Paciarpiełych biełarusaŭ u zonie libanska-izrailskaha kanfliktu niama

Za čas uzbrojenaha supraćstajańnia pamiž Izrailem i bajevikami libanskaj hrupoŭki «Chizbała» ŭžo zahinuli prynamsi 200 čałaviek. Siońnia pačynajecca masavaja evakuacyja zamiežnych hramadzianaŭ z terytoryi vajennaha kanfliktu. 350 eŭrapiejcaŭ vyvieziena italjanskim vajskovym samalotam, parom dla evakuacyi svaich suajčyńnikaŭ arandavała Francyja. Dva karabli dla vyvazu svaich hramadzianaŭ nakiravała ŭ rehijon Vialikabrytanija. 80 čałaviek adlaciać u Maskvu samalotam rasiejskaha Ministerstva ŭ nadzvyčajnych sytuacyjach. Biełaruskaje zamiežnapalityčnaje viedamstva zajaŭlaje, što nichto ź biełarusaŭ u zonie kanfliktu nie paciarpieŭ, adnak kala paŭsotni čałaviek buduć adtul evakujavanyja.

Telefon hanarovaha kansulatu Biełarusi ŭ Bejrucie siońnia nie adkazvaje. Adnak pradstaŭnik Ministerstva zamiežnych spravaŭ Andrej Papoŭ udakładniŭ, što kala piacidziesiaci čałaviek buduć evakujavanyja pry dapamozie rasiejskaj ambasady ŭ Syryi.

(Papoŭ: ) «Pakul što nijakich źviestak pra paciarpiełych siarod biełarusaŭ niama. Ciapier naša ambasada ŭ Syryi, jakoj daručana hetuju spravu kantralavać, uzajemadziejničaje z rasiejskim bokam. Jość damoŭlenaść, što jany buduć rabić usie mahčymyja zachady, kab dapamahčy evakujavać našych hramadzianaŭ – tych, chto, biezumoŭna, žadaje evakujavacca. Tamu praca praciahvajecca».

(Karespandent: ) «Ale fakt, što biełarusy ŭ Libanie ŭsio ž jość?»

(Papoŭ: ) «Nu, viadoma ž, jość. Heta i humanitarnyja suviazi, i našyja dziaŭčaty vychodzili za libanskich chłopcaŭ. Tamu niejkija hramadzianie peŭna jość. I, razam ź inšym, my ŭsim raim praz paŭnočny šlach, chto na ŭłasnych aŭtamabilach, nie čakajučy razhortvańnia padziejaŭ, taksama evakujavacca ŭ Syryju».

Dakładnaj statystyki što da kolkaści biełarusaŭ, jakija žyvuć u Libanie, niama. Žycharka Barysava Hanna ŭžo niekalki hadoŭ pracuje ŭ Bejrucie ŭ halinie turyzmu i kaža, što viedaje jašče niekalki dziaŭčat ź Biełarusi, zaniatych u hetaj sfery. Ciapier Hanna na vakacyjach doma, sočyć za raźvićciom padziejaŭ, ale kaža, što chacieła b znoŭ vypravicca ŭ Liban.

(Hanna: ) «Nasamreč da nas našmat bolš uvahi, čym navat da arabskich žonak. Vielmi ŭvažlivyja ludzi, zaŭsiody hatovyja dapamahčy. Kali ja raniej była litaralna ni be, ni me, bajałasia rot adkryć, tady było ciažka, a kali znojdzieš ahulnuju movu, lohka kantaktavać ź lubym čałaviekam – ad aficyjanta da hieneralnaha menedžera».

Abstreły hrupoŭkaj «Chizbała» izrailskich haradoŭ spryčynilisia da jašče adnoj tendencyi – adjezdu ŭ Eŭropu habrejaŭ, jakija koliś vyjechali ŭ Izrail. Ihar Štajhier viarnuŭsia ŭ Voršu paśla vaśmi hadoŭ, praviedzienych na ziamli abiacanaj. Raskazvaje, što jašče ŭviesnu na karyść takoha kroku było adno – biaśpieka dački, jakaja naradziłasia ŭ Izraili.

(Štajhier: ) «Ja pierakanany: viarnułasia b jašče bolš ludziej. Ale šmat chto nia moža viarnucca z-za taho, bo pajšli dzieci ŭ škołu, adpaviedna, nia viedajuć užo movy ni biełaruskaj, ni rasiejskaj. Pa-druhoje, absalutnaja balšynia paśla pryjezdu ŭ Izrail nabyła kvatery, uziali pazyku ŭ banku. Značyć, z pazykaj, pakul nia vypłaciš, nia viernieśsia. Mnie zdajecca, kali b u ludziej była b mahčymaść viarnucca, jany b viartalisia. Nu, i, znoŭ ža, kali ŭ ludziej usie blizkija svajaki taksama ŭ Izraili, to zrazumieła – kudy jon pajedzie? U jaho ŭžo ni ŭ Biełarusi, ni dzieści jašče nijakich karanioŭ».

Historyja vajennych kanfliktaŭ pamiž Libanam i Izrailem maje amal tryccać hadoŭ. U 1978-m Izrail upieršyniu pierajšoŭ miažu Libanu, i ad taho času ŭ adkaz na dziejańni «Chizbała» robić heta dosyć rehularna. Što da ŭłasna «Chizbała» («Partyja Ałacha»), to hetaja palityčnaja i vajskovaja arhanizacyja libanskich musulmanaŭ była stvoranaja hrupaj śviataroŭ-šyitaŭ u 1982 hodzie. «Chizbała» maje ŭ Libanie vialiki palityčny ŭpłyŭ, majučy pradstaŭnikoŭ u parlamencie krainy.

Radyjo Svaboda

• 0
• 0
• 0
• 0
• 0
• 0
• 0
• 0