«Hramadska-palityčny kryzis nie pradviaščaje nam ščaślivaj budučyni»: zvarot katalickich biskupaŭ

Katalickija biskupy Biełarusi apublikavali zvarot «da katolikaŭ i ŭsich ludziej dobraj voli ŭ suviazi z pahłybleńniem hramadska-palityčnaha kryzisu ŭ krainie», paviedamlaje catholic.by.

«Naša baćkaŭščyna Biełaruś užo čaćviorty miesiac znachodzicca ŭ niabačanym dahetul hramadska-palityčnym kryzisie, jaki, na žal, pahłyblajecca. Nasille nie spyniajecca, nadalej pralivajecca kroŭ, hramadstva padzielena. Heta nie pradviaščaje nam ščaślivaj budučyni, bo, jak kazaŭ Chrystus, dom, padzieleny sam u sabie, nie vystaić (par. Mc 12, 25).

Ciažka pavieryć, što takoje adbyvajecca ŭ našaj miralubnaj krainie, viadomaj svajoj talerantnaściu i zhodaj pamiž ludźmi roznych vieravyznańniaŭ i nacyjanalnaściaŭ.

Katalicki Kaścioł, kirujučysia Jevanhiellem i pabudavanym na im sacyjalnym vučeńniem, vykazvajecca suprać nasilla, biezzakońnia, niespraviadlivaści i niapraŭdy i asudžaje ich. Kaścioł zaklikaje da mirnaha vyrašeńnia ŭźnikłych prablem šlacham dyjałohu ŭ duchu lubovi da Boha i bližniaha, z zachavańniem Božych i čałaviečych zakonaŭ.

My, katalickija biskupy Biełarusi, dałučajemsia da zvarotu Papy Franciška, skiravanaha im paśla malitvy «Anioł Panski» 13 vieraśnia 2020 h. da dziaržaŭnych uładaŭ. U im Pantyfik zaklikaŭ prysłuchacca da hołasu suhramadzianaŭ i pajści nasustrač ich zakonnym imknieńniam, zabiaśpiečvajučy poŭnuju pavahu da pravoŭ čałavieka i hramadzianskaj svabody.

Pry hetym my chočam padkreślić, što hałoŭnaja meta Kaścioła — abviaščać Jevanhielle dziela pabudovy Božaha Vaładarstva, jakoje nie kirujecca pryncypami hetaha śvietu i nie pretenduje na ziamnuju ŭładu. Tamu Kaścioł nie vykonvaje dziaržaŭnych funkcyj i nie moža nikim vykarystoŭvacca ŭ palityčnych metach.

U hety losavyznačalny čas historyi našaj baćkaŭščyny, jak navučaŭ śviaty apostał Pavieł, my pavinny nieści ciažar adzin adnaho (par. Hał 6, 2), akazvać uzajemnuju padtrymku i salidarnaść dziela budavańnia zhurtavanaj, a nie padzielenaj Biełarusi.

Źviartajemsia da katolikaŭ i ŭsich ludziej dobraj voli z zaklikam praciahvać uznosić svaje malitvy ŭ intencyi chutkaha i mirnaha vyrašeńnia kryzisu, bo błahasłaŭlonyja miratvorcy i tyja, chto imkniecca da spraviadlivaści, jak kaža Chrystus. Niachaj dabro pieramoža zło», — havorycca ŭ zvarocie.

• 0
• 0
• 0
• 0
• 0
• 0
• 0
• 0