U Siarhieja Cichanoŭskaha źjaviŭsia telehram-kanał «Turma dla žyćcia». Padpisacca na jaho — sposab padtrymać palitviaźnia
Śviatłana Cichanoŭskaja ŭ videazvarocie 16 śniežnia zaklikała biełarusaŭ padpisacca na novy kanał Siarhieja Cichanoŭskaha «Turma dla žyćcia». Heta kanał, dzie buduć publikavacca naviny, cytaty, frahmienty listoŭ i zvaroty Siarhieja.
Śviatłana Cichanoŭskaja paviedamlaje, što z dapamohaj hetaha kanała Siarhiej Cichanoŭski choča razmaŭlać ź biełarusami, navat znachodziačysia ŭ kałonii, piša «Svaboda».
«Siarhiej choča, kab jaho hołas byŭ čutny. Tamu zapuskajecca novy telehram-kanał «Turma Dla Žyćcia». Heta kanał ab tym, što adbyvajecca ź im u turmie, jak jon siabie adčuvaje, pra što pieražyvaje, što dumaje pra Biełaruś. Bo ŭ źniavoleńni taksama idzie svajo žyćcio: niepryvabnaje ŭ pobycie, emacyjna ciažkaje, sa svaimi momantami radaści i bolu. Ale heta abjektyŭnaja realnaść tysiač niavinnych ludziej. Usia infarmacyja dla kanała biarecca ź listoŭ Siarhieja dy ź inšych publičnych krynic. Ja prašu vas padtrymać prajekt — heta vielmi važna dla ŭsich nas», — skazała Cichanoŭskaja.
14 śniežnia błohiera Siarhieja Cichanoŭskaha asudzili na 18 hadoŭ kałonii. Heta maksimalnaje pakarańnie, jakoje atrymaŭ apanient Łukašenki za 27 hadoŭ. Cichanoŭskaha abvinavacili pa č. 1 art. 293 (arhanizacyja masavych biesparadkaŭ), č. 3 art. 130 (raspalvańnie sacyjalnaj varažniečy), č. 2 art. 191 (pieraškody pracy CVK), č. 1 art. 342 KK (arhanizacyja dziejańniaŭ, što hruba parušajuć hramadski paradak).
Razam ź im sudździa Mikałaj Dola asudziŭ jašče 5 palitviaźniaŭ.
- Žurnalistu «Radyjo Svaboda» Iharu Łosiku prysudzili 15 hadoŭ źniavoleńnia ŭzmocnienaha režymu.
- Apierataru Arciomu Sakavu — 16 hadoŭ uzmocnienaha režymu.
- Palityku Mikołu Statkieviču — 14 hadoŭ asablivaha režymu.
- Maderataru sacyjalnych sietak Dźmitryju Papovu — 16 hadoŭ uzmocnienaha režymu.
- Błohieru Ŭładzimiru Cyhanoviču — 15 hadoŭ źniavoleńnia ŭzmocnienaha režymu.
Źbićcio, kałonija, turma. Jak i na jakija terminy raniej sudzili sapiernikaŭ Łukašenki
Prakruciŭ cieła praź miasarubku — 17 hadoŭ, bienzapiłoj rezaŭ žančyn — 15. Za što ŭ Biełarusi raniej davali drakonaŭskija prysudy?
Cichanoŭski paviarnuŭsia da sudździ śpinaj, Statkievič kryknuŭ «Žyvie Biełaruś». Jak ahučvali prysud u SIZA-3 Homiela
Chalezin: Nieŭźlin finansuje Chartyju'97 jašče z prezidenckich vybaraŭ 2010 hoda30
Kamientary