Biełarus Dźmitryj Šepieleŭ raskazaŭ padrabiaznaści chvaroby, lačeńnia i śmierci Žanny Fryskie
«Pakolki nam nie pakinuli inšaha vybaru, akramia jak pieražyć heta na publiku, ja staraŭsia zrabić heta hodna».
Rasijskaja śpiavačka Žanna Fryskie stała viadomaj dziakujučy hurtu «Blestiaŝije». Paśla jana zdymałasia ŭ kino, rabiła solnuju karjeru. Ź Dźmitryjem Šepielevym, jaki rodam ź Minska i pačynaŭ karjeru na BT, jany pabralisia šlubam u 2011 hodzie. A ŭ 2013-m u ich naradziŭsia syn Płaton.
Praź niekalki miesiacaŭ paśla rodaŭ Žańnie byŭ pastaŭleny dyjahnaz — hliabłastoma (nieapierabielnaja puchlina hałaŭnoha mozhu). Uvosień taho ž hoda Fryskie pierastała źjaŭlacca na publicy i raźmiaščać aktualnyja fatahrafii.
Aficyjna pra chvarobu śpiavački stała viadoma ŭ studzieni 2014 hoda, kali pra jaje raspaviała siamja Fryskie. «Pieršy kanał» pravioŭ zbor srodkaŭ na lačeńnie śpiavački.
Žanna Fryskie pamierła 15 červienia 2015 hoda. Apošnija try miesiacy jana znachodziłasia ŭ komie.
«Dla mianie heta byli samyja ciažkija dva hady ŭ maim žyćci. Ničoha horš nie adbyvałasia. Ja spyniŭ svajo žyćcio, ja spyniŭ svaju karjeru, i ja zajmaŭsia joj, ja zajmaŭsia jaje vyratavańniem. Nastupstvy hetaha ja adčuvaju da siońniašniaha dnia», —
raskazaŭ Dźmitryj Šepieleŭ u intervju jutub-kanału Nadziei Stralec, zhadvajučy historyju zmahańnia z chvarobaj Žanny Fryskie.
Televiadučy padkreślivaje, što dla jaho było važna, kab ab chvarobie Žanny nichto nie daviedaŭsia.
«Žanna była vielmi ŭraźlivaja. I mnie sapraŭdy nie chaciełasia hetym z kimści dzialicca»,
— tłumačyć Dźmitryj i zhadvaje, što prahrama «Pusť hovoriat» ź jakoj pačaŭsia zbor hrošaj na lačeńnie, vyjšła praz paŭhoda. Na toj čas jany ŭžo šmat pajeździli pa śviecie, šukajučy lačeńnia.
«Arhanizavać pieramiaščeńnie takoha publičnaha čałavieka ŭ supravadžeńni inšaha publičnaha čałavieka tak, kab pra heta nichto nie daviedaŭsia — vialikaja praca.
Ščyra kažučy, mnie chaciełasia b, kab tak i było. I hetuju publičnuju častku jaje historyi ja nie vybiraŭ. Jość i inšyja prykłady, kali siamja pieražyvaje hetuju trahiedyju ŭnutry siabie. I hety šlach zdajecca mnie składanym, važnym i słušnym. Ale pakolki nam nie pakinuli inšaha vybaru, akramia jak pieražyć heta na publiku, ja staraŭsia zrabić heta hodna», — davodzić Šepieleŭ.
Šepieleŭ dadaje, što na momant vychadu prahramy Žanna «naŭrad ci mahła ŭ poŭnaj miery acanić maštab taho, što adbyvajecca. Jana ŭsprymała heta inakš. Spadziajusia, što lahčej i praściej, čym usie my».
Dźmitryj zhadvaje, što pieršaje, što jon pačuŭ ad daktaroŭ kliniki ŭ Ńju-Jorku, kudy jany trapili ŭ studzieni 2014 hoda, było «kali b vy nie pryvieźli jaje siońnia, praź niekalki dzion jaje b nie stała».
Šepieleŭ tłumačyć, čamu dla lačeńnia byli abrany Złučanyja Štaty:
«Tyja leki, jakija mahli b niejkim čynam paŭpłyvać na jaje stan, znachodzilisia ŭ stadyi raspracoŭki. U Rasii hetyja leki nie byli dastupnyja. Tak źjavilisia Złučanyja Štaty Amieryki, tamu što tam prapanoŭvali takoha rodu [lačeńnie], heta nazyviecca trial — vyprabavańni. U Rasii takoha ŭvohule nie było».
Pa słovach Šepieleva, ekśpierymientalnaje lačeńnie mieła karotkačasovy efiekt — u Žanny pačałasia remisija. Jon vieryŭ u pośpiech i nie vieryŭ u prahnozy daktaroŭ:
«Nam, biezumoŭna, kazali ab tym, što dziejańnie lekaŭ karotkačasovaje, što heta małavierahodna budzie vyratavańniem, što nam nie treba budavać doŭhaterminovych płanaŭ. Ciapier hetyja hałasy ź minułaha ja čuju. Tady nie čuŭ. I tady, biezumoŭna, hetyja leki byli nadziejaj, vielmi mocnaj vieraj u toje, što ŭsio budzie dobra. Ja byŭ absalutna ŭpeŭnieny, što my zmožam pieramahčy. Absalutna pierakanany. My budavali płany na budučyniu. U nas ros syn».
Jak pryznajecca Dźmitryj, bližej da kanca žyćcia Žanny jon pryniaŭ fakt jaje chutkaha adychodu:
«Heta maralnaja dylema, jakaja staić pierad kožnym čałaviekam, jaki akazvajecca ŭ takoj situacyi. Realistyčnaść taho, što vašamu kachanamu čałavieku možna dapamahčy. I rana ci pozna hetaje rašeńnie treba prymać. (…) Ja pryjšoŭ da hetaha razumieńnia pad samy kaniec, kali ŭžo było zrazumieła, što ničoha zrabić sapraŭdy nielha».
Šepieleŭ zhadvaje, što ab śmierci Žanny jon daviedaŭsia na mory, dzie byŭ razam z synam. Jon tłumačyć, čamu tak atrymałasia:
«Ja advioz syna jak maha dalej, bo mnie nie chaciełasia, kab jon byŭ śviedkam jaje śmierci. Nie było sumnievaŭ u tym, što boj prajhrany. Heta pavolny praces. Heta nie adbyvajecca, jak u kino. Čałaviek vielmi marudna sychodzić. Heta prykmietna pa drobiaziach, ale heta prykmietna.
Našamu synu było ŭ toj momant dva hady. I ja ŭśviedamlaŭ, što sapraŭdy nie chaču, kab jon byŭ śviedkam usiaho hetaha. Jon zanadta mały dla hetaha. Žadaŭ źbierahčy jaho, tamu što ja razumieŭ, što ŭzrovień dramy budzie vielmi vysoki. Viedajučy jaje siamju, viedajučy ŭvahu da jaje, heta budzie niaprosta.
I mnie mienš za ŭsio chaciełasia, kab hetaja situacyja zakranuła jaho. Ja asabista pryniaŭ hetaje rašeńnie i pavinien byŭ vyvieźci jaho na mora, dzie jon pavinien byŭ pravieści leta.
My raźvitalisia z Žannaj, sieli ŭ taksi. Uviečary taho ž dnia my apynulisia na mory, a ŭnačy mnie napisali ab tym, što jaje nie stała. Mnie spatrebiłasia kala sutak dla taho, kab moj baćka paśpieŭ prylacieć tudy, dzie my znachodzilisia z Płatonam, padchapić jaho i zastacca ź im tam, a mnie viarnucca dla taho, kab raźvitacca ź joju. Heta supadzieńnie. Ale supadzieńnie, u jakim ja baču peŭny simvalizm. Pakolki adbyłosia mienavita tak, ja staŭlusia da hetaha, što jana zhodna z maim rašeńniem.
Na siońnia ja pastupiŭ by sapraŭdy hetak ža».
Šepieleŭ zhadvaje, što paśla śmierci Žanny Fryskie jon chacieŭ jak najchutčej zaniacca pracaj, kab nie dumać ab tym, što adbyłosia, jamu treba było na niešta adciahnucca:
«Mnie vielmi chaciełasia zdymacca, i praca była dla mianie na toj momant vielmi važnaja. Ale pracy ŭ toj momant nie było. Ja pamiataju, jak ja maliŭ: dajcie što-niebudź. Ale nie zdaryłasia. Nie budziem šukać vinavatych. Pracy nie było».
Jak raskazaŭ Šepiełaŭ, ciapier jon zajmajecca svaimi prajektami, u jakich vystupaje pradziusaram. Jany raźmieščana na płatformie Rutube.
«Heta byŭ vielmi važny i vielmi novy dośvied dla mianie. Ja zrazumieŭ, što ja atrymlivaju nie mienš zadavalnieńnia ad taho, što ja znachodžusia z druhoha boku kamiery», — adznačaje mužčyna.
I raskazvaje pra pośpiechi tam:
«My źniali vielmi kłasny prajekt dla telekanała «TV-3». My zdymali dla VK. (…) Plus u mianie padpisany ekskluziŭny kantrakt z telekanałam «Rasija». I apošnija 4 ci 5 hadoŭ my razam».
Kamientary