«Pieraviaduć ludziej u ramont, a tam kapiejki płaciać». Čyhunačnik pra toje, što čakaje rabotnikaŭ z-za spynieńnia biełaruska-litoŭskaha tranzitu
Ź lutaha Litoŭskaja čyhunka spyniła tranzit biełaruskaha kaliju. Biełaruskija ŭłady ŭ adkaz z paniadziełka ŭvodziać zabaronu na tranzit ź Litvy naftapraduktaŭ, chimičnych i minieralnych uhnajeńniaŭ. Takich hruzaŭ pa našaj terytoryi pieravozicca kala 1,5 miljona ton štohod. Daviedalisia, jak Biełaruskaja čyhunka rychtujecca puskać hruzy praz Rasiju, a asobnyja bryhady — pierachodzić u inšyja cechi.
Na kožnym depo jość miesiačny płan — kolki vahonaŭ praź jaho musić prajści, kolki ton, kolki ciahnikoŭ pavyšanaj vahi i daŭžyni.
«Kab atrymać premiju, hetyja paramietry treba vykonvać. Ad nievykanańnia płanu pacierpiać rabotniki stancyi — dziažurnyja, pryjomazdatčyki. U mašynistaŭ premija zaležyć ad najezdžanych hadzin.
Mnohija razumiejuć, što kali ničoha nie źmienicca, piensijanieram, jakija pracujuć, daviadziecca syści na piensiju. Niekamu treba budzie pierachodzić u ramont — tam naohuł kapiejki płaciać. Kali mašynistam možna atrymlivać 1700-2000 rubloŭ, to ślesaram čałaviek budzie mieć maksimum 800-900»,
— kaža Siarhiej Vajciachovič, kiraŭnik stačkama čyhunačnikaŭ.
Pa jaho słovach, ad spynieńnia tranzitu kaliju praź Litvu najbolš pacierpiać baranavickaje i mahiloŭskaje adździaleńni čyhunki. Mahiloŭ zajmajecca manieŭrovaj i vyvaznoj pracaj z «Biełaruśkalija», a dalej pradukcyju viazuć łakamatyŭnyja bryhady Baranavičaŭ.
Alternatyŭnyja šlachi pieravozak na čyhuncy daŭno raspracoŭvalisia.
«Pradumvałasia pieraaryjentacyja ŭ picierskija ci krymski party. Pieršyja dakumienty pra heta źjavilisia ŭ listapadzie 2020 hoda. Abkatvali łakamatyvy i łakamatyŭnyja bryhady rasijskaj čyhunki pa viciebskim adździaleńni i pa Oršy. Tam ciepłavozy z normaj vahi 7-8 tysiač ton.
Maršruty adpracavali, rasijskaja čyhunka dała źnižki na pieravozku kaliju, naftapraduktaŭ i pradukcyi «Hrodna Azot». Adzinaje, što pakul nie mohuć vyrašyć, — heta viartańnie parožnich vahonaŭ.
Pa tych maršrutach adnaputnaja čyhunka, parožnija vahony niejak treba ŭpisvać u hrafik», — raskazvaje Vajciachovič.
U dakumientach, jakija majuć stačkamaŭcy, kažacca pra źnižku na pieravozki naftapraduktaŭ praz Rasiju ŭ 50%. Adpraŭlać hruzy płanujuć sa stancyi Navapołack i Barbaraŭ u kirunku prypartavych stancyj Akciabrskaj čyhunki.
Što da tranzitu ź Litvy, to heta taksama istotny dachod dla biełaruskaj čyhunki. Choć, miarkujuć supracoŭniki, hruzy z Kalininhrada va ŭschodniuju častku Rasii heta zabarona naŭrad ci zakranie.
U suviazi sa spynieńniem pieravozak «Biełaruśkalija» rabotnikaŭ baranavickaha depo čakajuć źmieny. Łakamatyŭnyja bryhady, jakija majuć niekalki vidaŭ pravoŭ, źbirajucca zadziejničać u inšych vidach ruchu, mohuć pieranieści terminy adpačynkaŭ, davać łakamatyŭnym bryhadam adpačynki za svoj košt (pa ich zhodzie) abo časova pieravodzić ich u cechi ramontu ci inšyja depo.
«Padobnaje było ŭ 2020 hodzie, kali zakryli miežy z-za karanavirusa. Pracy nie było, mašynistaŭ, jakija byli ŭ pasažyrskim ruchu i ŭ kaho byli pravy na kiravańnie elektravozami, ciepłavozami, pierasadžvali na hruzavy ruch. A na hruzavych ciahnikach mienš atrymlivajuć, čym na pasažyrskich», — zhadvaje były čyhunačnik.
Čytajcie pa temie:
Bolš jak na 1 młrd dalaraŭ štohod. Biełaruś uvodzić zabaronu na čyhunačny tranzit ź Litvy naftapraduktaŭ i inšych hruzaŭ
U paniadziełak praź Litvu prajšli apošnija ciahniki z hruzam «Biełaruśkalija»
Ciapier čytajuć
«Zachodziš u kamieru, a jany kažuć: «My z taboj admaŭlajemsia siadzieć». Cichanoŭski raskazaŭ, jak sutyknuŭsia z prablemaj nizkaha statusu11
Kamientary