«Перавядуць людзей у рамонт, а там капейкі плацяць». Чыгуначнік пра тое, што чакае работнікаў з-за спынення беларуска-літоўскага транзіту
З лютага Літоўская чыгунка спыніла транзіт беларускага калію. Беларускія ўлады ў адказ з панядзелка ўводзяць забарону на транзіт з Літвы нафтапрадуктаў, хімічных і мінеральных угнаенняў. Такіх грузаў па нашай тэрыторыі перавозіцца каля 1,5 мільёна тон штогод. Даведаліся, як Беларуская чыгунка рыхтуецца пускаць грузы праз Расію, а асобныя брыгады — пераходзіць у іншыя цэхі.
На кожным дэпо ёсць месячны план — колькі вагонаў праз яго мусіць прайсці, колькі тон, колькі цягнікоў павышанай вагі і даўжыні.
«Каб атрымаць прэмію, гэтыя параметры трэба выконваць. Ад невыканання плану пацерпяць работнікі станцыі — дзяжурныя, прыёмаздатчыкі. У машыністаў прэмія залежыць ад наезджаных гадзін.
Многія разумеюць, што калі нічога не зменіцца, пенсіянерам, якія працуюць, давядзецца сысці на пенсію. Некаму трэба будзе пераходзіць у рамонт — там наогул капейкі плацяць. Калі машыністам можна атрымліваць 1700-2000 рублёў, то слесарам чалавек будзе мець максімум 800-900»,
— кажа Сяргей Вайцяховіч, кіраўнік стачкама чыгуначнікаў.
Па яго словах, ад спынення транзіту калію праз Літву найбольш пацерпяць баранавіцкае і магілёўскае аддзяленні чыгункі. Магілёў займаецца манеўровай і вывазной працай з «Беларуськалія», а далей прадукцыю вязуць лакаматыўныя брыгады Баранавічаў.
Альтэрнатыўныя шляхі перавозак на чыгунцы даўно распрацоўваліся.
«Прадумвалася пераарыентацыя ў піцерскія ці крымскі парты. Першыя дакументы пра гэта з’явіліся ў лістападзе 2020 года. Абкатвалі лакаматывы і лакаматыўныя брыгады расійскай чыгункі па віцебскім аддзяленні і па Оршы. Там цеплавозы з нормай вагі 7-8 тысяч тон.
Маршруты адпрацавалі, расійская чыгунка дала зніжкі на перавозку калію, нафтапрадуктаў і прадукцыі «Гродна Азот». Адзінае, што пакуль не могуць вырашыць, — гэта вяртанне парожніх вагонаў.
Па тых маршрутах аднапутная чыгунка, парожнія вагоны неяк трэба ўпісваць у графік», — расказвае Вайцяховіч.
У дакументах, якія маюць стачкамаўцы, кажацца пра зніжку на перавозкі нафтапрадуктаў праз Расію ў 50%. Адпраўляць грузы плануюць са станцыі Наваполацк і Барбараў у кірунку прыпартавых станцый Акцябрскай чыгункі.
Што да транзіту з Літвы, то гэта таксама істотны даход для беларускай чыгункі. Хоць, мяркуюць супрацоўнікі, грузы з Калінінграда ва ўсходнюю частку Расіі гэта забарона наўрад ці закране.
У сувязі са спыненнем перавозак «Беларуськалія» работнікаў баранавіцкага дэпо чакаюць змены. Лакаматыўныя брыгады, якія маюць некалькі відаў правоў, збіраюцца задзейнічаць у іншых відах руху, могуць перанесці тэрміны адпачынкаў, даваць лакаматыўным брыгадам адпачынкі за свой кошт (па іх згодзе) або часова пераводзіць іх у цэхі рамонту ці іншыя дэпо.
«Падобнае было ў 2020 годзе, калі закрылі межы з-за каранавіруса. Працы не было, машыністаў, якія былі ў пасажырскім руху і ў каго былі правы на кіраванне электравозамі, цеплавозамі, перасаджвалі на грузавы рух. А на грузавых цягніках менш атрымліваюць, чым на пасажырскіх», — згадвае былы чыгуначнік.
Чытайце па тэме:
Больш як на 1 млрд даляраў штогод. Беларусь уводзіць забарону на чыгуначны транзіт з Літвы нафтапрадуктаў і іншых грузаў
У панядзелак праз Літву прайшлі апошнія цягнікі з грузам «Беларуськалія»
«Нават яго прыхільнікі зразумелі, што жыць як раней ужо не атрымаецца». Беларусы расказалі пра атмасферу ў краіне напярэдадні выбараў8
Каментары