŭ kancerna «Rosenierhaatam», — rastłumačyŭ Palanin.
«Idziom zhodna z płanam: upeŭnieny, što ŭ najbližejšyja dni skončym ŭsiu pracu, u tym liku mantaž i nieabchodnyja vyprabavańni. Uklučyć błok u sietku płanujem u pačatku nastupnaha tydnia», — zajaviŭ Palanin. Jon vykazaŭ upeŭnienaść, što ŭ pieršym kvartale 2021 hoda błok budzie pieradadzieny biełaruskim kaleham.
Taksama Palanin adznačyŭ, što spynieńnie pieršaha błoka źviazana tolki sa spynieńniem vypracoŭki elektraenierhii, a «da jadziernaj i radyjacyjnaj biaśpieki hety incydent nie maje nijakaha dačynieńnia». «Radyjacyjny fon na placoŭcy ŭ normie, pa mižnarodnaj škale MAHATE hety incydent maje nulavy ŭzrovień», — dadaŭ jon.
Budaŭnictva BiełAES viadziecca pa typavym rasijskim prajekcie novaha pakaleńnia «try plus» AES-2006. BiełAES budzie składacca z dvuch enierhabłokaŭ mahutnaściu 1200 MVt kožny. Hienpadradčykam vystupaje «Atambudekspart» (uvachodzić u «Rasatam»). 3 listapada pieršy enierhabłok BiełAES byŭ uklučany ŭ abjadnanuju enierhasistemu krainy, a 7 listapada byŭ vyviedzieny na mahutnaść 400 MVt. Uvod u pramysłovuju ekspłuatacyju pieršaha enierhabłoka BiełAES zapłanavany na pačatak 2021 hoda.
Što zapisana aficyjnaj pryčynaj śmierci adzinaha syna Jarmošynaj?9
Kamientary