Źbićcio, kałonija, turma. Jak i na jakija terminy raniej sudzili sapiernikaŭ Łukašenki
14 śniežnia abviaścili prysud Siarhieju Cichanoŭskamu — 18 hadoŭ kałonii ŭzmocnienaha režymu. Cichanoŭski ŭ 2020 hodzie zajaŭlaŭ pra namier bałatavacca ŭ prezidenty, ale ž byŭ zatrymany jašče da rehistracyi kandydataŭ. Sioleta asudzili jašče adnaho pretendenta ŭ kandydaty, eks-bankira Viktara Babaryku, jakoha taksama aryštavali da rehistracyi. Babaryka atrymaŭ 14 hadoŭ kałonii. «Naša Niva» zhadała, jak karali biełarusaŭ, jakija navažvalisia kinuć vyklik Łukašenku na prezidenckich vybarach.
Vybary 1994 i 2001 hadoŭ prajšli biez pasadak kandydataŭ. Ale ŭ 2006 pretendentaŭ na pasadu prezidenta pačali sadžać.
Alaksandr Kazulin
Alaksandr Kazulin, lidar BSDP (Hramada), eks-rektar BDU. Pa aficyjnych danych, nabraŭ na vybarach 2,3% hałasoŭ.
Mienš čym praz tydzień, 25 sakavika, Kazulin byŭ aryštavany. 13 lipienia taho ž hoda asudžany na 5 hadoŭ i 6 miesiacaŭ pazbaŭleńnia voli za «złosnaje chulihanstva i arhanizacyju masavych biesparadkaŭ».
Vinu nie pryznaŭ. Adbyvaŭ pakarańnie ŭ kałonii №3 «Vićba».
Pakul Kazulin siadzieŭ, ad chvaroby pamierła jaho žonka Iryna va ŭzroście 49 hadoŭ.
U 2008 hodzie Kazulin byŭ vyzvaleny praz pamiłavańnie Łukašenkam.
A paśla vybaraŭ-2010 represii ŭ dačynieńni da kandydataŭ u prezidenty vyjšli na novy ŭzrovień.
Mikałaj Statkievič
Uviečary 19 śniežnia 2010 hoda paśla vybaraŭ prajšoŭ šmattysiačny mitynh u centry Minska. Ludziej razahnali siłaviki.
U toj ža viečar byŭ zatrymany Mikałaj Statkievič, kandydat ad BSDP. Aficyjna jon nabraŭ trochi bolš za 1% hałasoŭ.
U mai 2011-ha Statkieviču prysudzili 6 hadoŭ kałonii ŭzmocnienaha režymu za «arhanizacyju masavych biesparadkaŭ». U kałonii jaho pryznali złosnym parušalnikam. U 2012 hodzie rašeńniem suda ŭmovy adbyćcia pakarańnia źmianili na bolš žorstkija, jaho pieraviali sa Škłoŭskaj kałonii ŭ turmu №4 Mahilova.
Paśla ŭkaza Łukašenki ab pamiłavańni Statkieviča vyzvalili ŭ žniŭni 2015 hoda.
Ale toje byŭ nie pieršy termin, jaki adbyvaŭ Statkievič. U 2004 hodzie paśla vybaraŭ u parłamient i refierendumu, jaki admianiaŭ abmiežavańni na kolkaść prezidenckich terminaŭ, Statkievič uznačaliŭ akcyju pratestu, za što bolš za dva hady pravioŭ na «chimii».
Uładzimr Niaklajeŭ
Uviečary 2010 hoda byŭ źbity jašče adzin kandydat u prezidenty — paet Uładzimr Niaklajeŭ («aficyjna» nabraŭ na vybarach 1,78%). Jon trapiŭ ŭ balnicu, ale byŭ vyviezieny adtul siłavikami, źmieščany ŭ SIZA KDB. U kancy studzienia 2011 hoda Niaklajeva źmiaścili pad chatni aryšt, u jaho kvatery pastajanna dziažuryli dvoje supracoŭnikaŭ KDB.
Sudzili paeta i palityka pa sumna viadomym siońnia artykule 342 KK: arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich.
20 maja 2011 Niaklajeŭ atrymaŭ 2 hady z adterminoŭkaj na 2 hady. 23 lipienia 2013 hoda rašeńniem suda Leninskaha rajona Minska jon byŭ vyzvaleny ad dalejšaha adbyćcia pakarańnia.
Andrej Sańnikaŭ
Były dypłamat Andrej Sańnikaŭ nabraŭ na vybarach 2010 hoda 2,43%, pa aficyjnych danych. Razam z žonkaj, žurnalistkaj Irynaj Chalip, jaho zatrymali ŭ noč na 20 śniežnia 2010 hoda. U mai 2011-ha sudzili i pryznali vinavatym u arhanizacyi masavych biesparadkaŭ. Pryhavor — 5 hadoŭ kałonii ŭzmocnienaha režymu. Adbyvaŭ pakarańnie ŭ viciebskaj kałonii №3 «Vićba».
Užo ŭ śniežni 2011 hoda Sańnikaŭ napisaŭ prašeńnie ab pamiłavańni na imia Łukašenki. U krasaviku 2012-ha Andreja Sańnikava vyzvalili.
Vital Rymašeŭski
Lidar niezarehistravanaj partyi chryścijanskich demakrataŭ Vital Rymašeŭski taksama byŭ asudžany.
Na vybarach jon nibyta nabraŭ 1,09% hałasoŭ. Rymašeŭskaha zatrymali ŭ noč na 20 śniežnia, sudzili, jak i Niaklajeva, pa art. KK. Pryhavor anałahičny: 2 hady pazbaŭleńnia voli z adterminoŭkaj na 2 hady.
Dźmitryj Us
Biznesmien i samavyłučeniec Dźmitryj Us taksama vyrašyŭ bałatavacca ŭ prezidenty ŭ 2010 hodzie. Nabraŭ 0,39% hałasoŭ. Jak i astatnich kandydataŭ, jaho zatrymali ŭ noč z 19 na 20 śniežnia, ale na nastupny dzień adpuścili pad padpisku ab niavyjeździe.
U mai 2011-ha prajšoŭ sud, Usa asudzili na 5 hadoŭ i 6 miesiacaŭ kałonii, jaho pryznali vinavatym u arhanizacyi masavych biesparadkaŭ. Pakarańnie adbyvaŭ u škłoŭskaj kałonii.
Na volu Dźmitryj Us vyjšaŭ 1 kastryčnika 2011 hoda, paśla pamiłavańnia Łukašenkam.
Cichanoŭskamu — 18 hadoŭ, Łosiku — 15, Statkieviču — 14. Vyniesienyja žachlivyja prysudy pa «spravie Cichanoŭskaha»
Što treba viedać pra «spravu Cichanoŭskaha»
-
Ci mohuć nie puścić u kramu za 5 chvilin da zakryćcia i da jakoha času pavinny pracavać kasirki
-
U BDU ŭ nastupnym hodzie adkryjuć čytyry novyja śpiecyjalnaści — jość i niezvyčajnaja
-
«Nastolki jamu było važnaje śviatło ŭ rodnym aknie». Jak dziaŭčyna kranalna dapamahaje biełarusam-emihrantam «viarnucca» dadomu
Usio zdaryłasia na Novy hod. Śmierć samaj publičnaj supracoŭnicy minskaha AMAPa dahetul pakidaje pytańni1
Kamientary