U Tut.by, da žurnalistaŭ i dachaty da Maryny Zołatavaj pryjšli siłaviki. Sajt zabłakavany

Heta rabotniki Departamienta finansavych rasśledavańniaŭ.

Siłaviki pryjšli da niekalkich čałaviek, u tym liku da hałoŭnaha redaktara Maryny Zołatavaj. Akramia taho, nie adkazvajuć na zvanki supracoŭniki redakcyi, jakija byli ŭ ofisie.

DFR pryjšoŭ i ŭ rehijanalnyja ofisy partała. 

Siłaviki taksama ŭ ofisie Av.bu, samaha papularnaha aŭtamabilnaha sajta Biełarusi. Niekalki hadoŭ tamu da hetaj placoŭki dałučyŭsia aŭtamabilny servis A.Tut.by.

Siońnia ranicaj supracoŭniki DFR pryjšli ź pieratrusam da redaktaraŭ Tut.by Hanny Rudenka i Volzie Saŭkiŭ, ciapier jany na voli. Pieratrus skončyŭsia bližej da abiedu. U ich kanfiskavali ŭsiu techniku (kampjutary, telefony, u tym liku niepracujučyja), a taksama bankaŭskija karty. Pieratrus prachodziŭ u ramkach kryminalnaj spravy ŭ dačynieńni da hiendyrektara i hałoŭnaha buchhałtara kampanii.

Pracesualnaha statusu ŭ redaktaraŭ niama. Apieratyŭniki rastłumačyli, što pryjšli da supracoŭnikaŭ Tut.by, bo ŭ ich doma mohuć znachodzicca dokazy pa spravie. U nastupnym, kažuć supracoŭniki DFR, redaktaraŭ mohuć vyklikać na dopyt.

13:00

Usio jašče praciahvajecca pieratrus u žurnalista Tut.by Aleny Tałkačovaj (da jaje ŭ kvateru zmahła trapić advakat), hałoŭnaha redaktara Maryny Zołatavaj (joj vyłamali dźviery ŭ tambury) i namieśnika hałoŭnaha redaktara Maksima Hajko.

14:39

U Breście da cupracoŭnikaŭ Tut.by pryjšli kala 10.40 ranicy z pastanovaj na pieratrus pa artykule ab uchileńni ad vypłaty padatkaŭ.

Apieratyŭniki z DFR pracavali kala hadziny, kanfiskavali ŭsiu techniku i dakumienty, a taksama mabilnyja telefony supracoŭnikaŭ. Zatrymańniaŭ nie było.

U homielski ofis pryjšli ŭ 10.15 ranicy, šeść čałaviek u cyvilnym pradstavilisia supracoŭnikami DFR. Pieratrus pravodzili staranna, zabrali ŭsiu techniku i mabilnyja telefony. Zaviaršyŭsia pieratrus prykładna ŭ 13.30.

Taksama apieratyŭniki pracavali ŭ ofisach Viciebska, Mahilova i Hrodna, infarmacyja ŭdakładniajecca.

15:14

Siłaviki vyjšli z kvatery hałoŭnaha redaktara Tut.by Maryny Zołatavaj.

Jany vynieśli techniku. Jaje samu vyvieli praz «čorny vychad» i źvieźli. Maryna paśpieła kryknuć, što jana, dyrektar TAA «Tut baj miedyja» Ludmiła Čekina i hałoŭny buchhałtar kampanii Anžeła Asad mohuć prachodzić pa artykule 243 KK. Artykuł 243 KK praduhledžvaje ŭchileńnie ad padatkaŭ.

Raniej stała viadoma, što na dopyt u DFR pavieźli žurnalista Tut.by Alenu Tałkačovu

15:29

Zatrymanaja taksama supracoŭnica TUT.BY Darji Bryl.

Siłaviki ranicaj pryjšli da jaje dadomu. U kvatery, dzie jana žyvie z susiedkami, praviali pieratrus. Zabrali techniku ŭ Darji i susiedak. Paśla hetaha siłaviki zabrali Darju z saboj.

15:32

Paśla 15.00 supracoŭnikaŭ kampanii Hoster.by stali vypuskać z kabinietaŭ u ich ofisie, dzie jany siadzieli pad nahladam siłavikoŭ.

Dyrektara kampanii Siarhieja Pavališava pavieźli. Jaho status nieviadomy.

U kampanii taksama zapeŭnili, što techničnaja słužba hoster.by pracuje ŭ štatnym režymie.

15:40

Pravaabaroncy paviedamlajuć, što na dadzieny momant udava Juryja Zisiera Julija Čarniaŭskaja znachodzicca pad kanvojem u pryjomnaj 1-j balnicy Minska. U jaje prablemy z sercam.

16:50

Jak stała viadoma pravaabaroncam, taksama pieratrus doma prachodzić u prahramista Tut.by Vitala Kalinoŭskaha. Jon nie vychodzić na suviaź.

***

U pres-słužbie Kamiteta dziaržkantrolu, kudy ŭvachodzić Departament finansavych rasśledavańniaŭ, skazali Onliner, što infarmacyja ab pryčynach prychodu siłavikoŭ u Tut.bu budzie apublikavanaja paźniej.

Praź niekalki hadzin źjaviŭsia aficyjny pres-reliz nakont siońniašnich padziej vakoł Tut.by. «Departamientam finansavych rasśledavańniaŭ KDK 18 maja ŭ dačynieńni da słužbovych asob TAA «Tut baj Miedyja» zaviedziena kryminalnaja sprava pa prykmietach składu złačynstva, praduhledžanaha č. 2 art. 243 KK (Uchileńnie ad vypłaty sum padatkaŭ, zboraŭ u asabliva bujnym pamiery)», — havorycca ŭ paviedamleńni.

«TAA «Tut baj Miedyja» ŭ 2019 hodzie atrymany status rezidenta Parku vysokich technałohij (PVT). Pavodle źviestak Departamienta finansavych rasśledavańniaŭ Tut.by była atrymanaja vyručka, nie abumoŭlenaja dziejnaściu, dazvolenaj dla rezidentaŭ PVT. Pra heta prainfarmavali dziaržaŭnuju ŭstanovu «Administracyja Parku vysokich technałohij».

Na padstavie pradastaŭlenych DFR źviestak ab dapuščanych TAA parušeńniach Naziralnaj radaj PVT 18 maja pryniata rašeńnie ab stracie TAA «Tut baj Miedyja» prava na padatkovyja lhoty, jakija pradstaŭlajucca ŭ adpaviednaści z Dekretam prezidenta ad 22 vieraśnia 2005 hoda №12 «ab Parku vysokich technałohij», — havorycca ŭ paviedamleńni.

Jak dadali ŭ KDK, u vyniku nieabhruntavanaha vykarystańnia TAA «Tut baj miedyja» dziaržaŭnaj padtrymki jak rezidenta Parku vysokich technałohij dziaržavie byŭ naniesieny ŭron u asabliva bujnym pamiery.

Orhanami finansavych rasśledavańniaŭ Kamiteta dziaržkantrolu pravodziacca nieadkładnyja śledčyja i inšyja pracesualnyja dziejańni pa ŭstanaŭleńni ŭsich akaličnaściaŭ i asob, jakija majuć dačynieńnie da supraćpraŭnaj dziejnaści.

***

Kala 11.45 sajt Tut.by staŭ błakavacca.

• 0
• 0
• 0
• 0
• 0
• 0