Vialikuju rolu ŭ pandemii kavidu adyhrali masavyja mierapryjemstvy, padčas jakich adzin chvory čałaviek moh pieradać virus dziasiatkam ci navat sotniam zdarovych. Siamiejnyja sustrečy, pachavańni, repietycyi choraŭ i spartyŭnyja treniroŭki — usie hetyja padziei pryvodzili da šyrokaha raspaŭsiudžvańnia niebiaśpiečnaha virusa.
Bolš za toje, praz hod paśla pačatku pandemii navukoŭcy vyśvietlili, što zaražeńni na masavych mierapryjemstvach stali adnym z asnoŭnych šlachoŭ raspaŭsiudu virusa. Jany vyličyli asnoŭnyja charaktarystyki takich padziej, što pavialičvajuć mahčymaść zaražeńnia: doŭhija mierapryjemstvy ŭ pamiaškańni z drennaj vientylacyjaj.
Aktyŭnaści nakštałt śpievaŭ ci fizičnaj nahruzki spryjajuć vyłučeńniu padčas dychańnia maleńkich kropiel ź virusnymi čaścinkami, jakija mohuć udychnuć inšyja ludzi. Tamu takija zaniatki taksama spryjajuć zaražeńniu, paviedamlaje Nature.
Pakul što navukoŭcy nie mohuć całkam patłumačyć miechanizm masavych zaražeńniaŭ. Nieviadoma, što za asnoŭnyja faktary jaho vyklikajuć, taksama niezrazumieła, jakim čynam adroźnieńni ŭ pavodzinach i ŭ fizičnym stanie ludziej upłyvajuć na ryzyku zaražeńnia. Treba znajści mahčymaść maksimalna źnizić niebiaśpieku ad masavych mierapryjemstvaŭ, ale pry hetym nie spynić hramadskaje žyćcio.
Dobraja navina ŭ tym, što, niahledziačy na ŭsie pytańni, ludzi ŭsio bolš razumiejuć pryrodu masavych zaražeńniaŭ i praz heta mohuć bolš efiektyŭna zmahacca z pandemijaj.
Adzin sa sposabaŭ heta rabić — intensiŭna adsočvać kantakty z metaj znajści i papiaredzić pra niebiaśpieku kožnaha, chto moh apynucca na padziei, jakaja vyklikała masavaje zaražeńnie. Lepš za usio, kali miery pa achovie zdaroŭja dazvolać całkam praduchilić takija ryzyki. Pa mierkavańniach ekśpiertaŭ, varta zabaranić naviedvańnie papularnych publičnych miescaŭ, što znachodziacca ŭ pamiaškańniach.
Adnak isnujuć i inšyja sposaby źnizić kolkaść zaražeńniaŭ. Naprykład, prafiesar Stenfardskaha ŭniviersiteta Jure Leskaviec padličyŭ, što asabliva niebiaśpiečnymi źjaŭlajucca restarany: jany mohuć vyklikać da 20% usich zaražeńniaŭ. Tamu ich praca patrabuje asablivych abmiežavańniaŭ, i heta bolš pravilna, čym prymusova zakryvać usie ŭstanovy takoha typu.
U Rahačovie try školnicy źbili 11-hadovaha chłopčyka, ściahnuli ź jaho trusy i imitavali seks7
Kamientary