Bienita Fierera-Valdnier spadziajecca, što jaje vizit stanie «novaj viachoj» u adnosinach Biełarusi i ES
Pra heta jana zajaviła žurnalistam 22 červienia ŭ Minsku pierad adjezdam u aeraport.
Kamisar ES pa źniešnich suviaziach Bienita Fierera-Valdnier spadziajecca na toje, što jaje vizit u Minsk i pieramovy ź biełaruskim kiraŭnictvam stanuć «novaj viachoj» u raźvićci adnosin Biełarusi i Jeŭrasajuza. Pra heta jana zajaviła žurnalistam 22 červienia ŭ Minsku pierad adjezdam u aeraport.
Jeŭrakamisar padkreśliła, što ES čakaje ad Biełarusi praciahu prahresu ŭ piaci asnoŭnych halinach (reforma vybarčaha zakanadaŭstva; zabieśpiačeńnie svabody abjadnańniaŭ; stvareńnie ŭmoŭ dla dziejnaści NDA; svaboda presy; źniaćcie abmiežavańniaŭ dla svabody asoby. — BiełaPAN.).
Pavodle jaje słoŭ, u śniežni 2009 hoda
ministry krain ES razhledziać pytańnie ab prypynieńni sankcyj. Fierera-Valdnier vykazała ŭpeŭnienaść u tym, što da hetaha času Minsk praciahnie reformy.
Svoj vizit jana ličyć «histaryčnym», pakolki jon staŭ pieršym vizitam kamisara ES u Biełaruś za apošnija 15 hadoŭ. Fierera-Valdnier adznačyła patencyjał, što isnuje dla raźvićcia dvuchbakovych adnosin na asnovie ahulnych jeŭrapiejskich kaštoŭnaściaŭ «pry ŭmovie, što Biełaruś praciahnie ruch u kirunku demakratyi».
Pieramovy z prezidentam Alaksandram Łukašenkam, jakija doŭžylisia dźvie z pałovaj hadziny, Fierera-Valdnier acharaktaryzavała jak «surjoznyja», paviedamiŭšy, što na ich byli abmierkavanyja «ŭsie pytańni, usie detali» dvuchbakovaha supracoŭnictva.
«Heta vielmi dobry start», — padkreśliła jeŭrakamisar.
Jana paviedamiła, što padčas sustrečy zaklikała biełaruskija ŭłady «skarystacca mahčymaściu, praciahvać reformy ŭ piaci klučavych halinach». Palityk taksama raskazała pra pieravahi ŭmacavańnia suviaziaŭ ź ES. Tak, pavodle jaje słoŭ, Biełaruś u pierśpiektyvie moža pašyryć ekanamičnaje supracoŭnictva, zaklučyć pahadnieńnie ab svabodnym handli i ablahčeńni vizavaha režymu.
«Prezident uvažliva słuchaŭ mianie, a ja — jaho punkt hledžańnia», — skazała Fierera-Valdnier.
Ź ministram zamiežnych spraŭ Biełarusi Siarhiejem Martynavym jana abmierkavała ŭzajemadziejańnie ŭ ramkach šmatbakovaj płatformy palityki «Uschodniaje partniorstva» ŭ čatyroch asnoŭnych śfierach hetaj inicyjatyvy» (enierhietyka; ekanomika; demakratyja i pravy čałavieka; kantakty pamiž ludźmi. — BiełaPAN.), a taksama mahčymy ŭdzieł krainy «ŭ fłahmanskich prajektach».
Baki taksama abmierkavali mahčymaści mikrakredytavańnia Biełarusi z boku Jeŭrapiejskaha banka rekanstrukcyi i raźvićcia i Jeŭrapiejskaha inviestycyjnaha banka.
Na pieramovach u MZS baki taksama abmianialisia tekstam miemaranduma ab supracoŭnictvie ŭ halinie enierhietyki, paviedamiła jeŭrakamisar. Heta ramačnaje pahadnieńnie dla realizacyi enierhietyčnych prajektaŭ, u pryvatnaści jano tyčycca adnaŭlalnaj enierhii i enierhaefiektyŭnaści.
Akramia taho, Fierera-Valdnier abviaściła pra rašeńnie Jeŭrakamisii vydzielić Biełarusi 10 młn. jeŭra sa svajho biudžetu na prajekty pavyšeńnia jakaści biełaruskaj pradukcyi.
Heta, pavodle jaje słoŭ, dazvolić Biełarusi pryvieści svaje standarty ŭ zhadanaj śfiery ŭ adpaviednaść ź jeŭrapiejskimi i pavialičyć ekspart tavaraŭ u krainy ES.
Jeŭrakamisar zajaviła, što jašče «zanadta rana» havaryć pra padpisańnie pahadnieńnia ab ablahčeńni vizavaha režymu dla biełaruskich hramadzian, a taksama adnaŭlać pieramovy pa Pahadnieńni ab partniorstvie i supracoŭnictvie. Pakolki pakul niama «nieabchodnaha prahresu ŭ halinie reformaŭ», patłumačyła Fierera-Valdnier.
Prapahandysty zapeŭnivajuć, što 196 palitviaźniaŭ užo na svabodzie8
Kamientary