U Łondanie ŭvodziać najvyšejšy ŭzrovień karancinu. I ŭ Šatłandyi i Uelsie taksama
Premjer-ministr Vialikabrytanii Borys Džonsan na pres-kanfierencyi ŭ subotu abviaściŭ, što ŭ Łondanie i na paŭdniovym uschodzie Anhlii z apoŭnačy niadzieli ŭvodzicca novy, čaćviorty ŭzrovień abmiežavańniaŭ u suviazi sa źjaŭleńniem novaha štamu karanavirusa, piša Bi-bi-si.
Nieŭzabavie paśla premjera Brytanii ab uviadzieńni žorstkich karancinnych mier abviaścili kiraŭniki ŭradaŭ Uelsa i Šatłandyi. Ujezd i vyjezd z Šatłandyi, dzie kolkaść vypadkaŭ zaražeńnia novym varyjantam virusa dasiahnuła 17, na Kalady zabaronienyja.
Va Uelsie admianiajucca kaladnyja ŭračystaści, na ŭsioj jaho terytoryi ŭvodzicca łakdaŭn, zajaviŭ pieršy ministr Mark Drejkford paśla narady z ekśpiertami ab raźvićci situacyi z novym varyjantam karanavirusa.
Novy štam karanavirusa viadomy jak VUI-202012/01. Pa słovach Borysa Džonsana, jon moža być našmat niebiaśpiečniejšy za viadomy navukoŭcam varyjant.
«Jon moža być na 70% bolš zarazny, čym stary varyjant», — skazaŭ premjer, dadaŭšy, što heta papiaredniaja infarmacyja, i novy varyjant virusa jašče daśledujecca.
Takim čynam, admianiajucca ŭsie pasłableńni, jakija ŭłady abiacali brytancam na Kalady, ludziej prosiać jak maha bolš času pravodzić doma, začyniajucca ŭsie kramy, akramia nieabchodnych, cyrulni i spartkłuby.
Mieć kantakty žycharam roznych chatnich haspadarak možna budzie tolki adzin na adzin i na vulicy.
«Ja viedaju, ź jakimi emocyjami ludzi staviacca da hetaha času hoda. […] Ja viedaju, jakim heta budzie rasčaravańniem», — adznačyŭ premjer.
Čaćviorty ŭzrovień abmiežavańniaŭ pakul uvodzicca na dva tydni, da 30 śniežnia.
Ciapier čytajuć
U Minsku pamior adzin z samych viadomych zabojcaŭ Rasii. Jon žyŭ pad čužym imieniem i staŭ piśmieńnikam-fantastam5
Kamientary