U Polščy admianiajuć niekatoryja abmiežavańni, źviazanyja z epidemijaj karanavirusa. «Z 1 maja dazvolenaja budzie spartyŭnaja aktyŭnaść na śviežym pavietry, ale taksama ŭ zakrytych pamiaškańniach i basiejnach», — abviaściŭ premjer-ministr Matevuš Maraviecki, paviedamlaje radyjo.net.
Z 4 maja pačnuć pracavać handlovyja centry, bujnyja kramy i meblevyja kramy. Dzieci z 1-3 kłasaŭ pačatkovych škoł paśla majskich śviataŭ viernucca ŭ škoły ŭ stacyjanarnym režymie. Muziei buduć pracavać pry zachavańni sanitarnych normaŭ. Płanujecca, što ŭsie školniki viernucca da stacyjanarnaj vučoby 29 maja. Taksama ŭ hety dzień buduć adkryty, miž inšym, spartyŭnyja zały. Ale heta pakul tolki płany, usio zaležyć ad raźvićcia epidemii. Na praciahu apošnich dzion fiksavałasia mienšaja kolkaść chvorych, čym na praciahu apošnich tydniaŭ, siońnia było paviedamlena pra amal 8,9 tys. novych zachvorvańniaŭ.
«My pavinny padychodzić da admieny abmiežavańniaŭ spakojna i aściarožna. Hety płan zaležyć ad kankretnych kryteryjaŭ. Virus nie źniknie za adnu noč. My pavinny zachavać mahčymaść chutkaha reahavańnia ŭ vypadku rostu kolkaści infiekcyjaŭ», — skazaŭ premjer-ministr Matevuš Maraviecki.
Za ŭvieś čas u Polščy zafiksavana 2 młn 768 tysiač vypadkaŭ karanavirusa, heta siomaje miesca ŭ Jeŭropie. Pamierli 65 897 čałaviek. Učora było zafiksavana 5 707 vypadkaŭ karanavirusa.
Kamientary