Minčanka paskardziłasia na zanadta vialiki vybarčy ŭčastak. Čynoŭniki tolki raźviali rukami
Čytačka «Našaj Nivy» Luboŭ źviarnułasia ŭ Minharvykankam z zajavaj ab parušeńniach padčas farmiravańnia ŭčastkaŭ dla hałasavańnia na refierendumie. Zhodna z artykuła 17 Vybarčaha kodeksa, učastki nie pavinny być bolšyja za 3000 vybarščykaŭ. «U moj učastak uvachodzić kompleks «Majak Minska», u adnym im pabudavana 5220 kvater», — aburajecca žančyna. Čynoŭniki, da jakich jana źviarnułasia, tolki razvodziać rukami.
«Čynoŭniki Pieršamajskaha rajona Minska padpisali rašeńnie, jakim stvaryli ŭčastak dla hałasavańnia № 39, u jaki ŭklučyli žycharoŭ kvartałaŭ «Mahistr» i «Majak Minska», heta 41 dom, — raskazvaje žančyna. — Na adnym tolki «Majaku» pabudavana kala 5220 kvater, u jakich žychary ŭžo pražyvajuć i bolšaść ź ich tam zarehistravana i majuć prava hołasu. A na ŭčastak dadali jašče i 7 damoŭ «Mahistra». Ja liču, što stvareńnie takoha učastka — heta nieprafiesijanalizm supracoŭnikaŭ Pieršamajskaha rajona Minska».
Luboŭ napisała zvarot u Minharvykankam, a taksama patelefanavała ŭ administracyju Pieršamajskaha rajona i ŭ Centralnuju vybarčuju kamisiju, kab paviedamić pra parušeńnie.
«Paŭnamoctvaŭ abmiarkoŭvać heta ŭ mianie niama. Nie mahu dać kamientar vam pa hetym pytańni. Ja tak razumieju, što hetaje rašeńnie Aadministracyi. Ja nie maju prava jaho admianić ci abmiarkoŭvać. Razmova ni pra što», — adkazaŭ joj kiraŭnik spraŭ administracyi Pieršamajskaha rajona Alaksiej Vankievič.
A voś što adkazali minčancy na haračaj linii Centrvybarkama:
«A na padstavie čaho vy vyrašyli, što kolkaść žycharoŭ nie adpaviadajuć zakanadaŭstvu? Ja dumaju, što ŭdakładnić kolkaść udzielnikaŭ refierendumu na kožnym učastku možna ŭ Administracyi Pieršamajskaha rajona. Mnie zdajecca, što vy krychu błytajecie. U nas hramadzianie hałasujuć pa miescy rehistracyi. Kali čałaviek tam pražyvaje, heta nie značyć, što jon tam zarehistravany. Zrabić vysnovy ni vy, ni ja ab kolkaści zarehistravanych udzielnikaŭ na refierendum nie možam. Pa hetym pytańni vy možacie źviarnucca ŭ Administracyju Pieršamajskaha rajona. Vy nie možacie śćviardžać ab kolkaści. Kali ŭčastak sfarmiravany, — značyć kolkaść była pravierana. Davajcie ja jašče ŭdakładniu infarmacyju dla vas. Taksama vy možacie napisać elektronny zvarot».
Pa aficyjnych dadzienych CVK, usiaho pa krainie sfarmiravana 5510 učastkaŭ. U horadzie Minsku — 692, u Minskaj vobłaści — 929, Mahiloŭskaj — 707, Hrodzienskaj — 608, Homielskaj — 977, Viciebskaj — 714, Bresckaj — 883.
Miž tym, śpisy členaŭ učastkovych kamisij dahetul nie vyviesili, choć abiacali heta zrabić da 11 lutaha.
Čytajcie taksama:
«Patrebnaja charaktarystyka». Čytačka vyśvietliła, jak stać družyńnikam ci vystupić na kancercie da refierendumu
Ułady vyrašyli nie publikavać śpis tych, chto budzie ličyć hałasy na refierendumie?
«Nabližanyja adčuvajuć luboŭ nie da kankretnaj asoby, a da pasady». Prafiesar psichałohii Uładzimir Jančuk ab ciapierašnim stanie ŭłady i hramadstva
Siłaviki pachvalilisia, što ŭzłamali telehram-akaŭnt Kabančuka, i apublikavali dokazy5
Kamientary