Abarona Babaryki prosić razhladać spravu ŭ nižejšym sudzie, bo prysud Viarchoŭnaha suda nielha abskardzić
Advakaty Viktara Babaryki źviarnulisia ŭ Viarchoŭny sud z zajavaj, u jakoj prosiać nakiravać spravu dla razhladu ŭ sud nižejšaj instancyi, kab była mahčymaść abskardzić prysud.
Pra heta Tut.by paviedamili advakaty eks-pretendenta ŭ prezidenty Dźmitryj Łajeŭski i Natalla Mackievič.
Ciapier sprava Viktara Babaryki znachodzicca ŭ Viarchoŭnym sudzie, kudy jana była pieradadzienaja z Hienieralnaj prakuratury. Na hetaj stadyi Viarchoŭny sud pavinien vyznačyć, u jakim sudzie budzie słuchacca sprava.
— Razhlad spraŭ takoj katehoryi zhodna z Kryminalna-pracesualnym kodeksam mahčymy ŭ lubym ź nižejšych sudoŭ: jak u rajonnym, tak i ŭ Minskim haradskim. Kali ž Viarchoŭny sud pa svajoj inicyjatyvie prymie kryminalnuju spravu da svajoj vytvorčaści, to ŭ takim vypadku Viktar Babaryka budzie pazbaŭleny prava na apielacyjnaje abskardžańnie prysudu, pakolki zhodna z KPK prysudy Viarchoŭnaha suda nie padlahajuć abskardžańniu ŭ apielacyjnym paradku, — tłumačać advakaty.
Kab praduchilić parušeńnie prava Viktara Babaryki na abskardžańnie prysudu, jaho abaroncy źviarnulisia ŭ Viarchoŭny sud z zajavaj, u jakoj prosiać nakiravać spravu dla razhladu ŭ sud nižejšaj instancyi.
— Prava abvinavačanaha abskardzić prysud praduhledžana artykułam 43 KPK. Heta prava — adna z bazavych harantyj spraviadlivaha sudovaha razboru, ustanoŭlena Mižnarodnym paktam ab hramadzianskich i palityčnych pravach (punkt 5 artykuła 14). Respublika Biełaruś źjaŭlajecca dziaržavaj-udzielnicaj Pakta i abaviazanaja dobrasumlenna vykonvać hety mižnarodny dahavor. Takim čynam, vykanańnie hetaha standartu spraviadlivaha suda mahčyma, tolki kali sprava Viktara Babaryki budzie słuchacca pa pieršaj instancyi ŭ adnym ź nižejstajačych sudoŭ. Heta dazvolić Viktaru Babaryku ŭ vypadku niazhody z prysudam abskardzić jaho ŭ apielacyjnym paradku, — zajaŭlajuć advakaty.
Kamientary