U Minsku pamior adzin z samych viadomych zabojcaŭ Rasii. Jon žyŭ pad čužym imieniem i staŭ piśmieńnikam-fantastam
Siamiona Jermalinskaha — udzielnika jekaciarynburhskaj bandy, jakaja zabiła nie mienš za 16 čałaviek — Interpał šukaŭ pa ŭsim śviecie. A zabojca žyŭ u Minsku pad čužym imiem, pravodziŭ strymy i pisaŭ fentezi.
U pačatku 2010‑ch hadoŭ u rasijskim Jekaciarynburhu dziejničała žorstkaja złačynnaja hrupoŭka, jakaja napadała na vypadkovych ludziej pasiarod nočy. Achviar rabavali, paśla čaho zabivali. Dla raspraŭ vykarystoŭvali nažy, pistalety i navat małatki. Banda zabiła nie mienš za 16 čałaviek, raskazvaje «Kamsamolskaja praŭda».
Kali palicyja zmahła złavić niekatorych udzielnikaŭ, to vyśvietliłasia, što jany daloka nie marhinały. Lidar bandy Vasil Fiedarovič byŭ jurystam. Jahony baćka pracavaŭ namieśnikam prakurora Čyhunačnaha rajona Jekaciarynburha, maci była prafiesaram Uralskaj kansiervatoryi, a dzied — hałoŭnym dyryžoram simfaničnaha arkiestra Śviardłoŭskaj fiłarmonii.
Inšy člen hrupoŭki — Daniił Patašnikaŭ byŭ biznesmienam i synam top-mieniedžara viadomaj dziaržaŭnaj kampanii.
Hieroj rasśledavańnia Siamion Jermalinski vučyŭsia u Pieciarburhu na avijapryborabudaŭnika, a taksama zajmaŭsia handlem bajavych nažoŭ. Jaho baćka — viadomy šachmatyst Alaksiej Jermalinski, jaki emihravaŭ u ZŠA, kali synu było tolki dva hady. Tam jon staŭ čempijonam krainy i pryzioram šachmatnaj alimpijady. Na piku jon zajmaŭ 21‑ie miesca ŭ suśvietnym rejtynhu.
Siarod udzielnikaŭ bandy taksama byli palicejski, buchhałtar i syn vysokapastaŭlenaha supracoŭnika administracyi Śviardłoŭskaj vobłaści.
Jak adznačajuć aŭtary rasśledavańnia, členy bandy viali błohi i apisvali ŭ internecie sceny hvałtu, vydajučy ich za litaraturnuju fantaziju. Paźniej śledčyja pryjšli da vysnovy, što mnohija z hetych tekstaŭ faktyčna pierakazvali sapraŭdnyja złačynstvy.
Jermalinski, pavodle rasśledavańnia, publikavaŭ nie tolki apisańni zabojstvaŭ, ale i fatahrafii katavańniaŭ achviar. U adnym z tekstaŭ jon padrabiazna raspaviadaŭ, jak niekalki čałaviek za ličanyja siekundy nanieśli čałavieku śmiarotnyja nažavyja ranieńni i źnikli na aŭtamabili z padroblenymi numarami.
Ad zabojcy da viadomaha piśmieńnika
Paśla pačatku masavych aryštaŭ u 2012 hodzie Jermalinski zmoh uciačy. Jaho abviaścili ŭ mižnarodny vyšuk. Va ŭsich rasijskich adździaleńniach palicyi byli rasklejenyja aryjenciroŭki: mužčyna 1987 hoda naradžeńnia, spartyŭnaha ciełaskładu, z tatu, jaki vałodaje taktykaj nažavoha boju i ŭmieje karystacca ahniastrelnaj zbrojaj. Moža być uzbrojeny. Śledstva ličyła jaho asabliva niebiaśpiečnym.
Pa słovach načalnika kryminalnaha vyšuku Śviardłoŭskaj vobłaści Alaksandra Mazajeva, paśla aryštu lidara bandy Jermalinski zrazumieŭ: chutka pryjduć i pa jaho. Pa infarmacyi Interpała, jakuju atrymali śledčyja, mužčyna nibyta hod pražyŭ u Ałžyry, a paźniej jaho śled prapaŭ.
U 2017 hodzie za infarmacyju pra miescaznachodžańnie Jermalinskaha abviaścili ŭznaharodu sumaj kala $17 tysiač. U toj čas žurnalisty «Kamsamolskaj praŭdy» pasprabavali samastojna vyśvietlić, dzie jon chavajecca.
Jany apytvali siabroŭ i svajakoŭ Jermalinskaha ŭ Sankt-Pieciarburhu, razmaŭlali pa videasuviazi ź jaho babulaj u amierykanskim horadzie Su-Fołs i navat naviedali kałoniju dla pažyćciova asudžanych u Mardovii, dzie adbyvaŭ pakarańnie adzin z udzielnikaŭ bandy Raman Kiryjakava. Jašče była infarmacyja, što Jermalinski nibyta ŭciok va Ukrainu, dzie vajuje suprać Rasii. Adnak nasamreč jaho treba było šukać u Biełarusi.
Jak paźniej vyśvietliłasia, kali pačalisia aryšty, Jermalinski sabraŭ sa svaich pastajannych klijentaŭ papiaredniuju apłatu za nibyta novuju partyju unikalnych bajavych nažoŭ, atrymaŭ niekalki dziasiatkaŭ tysiač dalaraŭ i pierabraŭsia ŭ Biełaruś.
U Minsku jon źniaŭ adnapakajoŭku na ŭskrainie horada i žyŭ z falšyvymi dakumientami na imia Andreja Milera. Jermalinski amal nie pakazvaŭsia na ludziach i nie publikavaŭ svaich fatahrafij. U internecie jon raskazvaŭ, što žyvie ŭ adnoj z bałtyjskich krain, cikavicca siaredniaviečnaj historyjaj i zajmajecca raspracoŭkaj kampjutarnych hulniaŭ.
Pastupova zabojca staŭ aktyŭnym udzielnikam litaraturnaj supolnaści amataraŭ fantastyki i ciomnaha fentezi. Asabliva ciesna supracoŭničaŭ ź viadomym u žanravym asiarodździ internet-časopisam Darker.
Pavodle infarmacyi vydańnia, litaraturnaja karjera Andreja Milera pačałasia ŭ 2016 hodzie. Jon drukavaŭsia ŭ roznych antałohijach i internet-prajektach, udzielničaŭ u vypusku almanacha fentezi i arhanizoŭvaŭ litaraturnyja konkursy.
Za niekalki hadoŭ Jermalinski pad psieŭdanimam Miler nadrukavaŭsia ŭ 39 zbornikach i časopisach. Niekalki antałohij ź jaho ŭdziełam byli naminavanyja na premiju «Majstry žachaŭ».
U 2020 hodzie jon zajaviŭ, što choča pierajści ad karotkaj prozy da ramanaŭ. Ale vialikija prajekty zastalisia niezavieršanymi.
Aŭtary Darker adznačali, što ŭ jaho tvorach adčuvaŭsia ŭpłyŭ Styviena Kinha, Hovarda Łaŭkrafta, Filipa Dzika, Chantera Tompsana i Ernesta Cheminhueja.
Niečakany kaniec
Nieviadoma, jak daloka mahła b zajści litaraturnaja karjera Milera-Jarmalinskaha, kab nie kavid, na jaki jon zachvareŭ užo paśla zaviaršeńnia pandemii. Źviartacca ŭ balnicu zabojca pabajaŭsia, bajučysia vykryćcia. Niekalki tydniaŭ mužčyna sprabavaŭ lačycca doma, ale stan pahoršyŭsia.
Tryvohu pieršymi zabili jaho čytačy: piśmieńnik doŭha nie źjaŭlaŭsia ŭ sietcy. Potym zaniepakoiłasia haspadynia kvatery — kvatarant pierastaŭ płacić arendu i nie adkazvaŭ na zvanki. Kali žančyna pryjšła ŭ kvateru, jana znajšła cieła i vyklikała milicyju.
Maci Jermalinskaha Valancina paźniej paćvierdziła žurnalistam, što pryčynaj śmierci stali nastupstvy kavidu. Pavodle jaje słoŭ, aficyjna była zafiksavanaja sardečnaja niedastatkovaść, ale patołahaanatam vyjaviŭ amal poŭnaje paražeńnie lohkich.
Jana taksama raspaviała, što padčas pieratrusu ŭ minskaj kvatery milicyjaniery znajšli nie tolki falšyvyja dakumienty na imia Andreja Milera, ale i sapraŭdny rasijski pašpart Siamiona Jermalinskaha. Paśla hetaha rasijskija siłaviki praviali DNK-ekśpiertyzu, jakaja paćvierdziła jaho asobu.
Maci śćviardžała, što ŭsie hetyja hady nie padtrymlivała z synam suviaź i navat nie vinšavała jaho z dniom naradžeńnia, pakolki za siamjoj pastajanna nazirali apieratyŭniki.
Pavodle jaje słoŭ, paśla śmierci piśmieńnika jaho prychilniki sabrali hrošy na pomnik, jaki ŭstalavali na mohiłkach u Sankt-Pieciarburhu.
Jak adznačajuć aŭtary, niama dakładnych źviestak pra toje, čym Jermalinski zajmaŭsia ŭ Biełarusi, akramia litaraturnaj tvorčaści. Jany nakiravali zapyt biełaruskim siłavym strukturam z prośbaj paviedamić, nakolki staranna praviarałasia jaho dziejnaść u Minsku.
Paśla śmierci Jermalinskaha Śledčy kamitet Rasii spyniŭ jaho kryminalny pieraśled «pavodle niereabilitacyjnych abstavin u suviazi sa śmierciu».
Kamientary