17 maja projdzie pieršy tur prezidenckich vybaraŭ u Litvie. Favaryt - kamisar pa finansach ES i ŭładalnica čornaha pojasa pa karate Dala Hrybaŭskajte.
17 maja projdzie pieršy tur prezidenckich vybaraŭ u Litvie. Favaryt - kamisar pa finansach ES i ŭładalnica čornaha pojasa pa karate Dala Hrybaŭskajte.
Pieršaha turu moža chapić dla abrańnia prezidenta. Choć Centravybarkam Litvy zarehistravaŭ siem kandydataŭ, siarod jakich try žančyny, jość jaŭny favaryt — jeŭrakamisar Dala Hrybaŭskajte. Apytańni hramadskaje dumki dajuć joj 53% hałasoŭ u pieršym tury.
Jana naradziłasia 1 sakavika 1956 hodu ŭ Vilni. Vučyłasia na viačernim adździaleńni ekanamičnaha fakultetu Leninhradskaha ŭniviersitetu. Skončyła VNU ŭ 1983 h. Padčas vučoby adnačasova pracavała na futravaj fabrycy «Rot‑Front». Paśla vykładała palitekanomiju ŭ Vilenskaj vyšejšaj partyjnaj škole. U 1991 h. navučałasia pa prahramie dla kiraŭnikoŭ u Instytucie mižnarodnych ekanamičnych znosinaŭ Džordžtaŭnskaha ŭniviersitetu (ZŠA).
Ad razvału Savieckaha Sajuzu i pačaŭsia palityčny ŭźlot Hrybaŭskajte. Jana ŭznačalvała jeŭrapiejski departamient ministerstva mižnarodnych ekanamičnych adnosinaŭ, potym — anałahičnaje viedamstva ŭ MZS, była pasłom Litvy pry Jeŭrasajuzie, paŭnamocnym ministram u pasolstvie Litvy ŭ ZŠA, uznačalvała Minfin va ŭradzie Brazaŭskasa.
Paśla stała kamisaram, adkaznym za finansavaje płanavańnie i biudžet u Jeŭrakamisii. Na hetaj pasadzie da Dali Hrybaŭskajte pryjšła papularnaść.
Jaje nazyvali litoŭskaj «žaleznaj ledzi». Jana rezka krytykavała ekanamičnuju palityku ŭradu, za što navat nieadnarazova abvinavačvałasia ŭ palitykanstvie.
Kali Hrybaŭskajte dała zhodu ŭdzielničać u prezidenckich vybarach, intryha pamierła amal adrazu ž — takaja jaje papularnaść. Litoŭcy źviazvajuć z prychodam da ŭłady hetaj enierhičnaj žančyny nadziei na vychad z ekanamičnych ciažkaściaŭ. Časam jaje nazyvajuć «litoŭskim Barakam Abamam», što taksama šmat ab čym havoryć.
Dala Hrybaŭskajte, aproč litoŭskaj, vałodaje anhlijskaj, polskaj, francuzskaj i rasijskaj movami. Nie zamužam.
U vypadku pieramohi Dala Hrybaŭskajte stanie čaćviortym prezidentam Litvy ad 1991 h. A taksama druhoj žančynaj‑prezidentkaj na postsavieckaj terytoryi. Pieršaj u Łatvii była Vajra Vikie‑Frejbierhie.
Kamientary