U niadzielu zatrymlivali 13-hadovaha akciora, jaki hraŭ u filmie maładoha Kupału
U niadzielu, 31 studzienia, siarod zatrymanych akazaŭsia 13-hadovy Cimur Niedźviedź. Heta akcior, jaki ŭ filmie «Kupała» hraŭ Janku Kupału ŭ maładości.
Pra toje, što adbyłosia, «Našaj Nivie» raskazaŭ baćka, režysior Pavieł Niedźviedź, jaki byŭ z synam u toj dzień.
«My sustrelisia ź Cimuram u abied na Kastryčnickaj. Jon chodzić pa niadzielach zdymacca ŭ Kryžanoŭskaha, užo na praciahu dvuch hadoŭ. Paśla zaniatkaŭ zajšli pa hamburhier i źbiralisia na vakzał — syn žyvie z mamaj u Zasłaŭi, treba było pasadzić na elektryčku.
Pa darozie ja sustreŭ znajomuju, razhavarylisia. I raptam spyniajecca bus, vychodziać dužyja chłopcy ŭ čornym i chapajuć hetu žančynu. Uziali paśla małoha: maŭlaŭ, jon taksama pajedzie z nami. Kažu: ja nie addam syna, jon niepaŭnahadovy. «A, zrazumieła, vy taksama prachodźcie u bus», — apisvaje Pavieł padziei.
Unutry zatrymanych zapisali na kamieru. «Heta videavizitka», — žartavaŭ baćka z synam. Ich doŭha katali pa horadzie.
«Pa racyi ŭ supracoŭnikaŭ, jakija jeździli z nami, spytali, jakaja ŭ ich zahruzka, i skazali brać hrupu na praśpiekcie. «Kolki čałaviek brać?» — «Kolki voźmiecie», — pryvodzić dyjałoh Pavieł.
Tak u busie akazałasia ekskursijnaja hrupa. Paźniej usich zavieźli ŭ Frunzienskaje RUUS.
Baćku vyklikali pieršym. Apytali, što zdaryłasia, zapisali jaho słovy ŭ pratakoł. Paśla abšukali, zabrali šnurki, pierapisali rečy. Na hutarku jaho vyklikali niekalki razoŭ roznyja supracoŭniki. Zahadali razbłakavać telefon, korpalisia ŭ pierapiskach (začapilisia za siabroŭ ź bieł-čyrvona-biełymi stužkami ŭ kantaktach), dapytvali, što jamu nie padabajecca ŭ hetaj krainie.
«Adzin z supracoŭnikaŭ kazaŭ: «My šukajem aktyvistaŭ, usich, chto niezadavoleny ŭładaj. Kali vy viedajecie takich ludziej, možacie paviedamić nam». Ja admoviŭsia».
Apytvać syna Pavieł nie dazvalaŭ, ale kali viarnuŭsia da jaho, ubačyŭ, što ŭ Cimura praviarali telefon. Znajšli ŭ košyku fota ź letniaha marša i ź lifta, dzie visieła bieł-čyrvona-biełaja nalepka. Nahniatali abstanoŭku: «Dojdzie da taho, što syn pojdzie na barykady i ŭzarvie ciahnik».
Paśla doŭhich razmoŭ Paŭła adpuścili. A syna paviali ŭ inśpiekcyju pa spravach niepaŭnahadovych. Razam ź im užo była maci, jakuju pa telefonie paprasili pryjechać.
«Ja ŭvieś čas padbadziorvaŭ syna. Ale jon paśla hetych apytańniaŭ drenna siabie adčuvaŭ, daviali chłopca. Kali jon pryjechaŭ dadomu, adrazu loh spać. Nie viedaju, ci z hetaj nahody, ale na nastupny dzień uvieś kłas zapaŭniaŭ ankiety, dzie dzieci pisali, chto ich haduje, u jakich umovach žyvuć».
U paniadziełak a 10-j viečara da Paŭła dadomu pryjšoŭ inśpiektar pa spravach niepaŭnahadovych, skazaŭ, što chłopca pastavili na ŭlik. Ciapier vizit milicyi čakajuć u Zasłaŭskuju himnaziju.
Kamientary