Biełaruskaja prapahanda: Hiermanija mała dapamahaje biežancam. Ale kolki nasamreč kraina vydatkovaŭvaje hrošaj? Spojler — vielmi šmat
Voś užo niekalki miesiacaŭ na miažy Biełarusi z Polščaj i Litvoj praciahvajecca biesprecedentny dla našaha rehijona mihracyjny kryzis. Krainy ES abvinavačvajuć aficyjny Minsk u tym, što jon vykarystoŭvaje nielehalnych mihrantaŭ u jakaści palityčnaj zbroi. Jeŭropa nie źbirajecca prymać hetych ludziej, bo z punktu hledžańnia mižnarodnaha prava jany biežancami nie źjaŭlajucca. Tym časam biełaruskija ŭłady patrabujuć ad ES pryniać hetych ludziej, a dziaržaŭnyja prapahandysty i Łukašenka abvinavačvajuć Niamieččynu ŭ tym, što jana mała dapamahaje biežancam i pavodzić siabie niaščyra. Nasamreč, Hiermanija (jak i inšyja zachodnija krainy) — adzin z hałoŭnych u śviecie donaraŭ dapamohi ŭciekačam.
Biełaruskaja prapahanda nakinułasia na Hiermaniju i inšyja zachodnija krainy ES. Maŭlaŭ, zrujnavali Irak, prymusili ludziej stać biežancami, a ciapier nie chočacie płacić.
«Hiermanija vyłučyła 143 tysiačy jeŭra dapamohi dla biežancaŭ, jakija znachodziacca na biełaruska-polskaj miažy. Jaki cynizm! Adzin miljon čałaviek zahinuŭ u Iraku z momantu ŭvarvańnia ŭ hetuju krainu vojskaŭ NATA, u tym liku niamieckich i polskich, niezakonnaha ŭvarvańnia, nasupierak rezalucyi AAN», — skazaŭ Aleh Hajdukievič.
Nasamreč Hiermanija nie brała ŭdzieł u interviencyi ŭ Irak u 2003 hodzie, i navat kateharyčna vystupała suprać jaje.
«Vy źniščyli krainu i dali za heta pa 140 jeŭra. A kolki miljonaŭ jeŭra ŭ hety čas vyłučajecca dla rasijskaj i biełaruskaj apazicyi nibyta dla baraćby za demakratyju. Tak i ŭ Irak vy išli ŭstalavać demakratyju. Zamiest hetaha miljony śmierciaŭ», — zajaviŭ Hajdukievič.
Praŭładny palityčny kamientatar Alaksiej Dzierman abvinavačvaje Zachad u niaščyraści.
«I jak ni imknucca zachodnija pisaki ačarnić našu krainu, emocyi biežancaŭ, što vitajuć apładysmientami prezidenta Biełarusi, havorać sami za siabie. Mnohija ździvilisia vizitu prezidenta da ludziej, jakija znachodziacca ŭ vielmi niaprostym psichałahičnym stanie, ale mienavita hetym jon i adroźnivajecca jak palityk ad usich astatnich, asabliva ad napyšlivych, fanaberystych i niaščyrych jeŭrapiejcaŭ», — kaža Dzierman.
A što ŭ realnaści?
Nasamreč, bahatyja zachodnija krainy, siarod jakich i Hiermanija, źjaŭlajucca samymi vialikimi donarami mižnarodnych i niaŭradavych arhanizacyj, jakija zajmajucca prablemami biežancaŭ.
Takich arhanizacyj u śviecie šmat, ale samaja hałoŭnaja i vialikaja siarod ich — UNHCR (Ahienctva AAN pa spravach biežancaŭ).
UNHCR nie tolki dapamahaje kankretnym biežancam, jana kaardynuje mižnarodnyja dziejańni pa zabieśpiačeńni ŭ suśvietnym maštabie abarony biežancaŭ i vyrašeńnia ich prablem.
Asnoŭnaja meta UNHCR zaklučajecca ŭ zabieśpiačeńni pravoŭ i dabrabytu biežancaŭ. Upraŭleńnie pracuje ŭ bolš čym 110 krainach śvietu (u tym liku ŭ Biełarusi) i akazvaje pravavuju abaronu i dapamohu miljonam biežancaŭ.
Pahladzicie, jak vyhladała farmavańnie biudžetu hetaj arhanizacyi ad roznych donaraŭ za 2020 hod.
Absalutnuju bolšaść finansavańnia hetaja mižnarodnaja arhanizacyja atrymlivaje ad bahatych zachodnich krain.
Na pieršym miescy tradycyjna ZŠA, hetaja dziaržava vyłučała amal 2 miljarda dalaraŭ (42% ad usich achviaravańniaŭ) na dapamohu biežancam.
Hiermanija — druhi donar hetaj arhanizacyi paśla ZŠA. Za 2020 hod tolki niamieckaja dziaržava achviaravała 447 młn dalaraŭ. Jašče dziasiatki miljonaŭ dalaraŭ achviaravali niamieckija pryvatnyja asoby. Taksama 522 młn dalaraŭ achviaravali struktury ES (značnaja častka z hetych hrošaj taksama niamieckaha pachodžańnia).
U sumie Hiermanija plus inšyja krainy — členy ES plus sam ES achviaravali UNHCR bolš za 1,6 młrd dalaraŭ — kałasalnyja ŭ suśvietnym maštabie hrošy.
Vielizarnyja hrošy achviaravali i mienšyja krainy. Šviecyja, jakaja maje nasielnictva trochi bolšaje za biełaruskaje, achviaravała 125 miljonaŭ dalaraŭ. Maleńkaja Danija — amal 97 miljonaŭ.
Hrošy achviaravała navat nie samaja ščodraja ŭ takich pytańniach Polšča (1,3 młn dalaraŭ) i Rasija (2 młn dalaraŭ).
Navat maleńkija dziaržavy kštałtu Litvy, Kyrhyzstana, Słavienii achviaravali chacia b dziasiatki tysiač dalaraŭ.
Biełaruskaja dziaržava, pavodle spravazdačy, nie achviaravała ničoha.
Ciapier čytajuć
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty27
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty
Časam niečakanaja historyja biełaruskich himnaŭ: «My vyjdziem ščylnymi radami», «Pahonia», «Žyvie Biełaruś», «Radzima maja darahaja», «Mahutny Boža» (ź VIDEA)77
Kamientary