Nočču z 18 na 19 maja nieviadomyja paškodzili majomaść prychodu kafiedralnaha kaścioła Panny Maryi i jaho probašča Antonija Klimantoviča.
Pra heta Tut.by raspaviali ŭ pres-słužbie katalickaha kaścioła Biełarusi.
— A 4-j ranicy sierady (učora) nieviadomyja ludzi zaleźli na terytoryju za katedralnym kaściołam. Pavyvaročvali kvietki, złamali damafon na dźviarach parafijalnaha doma, paškodzili lichtar na hazonie i raźbili łabavoje škło ŭ mašynie probašča, — pieraličyŭ paškodžańni pres-sakratar katalickaj carkvy ŭ Biełarusi Juryj Sańko.
Ślady napadu byli i la ŭvachodu ŭ dyjacezijalny dom.
— Na žal, z našych nichto nie čuŭ, jak heta adbyvałasia, — vyklikali milicyju paźniej. Adtul pryjechali, praviali śledčyja pracedury. Pa infarmacyi kaścioła, z kamier videanazirańnia (niepadaloku znachodzicca budynak HUBAZiKa) zapytali zapisy.
Surazmoŭca nazvaŭ vypadak nietryvijalnym.
— Padobnych vypadkaŭ u nas nie było navat u 1990-ja. My viedajem, što kafiedralny sabor byŭ domam sportu, tady byli supraćstajańni pamiž spartoŭcami, jakija nie chacieli sychodzić, i prychadžanami, ale kab psavańnie majomaści i ŭ takich pamierach… Zamiena łabavoha škła ŭ aŭtamabili z ustanoŭkaj — heta 600 rubloŭ. Spadziajomsia, što ŭ situacyi buduć raźbiracca i infarmacyja budzie pradastaŭlena.
Katalickija aktyvisty taksama adznačajuć, što mašyna Antonija Klimantoviča padobnaja na mašynu biskupa Juryja Kasabuckaha, jaki viečaram u aŭtorak u svaim fejsbuku zaklikaŭ malicca za pieraśledavanych, asabliva za Tut.by. Zaklik biskupa šyroka razyšoŭsia ŭ internecie.
Kamientary