Ułaśnik turkampanii «Sakub» apynuŭsia na narach

Takim čynam skončyłasia jahonaja sprečka z partnioram pa biźniesie Hansam Chornbachieram, hramadzianinam Hiermanii. Zatrymali Siarhieja Bukasa na nastupny dzień paśla jahonaha vizitu ŭ Administracyju prezidenta.

Hansa Chornbachiera na radzimie samoha vinavaciać u machlarstvie i nieviartańni pazykaŭ zabudoŭščykam na sumu kala traciny miljona jeŭra. Adnak biełaruskaja prakuratura ŭstała na jahony bok. A nie na bok Siarhieja Bukasa, ułaśnika mahutnaj turystyčnaj kampanii «Sakub». Bukas apynuŭsia na łavie padsudnych. 10 žniŭnia jahonuju spravu pačaŭ razhladać sud Savieckaha rajonu Minska.

Turkampanija «Sakub»
była zasnavanaja ŭ 1993 i nieŭzabavie vyjšła ŭ lik lideraŭ turystyčnaha rynku Biełarusi. Maje ofisy na praśpiekcie Mašerava i vuł. Kulman u stalicy, a taksama avijakasy. Prapanuje adpačynak ŭ dziesiatkach krainaŭ śvietu i Biełarusi.

U tym ža hodzie sumiesna z budaŭničaj firmaj «Vihieŭrabud» kampanija pačała budavać elitny katedžavy pasiołak «Soniečny». Hety prajekt trapiŭ u pole zroku niezaležnaj presy, bo pasiołak mieŭ źjavicca pobač ź miemaryjałam Kurapaty. Supraciŭ niezaležnaha hramadstva zmusiŭ zabudoŭščykaŭ skarektavać płany — placoŭku pasunuli ŭbok, za kaładziščanskuju darohu.

Adnak miž partniorami pačaŭsia razład.

«Sakub» čakaŭ ad niemca inviestycyj. Toj ich nie zabiaśpiečvaŭ.

Tady Bukas zasumniavaŭsia: našto jamu taki partnior. Jon prapanavaŭ vykupić jahonuju dolu. Niemiec byŭ hatovy vyjści ź biznesu. Adnak chaŭruśniki nie syšlisia ŭ canie. Pavodle roznych źviestak,

biełarus hatovy byŭ dać maksimum 150 tysiač dalaraŭ. Niemiec ža chacieŭ paŭmiljona. «Sakubu» heta padavałasia nieprymalnym. Ahulny ŭniosak Chornbachiera ŭ «Chornbachier i Bołl» jon aceńvaŭ usiaho na 30 tys. dalaraŭ.

«Soniečny» pakrysie raście, na jaho sajcie prapanujucca kvatery na prodaž. Ale siońnia pierśpiektyva taŭnchaŭsaŭ pamiž Baravoj i Kurapatami nie takaja soniečnaja: 13 lutaha 2009 hodu Haspadarčy sud Minska zadavoliŭ patrabavańni AAT «Sakub» ab pryznańni niadziejsnaj dziaržaŭnaj rehistracyi TAA «Chornbachier i Bołl». Asnovaj stała rašeńnie suda Frajburhu (Hiermanija), pavodle jakoha Chornbachier pryznavaŭsia niepłaciežazdolnym, jaho zapazyčanaść pierad kredytorami siahała 315,5 tysiač jeŭra. Akramia taho, jašče ŭ 2001 hodzie jaho sudzili za machlarstva, źviazanaje z atrymańniem srodkaŭ klijentaŭ na dolevaje budaŭnictva. Na momant rehistracyi sumiesnaha pradpryjemstva ŭ Biełarusi Chornbachier nie pahasiŭ sudzimaści i nie kampiensavaŭ svaim niamieckim klijentam straty. Hetyja fakty ŭ svajoj ankiecie, zapaŭnieńnie jakoj nieabchodnaje dla rehistracyi kampanii, jon nie paznačyŭ. Čym parušyŭ biełaruskaje zakanadaŭstva, što i paćvierdziŭ Haspadarčy sud svaim rašeńniem.

Praces budaŭnictva žylla na hetym nie spyniŭsia — sud dazvoliŭ pravodzić płaciažy zabudoŭščyku, a taksama vypłačvać padatki, zbory i inšyja abaviazkovyja płaciažy ŭ biudžet. Ale svajmu pośpiechu biełaruski bok kampanii radavaŭsia nie doŭha. 24 sakavika Kasacyjnaja kalehija Vyšejšaha haspadarčaha sudu paličyła dokazy niepierakanaŭčymi, admianiła rašeńnie nižejšaha Haspadarčaha suda i nakiravała spravu na novy razhlad.

Biełaruski front Hansa Chornbachiera

A praz dva miesiacy Siarhiej Bukas apynuŭsia pad vartaj u SIZA na Vaładarskaha. Pakul Bukas chacieŭ zabrać pradpryjemstva ŭ Chornbachiera, niemiec padkapaŭsia pad biełarusa. Kryminalnaja sprava ŭ dačynieńni da Bukasa pa inicyjatyvie Chornbachiera była raspačataja jašče ŭ 2008 hodzie.

Biełaruskaha biznesoŭca źvinavacili ŭ złoŭžyvańni słužbovymi paŭnamoctvami. Niamiecki partnior vinavaciŭ minskaha kalehu ŭ sprobach zachapić kampaniju pry dapamozie padrobki dakumientaŭ. U liście na imia Hienieralnaha prakurora Siarhiej Bukas davodziŭ, što abvinavačańni na jahony adras nie majuć pad saboj hruntu. U svaju čarhu jon vinavaciŭ u machlarstvie i sprobach zachopu biźniesu svajho byłoha niamieckaha kampańjona.

Zatrymańnie Siarhieja Bukasa stała niečakanaściu dla jahonych rodnych i znajomych. Tolki što haspadarčy sud pastaviŭ, zdavałasia b, kropku ŭ spravie niaŭdałaj kampanii, i tut prakuratura biare bok čałavieka, jakoha vinavaciać u machlarstvie, a za kraty traplaje inšy. Zatrymali Bukasa na nastupny dzień paśla jahonaha vizitu ŭ Administracyju prezidenta. Jon chadziŭ tudy paskardzicca i paprasić abarony.

«Ja viedaŭ, što Siarhiej paśpiachovy biźniesoviec, što jahonaja turfirma — adna z najlepšych u Biełarusi, što taksama jon zajmajecca budaŭnictvam. Jon šmat addavaŭ srodkaŭ na roznyja kulturnyja i zabaŭlalnyja mierapryjemstvy. I voś u kancy červienia jaho zatrymali», — kaža vydaviec haziety «Barysaŭskija naviny» Anatol Bukas, stryječny brat Siarhieja.

Kiraŭnik vydaviectva «Ryftur» Siarhiej Płytkievič najpierš pryhadvaje sponsarskuju dziejnaść Bukasa. «Mocny biźniesmien, stvaryŭ svaju kampaniju z nula. Zachaplajecca fatahrafijaj, padvodnym płavańniem. Sumna, što tak zdaryłasia» — kaža sp. Płytkievič.

Ci jon, ci jaho

Zhodna z abvinavačvańniem, Bukas byccam by padrabiŭ zajavu niemca pra zvalnieńnie z pasady dyrektara i sam niezakonna zaniaŭ jahonuju pasadu. Akramia taho, padčas svajho dyrektarstva jon, maŭlaŭ, skraŭ hrošy niemca.

Akramia hetaha, śledstva paličyła, što ŭłaśnik «Sakub» niepravamierna zaklučyŭ damovu lizinhu z bankam, pavodle jakoj za košt firmy nabyŭ za 40 tysiač dalaraŭ «Tajotu Łendkruzer» dla asabistaha karystańnia. I — vierch usiaho — Bukas byccam by niepravamierna vyznačyŭ sabie dyrektarski zarobak u pamiery 2 miljony rubloŭ u miesiac.

U svaju čarhu, Bukas staić na tym, što 70 tys. dalaraŭ jon nie vykradaŭ, bo nie zaklučaŭ anijakaj damovy pazyki i nie atrymlivaŭ hrošaj. «Ultyma T&T» źjaŭlajecca partnioram «Sakub» pa turystyčnym biźniesie z 1994 hodu. Jak śćviardžaje abvinavačvany, jon sapraŭdy ŭ 2000 hodzie dapamahaŭ partnioram z Tajłandu adkryć u łatvijskim banku rachunak i mieŭ adpaviednuju davieranaść na karystańnie im, ale hety dakumient dziejničaŭ ciaham hodu i da momantu pieraličeńnia srodkaŭ niemcam Bukas nie mieŭ prava rasparadžacca rachunkam «Ultymy T&T». Na dumku haspadara «Sakub», u Hansa byli svaje ŭzajemaadnosiny z «Ultymaj T&T». Jon pryvodzić list kiraŭnictva hetaj kampanii, u jakim havorycca, što jano davała Hansu hrošy i toj jašče nie całkam ź imi raźličyŭsia.

Bukas nastojvaje, što abvinavačvańni ničoha nie vartyja. Hans apieruje damovaj pazyki z adnoj kampanijaj, pavodle jakoj hrošy pieraličanyja na rachunak druhoj. Pavodle słovaŭ Bukasa, bank prosta nie pryniaŭ by taki płaciož, kali da damovy niama dadatkovaha pahadnieńnia, u jakim paznačany inšy atrymalnik.

Sprava turapierataraŭ

Sprava Siarhieja Bukasa raźvivajecca na tle čutak pra zatrymańni siarod kiraŭnictva turystyčnych kampanij. U kamientarach da takich paviedamleńniaŭ možna pabačyć nie adno mierkavańnie, što dziaržava źbirajecca takim čynam papoŭnić biudžet, pravodziacca paraleli z ułaśnikam rynku «Ždanovičy» Jaŭhienam Šyhałavym, jaki paśla aryštu zhadziŭsia kampiensavać dziaržavie šmatmiljonnyja straty. Ale ŭ vypadku z Bukasam taki varyjant vyhladaje małavierahodnym, bo tut havorka viadziecca pra mahčymuju škodu pryvatnamu pradpryjemstvu, a nie dziaržavie.

«Prykład Siarhieja Bukasa śviedčyć pra toje ŭ našaj krainie možna zatrymać možna luboha biźniesoŭca, było b na toje žadańnie» — kaža adzin z pradstaŭnikoŭ «Sakuba».

Vyhladaje, što ŭ spravu ŭciahnutyja sa svaimi intaresami niekatoryja pravaachoŭnyja orhany. Usia hetaja historyja paćviardžaje nieabchodnaść vypracoŭki jasnych miechanizmaŭ, jakija adździalajuć pravaachoŭnikaŭ ad biznesu.

Siamion Piečanko

***

Jurystka kampanii «Chornbachier i Bołl»: «Kryzis kudy strašniejšy dla našaha biźniesu, čym hetyja skandały»

Natalla Dudko, jurystka kampanii «Chornbachier i Bołl», jakaja pradstaŭlała ŭ sudach intaresy Hansa Chornbachiera, pahadziłasia prakamientavać kanflikt.

«Naša Niva»: Pradstaŭniki «Sakub» kažuć pra niečakanaść aryštu Siarhieja Bukasa…

Natalla Dudko: Heta hučyć zusim niedarečna, bo pačynajučy ź minułaha hodu, kali była raspačataja kryminalnaja sprava, śledstva niekalki razoŭ chadajničała pra źmianieńnie miery strymańnia dla Bukasa, ale prakuratura doŭhi čas adchilała hetaje chadajnictva.

«NN»: Z čaho pačaŭsia kanflikt pamiž partniorami pa biźniesu? Minski bok ćvierdzić, što Chornbachier nie zdoleŭ pryciahnuć nieabchodnyja inviestycyi.

ND: Akurat Hans Chornbachier i pryciahnuŭ nieabchodnyja dla startu srodki, «Sakub» hrošy nie davaŭ. Potym jon rehularna rabiŭ zapyty z Hiermanii pra raźvićcio biźniesu i ŭvieś hety čas tolki i čuŭ, što biźnies nieprybytkovy, rentabielnaść nulavaja. U vyniku Chornbachier vyrašyŭ vyjści z doli, pradaŭšy jaje «Sakubu». Ale tam nie pahadzilisia z prapanavanaj im canoj jaho doli. I Hans pačaŭ vyśviatlać, što heta za ludzi. Byli vyjaŭlenyja fakty padrobki dakumientaŭ. U vyniku była inicyjavanaja kryminalnaja sprava.

«NN»: Dzie ciapier Hans Chornbachier, što adbyvajecca ciapier z kampanijaj paśla viasnovych sudoŭ?

ND: Chornbachier znachodzicca ŭ Hiermanii. Paśla adnaŭleńnia praz sud jahonaha statusu kiraŭnika pradpryjemstva jon zastajecca na hetaj pasadzie. Kasacyjnaja kalehija Vyšejšaha haspadarčaha sudu admianiła rašeńnie HS pra likvidacyju kampanii i nakiravała spravu na novy razhlad u sud pieršaj instancyi. Tamu kampanija pracuje, bolšaść jaje supracoŭnikaŭ zastajucca na svaich pasadach.

«NN»: Davodziłasia čuć pra niezajzdrosny los klijentaŭ kampanii…

ND: Razumiejecie, finansavy kryzis nadzvyčaj baluča ŭdaryŭ pa budaŭničaj śfiery. I jaho nastupstvy kudy strašniejšyja dla našaha biźniesu, čym hetyja skandały. I na moj pohlad, jak prostaj hramadzianki, a nie jurydyčnaha pradstaŭnika kaho b tam ni było, biezumoŭna, sprečki Bukasa, jahonych kalehaŭ pa «Sakubie», ci navat taho ž Chornbachiera, situacyju ŭ kampanii nie palapšajuć.

Hutaryŭ SP

• 0
• 0
• 0
• 0
• 0
• 0
• 0
• 0