Nabyŭ nieruchomaści na miljon rubloŭ i hulaŭ u chakiej ź Viktaram Łukašenkam. Raskazvajem pra novaha namieśnika ministra ŭnutranych spraŭ
Były načalnik respublikanskaj DAI pałkoŭnik Dźmitryj Karziuk na dniach atrymaŭ pavyšeńnie: jaho pryznačyli namieśnikam ministra ŭnutranych spraŭ. Chutčej za ŭsio, jon pajšoŭ na miesca Siarhieja Chamienki, jaki staŭ ministram justycyi. Miž tym Dźmitryja Karziuka možna było nieadnarazova bačyć u adnoj kampanii ź siamjoj Łukašenki na bajkierskich źlotach. Karziuk navat hulaŭ u adnoj kamandzie ź Viktaram i Dźmitryjem Łukašenkami. I heta nie adzin cikavy fakt pra jaho. Raskazvajem, što jašče viadoma.
Karziuk naradziŭsia ŭ Minsku 6 listapada 1971 hoda. Tak supała, što hienieralskija pahony jon atrymaje ŭ jakaści darahoha padarunka da 50-hadovaha jubileja.
Słužbu ŭ milicyi pačaŭ, kali jamu było 23 hady. Startavaŭ sa staršaha inśpiektara darožna-patrulnaj słužby Minharvykankama.
Zatym daros da kamandzira ŭzvoda, zatym staŭ namieśnikam kamandzira roty. Potym kamandziram roty, a ŭ 1998-m uznačaliŭ znakamituju «Strału». A potym jaho karjera mocna skoknuła ŭvierch.
Jak kažuć krynicy «Našaj Nivy», Viktar Łukašenka pravodziŭ svoj čempijanat «Načnaja chakiejnaja liha». Hulni hetaj amatarskaj lihi adbyvalisia ŭ poźni čas, a nazva ŭ skaračeńni paŭtarała viadomuju abrevijaturu — «NCHŁ».
«Kamanda, u jakoj hulali Viktar i Dźmitryj Łukašenki, nazyvałasia «Rubiež», joj kiravaŭ milicejski načalnik Navumaŭ. Jon ža i padciahvaŭ tudy ludziej sa svajoj arhanizacyi, jakija choć trochu mahli b stajać na lodzie — ahulny ŭzrovień byŭ vielmi nizki, — raskazvajuć našy krynicy. — Tak Karziuk niečakana dla siabie ŭvajšoŭ u koły Łukašenki.
Jon byŭ nie bałbatlivy — mnohich vyhnali z toj kamandy za toje, što jany rabili zdabytkam šyrokaj aŭdytoryi razmovy ŭ raździavałcy, a voś Karziuk maŭčaŭ».
Praź niejki čas jon dadatkova staŭ načalnikam revizijnaj kamisii Prezidenckaha spartovaha kłuba, jaki sam uznačalvaŭ.
U 2008-m Karziuk staŭ načalnikam minskaj haradskoj DAI, u 2016-m uznačaliŭ respublikanskuju DAI.
Heta adzin ź niešmatlikich ludziej, jaki moh źjavicca ŭ kampanii adrazu troch Łukašenkaŭ. U jaho akazałasia zachapleńnie matacykłami, jak i ŭ Viktara Łukašenki.
«Niedzie tam ža, pobač, kruciŭsia siabra Karziuka — ułaśnik sałona «Jamachi». Supadzieńnie ci nie, ale nieŭzabavie matacykły supravadžeńnia «Strały» z BMV źmianilisia na «Jamachu», — havorać našyja krynicy. — Admietny toj fakt, što šmatlikija skandały ŭ DAI i krytyka inśpiekcyi z boku Alaksandra Łukašenki na karjeru Karziuka nijak nie paŭpłyvali».
Maje dom na 251 kvadrataŭ i amal takuju ž pa płoščy kvateru
Karziuk — niečakana bahaty dla zvyčajnaha daišnika. Pa našych danych, ahulnaja cana nieruchomaści, jakaja zapisanaja tolki na jaho, pieravalvaje za miljon biełaruskich rubloŭ.
Tak, jamu naležyć dom na 251 kvadratny mietr ź dźviuma terasami, padvałam i łaźniaj u vioscy Źvieniačy. Heta katedžny pasiołak «dla svaich» za 20 kiłamietraŭ ad Minska.
Z hetym pasiołkam źviazanaja skandalnaja historyja. Sprava ŭ tym, što ziamla, na jakoj jon pabudavany, była vyniata ź sielskahaspadarčaha abarotu ŭkazam staršyni sielvykankama.
Kali pačali raźbiracca, akazałasia, što staršynia ŭžo vyjechaŭ ź Biełarusi, a na ziamli vyraśli domiki «pavažanych ludziej» — tak i pakinuli.
«Akramia doma Karziuk razam z maci vałodaje 1/9 častki adnakvaternaha žyłoha doma na 82,4 kvadratnaha mietra. Jany spadkajemcy pa zaviaščańni, — adznačajuć našy krynicy. —
Na vulicy Knoryna, 17d Karziuku naležyć kvatera na 58 kvadratnych mietraŭ, U 2012 hodzie jon nabyŭ jaje ŭ «Tapasa».
Ale razynka nieruchomaści Karziuka — dvuchpakajoŭka na Ratamskaj na 273,6 kvadratnych mietraŭ.
Heta ŭ «Alimpik Parku» ad «Tapasa» ŭ zonie «Lebiadzinaha», elitnym kompleksie, składzienym ź piaci- i siamipaviarchovikaŭ, a taksama katedžaŭ na dźvie siamji. Nasuprać Drazdoŭ. Tam ža, naprykład, maje kvateru Natalla Ejsmant.
«Kupiŭ hetuju kvateru Karziuk na $100 tysiač tańniej za rynak: kvadratny mietr tam pradavali pa 1600 dołaraŭ. Ale Karziuk pa nieviadomych pryčynach kupiŭ pa $1050 za kvadrat, — havorać krynicy. — Navat tak heta niamała — 286 tysiač dołaraŭ. Pryroda źnižki dla načalnika DAI nieviadomaja. Moža być, heta źviazana z tym, što i ŭłaśnik «Tapasa» Pavieł Bieły, i Dźmitryj Karziuk — chakieisty-amatary?»
«Karziuka vielmi doŭha ciahnuli ŭ hienierały»
«Kali pryjšoŭ načalnikam u Minskaje DAI — heta byŭ hłytok śviežaha pavietra. Nie samadur, čałaviek adkryty i prafiesijny ŭ rabočych pytańniach, ale druhi bok jaho žyćcia nie dazvalaŭ padnačalenym jaho pavažać», — tak apisvajuć Karziuka byłyja padnačalenyja.
Hałoŭnyja pakazčyki raboty ŭ DAI — kab ludzi nie hinuli, kab byŭ narmalny trafik, kab ałkaholikaŭ za styrnom było mieniej. Hetamu Karziuk davaŭ rady, havorać našy surazmoŭcy.
«Pałkoŭnika Karziuk atrymaŭ daterminova za «hierojski» ŭčynak — adzin sprabavaŭ strymlivać natoŭp na praśpiekcie Niezaležnaści kala Kastryčnickaj płoščy ŭ śniežni 2010-ha, što trapiła na videa i, dalej, na stoł da Łukašenki, — havorać našy surazmoŭcy. — Praź siabroŭstva ź Viktaram Łukašenkam Karziuk staŭ niedatykalnym. Viadomyja historyi, kali ŭ 2009-m z raboty zvolnili aficera AAC tolki za toje, što jon prapanavaŭ pravieryć niejkuju apieratyŭnuju infarmacyju, što kampramietavała Karziuka».
Pačynajučy z 2020-ha, supracoŭniki DAI, padnačalenyja Karziuka, prajavili siabie dosyć žorstkimi. Pra mietady ich raboty źjaviłasia niamała źlivaŭ ad abjadnańnia chakieraŭ.
«Karziuka vielmi doŭha ciahnuli ŭ hienierały: sprava ŭ tym, što načalnik DAI — heta nie hienieralskaja pasada. Zhodny jon byŭ na što zaŭhodna, navat stać načalnikam Departamienta achovy — ale Karajeŭ nie puściŭ, zaćvierdziŭ Chamienku», — havorać surazmoŭcy «NN».
Ale tak vyjšła, što hienierała Karziuk atrymaje na byłoj pasadzie Chamienki, jaki pajšoŭ u Miniust — namieśnika ministra, jaki kuryruje kadry ŭ MUS.
Kamientary