U Biełarusi ŭvodzicca instytut inviestycyjnych ahientaŭ

«U metach udaskanaleńnia arhanizacyjnych form raboty z zamiežnymi i nacyjanalnymi inviestarami i dalejšaha pavyšeńnia inviestycyjnaj pryvabnaści krainy» ŭ Biełarusi ŭvodzicca novy instytucyjanalny miechanizm ažyćciaŭleńnia inviestycyjnaj dziejnaści — inviestycyjnyja ahienty.

Heta praduhledžvaje ŭkaz prezidenta ad 6 žniŭnia № 413 «Ab pradastaŭleńni fizičnym i jurydyčnym asobam paŭnamoctvaŭ na pradstaŭleńnie intaresaŭ Respubliki Biełaruś pa pytańniach pryciahnieńnia inviestycyj u Respubliku Biełaruś».

Inviestycyjnym ahientam moža być vyznačana jak fizičnaja, tak i jurydyčnaja asoba, u tym liku nierezident Respubliki Biełaruś, adznačajecca ŭ paviedamleńni pres‑słužby prezidenta.

Status inviestycyjnaha ahienta zmohuć atrymać asoby, jakija «vałodajuć praktyčnymi navykami padrychtoŭki inviestycyjnych prajektaŭ da realizacyi, a taksama majuć asabistyja dziełavyja jakaści, jakija dazvalajuć im vieści pieramovy z vysokim kiraŭnickim składam bujnych kampanij».

Prapanova ab vyznačeńni kankretnaj asoby inviestycyjnym ahientam moža być uniesiena ŭ Saviet ministraŭ lubym respublikanskim orhanam dziaržaŭnaha kiravańnia i inšaj dziaržarhanizacyjaj, a taksama abłasnym (Minskim haradskim) vykanaŭčym kamitetam «na padstavie zvarotu patencyjalnaha inviestycyjnaha ahienta».

Rašeńnie ab ŭpaŭnavažańni inviestycyjnaha ahienta na pradstaŭleńnie intaresaŭ Biełarusi prymajecca ŭradam.

***

Uvodzicca trochuzroŭnievaja sistema zaklučeńnia inviestycyjnych dahavoraŭ ź Biełaruśsiu

Dekretam prezidenta № 10 ad 6 žniŭnia «Ab stvareńni dadatkovych umoŭ dla inviestycyjnaj dziejnaści ŭ Respublicy Biełaruś» uvodzicca trochuzroŭnievaja sistema zaklučeńnia inviestarami inviestycyjnych dahavoraŭ ź Biełaruśsiu, dyfierencyravanaja ŭ zaležnaści ad značnaści prajekta i prefierencyj, jakija pradastaŭlajucca.

Jak paviedamiła pres‑słužba prezidenta, inviestycyjny dahavor moža zaklučacca na padstavie rašeńnia:

Savieta ministraŭ, uzhodnienaha z prezidentam, kali dahavoram praduhledžvajecca pradastaŭleńnie inviestaru prefierencyj, nie ŭstanoŭlenych zakanadaŭčymi aktami abo inšymi rašeńniami prezidenta;

Savieta ministraŭ u vypadku, kali inviestycyjnym dahavoram praduhledžvajecca pradastaŭleńnie inviestaru lhot i prefierencyj, užo ŭstanoŭlenych zakanadaŭčymi aktami i inšymi rašeńniami prezidenta;

respublikanskaha orhana dziaržaŭnaha kiravańnia, inšaj dziaržaŭnaj arhanizacyi, padparadkavanaj uradu, abłvykankama, Minharvykankama ŭ vypadkach, kali dla realizacyi prajekta prefierencyi nie patrabujucca.

Dekretam zamacavany abaviazkovyja ŭmovy zaklučeńnia inviestycyjnych dahavoraŭ, a taksama pradastaŭlajecca mahčymaść ich pašyreńnia zychodziačy z halinovaj nakiravanaści i śpiecyfiki inviestycyjnaha prajekta.

Inviestaram, jakija zaklučyli inviestycyjnyja dahavory, prapanoŭvajucca takija ahulnyja prefierencyi, jak pradastaŭleńnie ziamielnaha ŭčastka ŭ arendu biez praviadzieńnia aŭkcyjonu; paetapnaje afarmleńnie nieabchodnych dakumientaŭ pa advodzie ziamielnaha ŭčastka adnačasova z budaŭnictvam na faktyčna zaniatych ziemlach i budaŭnictva abjektaŭ z paralelnym prajektavańniem nastupnych etapaŭ budaŭnictva; uvoz technałahičnaha abstalavańnia i zapasnych častak da jaho dla abjektaŭ, źviazanych z realizacyjaj inviestycyjnaha prajekta, biez vypłaty mytnych pošlin i padatku na dadadzieny košt.

Inviestar vyzvalajecca ad kampiensavańnia strat sielskahaspadarčaj vytvorčaści, a taksama kampiensacyjnych vypłat, źviazanych ź pieranosam i vyrubkaj zialonych nasadžeńniaŭ na ziemlach nasielenych punktaŭ; vypłaty dziaržaŭnaj pošliny za vydaču śpiecyjalnych dazvołaŭ zamiežnym hramadzianam, jakija pryciahvajucca inviestaram dla realizacyi inviestycyjnaha prajekta, na zaniaćcie pracoŭnaj dziejnaściu ŭ krainie, a nazvanyja zamiežnyja hramadzianie — ad vypłaty dziaržpošliny za vydaču dazvołaŭ na časovaje pražyvańnie ŭ Biełarusi.

U vypadku nievykanańnia abo nienaležnaha vykanańnia inviestaram uziatych na siabie abaviazacielstvaŭ Respublika Biełaruś «u adnabakovym paradku moža admovicca ad vykanańnia svaich abaviazacielstvaŭ pa zaklučanym inviestycyjnym dahavory».

Prapanavanyja normy nakiravany na «stymulavańnie šyrokamaštabnaj inviestycyjnaj aktyŭnaści».

Dekret nabyvaje moc praz try miesiacy paśla jaho aficyjnaha apublikavańnia, za vyklučeńniem niekatorych punktaŭ, źjaŭlajecca časovym i pradstaŭlajecca na razhlad Nacyjanalnaha schodu. Dziejańnie dekreta nie raspaŭsiudžvajecca na inviestycyjnaja dahavory, zaklučanyja da ŭvachodžańnia dekreta ŭ siłu.

Dźmitry Ułasaŭ, BiełaPAN

• 0
• 0
• 0
• 0
• 0
• 0
• 0
• 0