U sudzie Čyhunačnaha rajona Viciebska 16 vieraśnia raźbirali administracyjnuju spravu, zaviedzienuju za «niesankcyjanavanaje masavaje mierapryjemstva» (art. 24.23 KaAP) na pradprymalnika Uładzimira Puńko. Na jaho skłali pratakoł za bieła-čyrvona-biełuju survetku, jakuju supracoŭnik MUS pabačyŭ u sałonie aŭtamabila Puńko. Sud paličyŭ heta za «niesankcyjanavanaje pikietavańnie» i adpraviŭ ułaśnika aŭto i survetki na 20 sutak u miascovy izalatar časovaha ŭtrymańnia, paviedamlaje «Viciebskaja viasna».
Spravu razhladała sudździa Alena Cyhankova. Zhodna z pratakołam, 2 vieraśnia Uładzimir Puńko znachodziŭsia na vulicy Kirava ŭ Viciebsku, kirujučy aŭtamabilem Toyota, u jakim na piaredniaj paneli pad łabavym škłom znachodziłasia pałotnišča bieła-čyrvona-biełaha koleru. Tym samym, pavodle pratakoła, mužčyna «naŭmysna pravioŭ adzinočny pikiet biez adpaviednaha dazvołu ŭładaŭ».
Haspadara mašyny zatrymali 8 vieraśnia, ale praz sutki adpuścili, a aŭtamabil aryštavali i pastavili na parkoŭku pry Čyhunačnym AUS.
Uładzimir Puńko zajaviŭ, što ŭ jahonym aŭto lažaŭ nie bieła-čyrvona-bieły ściah, a prostaja survetka, jakoj jon praciraje pył z łabavoha škła. Ceły pačak takich survetak jamu padaryli jašče ŭ mai.
«Dzie takija survetki možna kupić?» — pacikaviłasia sudździa. «U Smalensku», — adkazaŭ Uładzimir. Sudździa taksama zacikaviłasia, jakimi asablivymi jakaściami «vałodajuć hetyja survetki». «Suchija ci vilhotnyja?» — udakładniała. I ŭ vyniku pryjšła da vysnovy, što z dapamohaj toj survetki mužčyna jašče «pravodziŭ niesankcyjanavanaje pikietavańnie».
Paśla abviaščeńnia vierdyktu sudździ Cyhankovaj Uładzimira Puńko ŭziaŭ pad vartu supracoŭnik milicyi — prosta na vychadzie z zały pasiadžeńniaŭ.
Ciapier čytajuć
Paśla źniknieńnia śpikierki Mielnikavaj niama dostupu da rachunkaŭ Kaardynacyjnaj rady28
Kamientary