21 lipienia Homielskaja abłasnaja prakuratura vyniesła aficyjnaje papiaredžańnie moładzievaj aktyvistcy Julii Siviec pra niedapuščalnaść dziejnaści ad imia niezarehistravanaj hramadzkaj arhanizacyi. Prakuror abvinavaciła 23-hadovuju dziaŭčynu ŭ tym, što ciaham apošniaha hodu aktyvistka arhanizoŭvała šerah mierapryjemstvaŭ ad imia Moładzievaha centra «Hart», jaki byŭ likvidavany ŭładami jašče ŭ 2003 hodzie.
21 lipienia Homielskaja abłasnaja prakuratura vyniesła aficyjnaje papiaredžańnie moładzievaj aktyvistcy Julii Siviec pra niedapuščalnaść dziejnaści ad imia niezarehistravanaj hramadzkaj arhanizacyi. Prakuror abvinavaciła 23-hadovuju dziaŭčynu ŭ tym, što ciaham apošniaha hodu aktyvistka arhanizoŭvała šerah mierapryjemstvaŭ ad imia Moładzievaha centra «Hart», jaki byŭ likvidavany ŭładami jašče ŭ 2003 hodzie.
Nahadaju, što Jula Siviec atrymała pozvu ŭ prakuraturu jašče naprykancy krasavika, ale dobraachvotna nie išła tudy, zaścierahajučysia źniavoleńnia. Sprava ŭ tym, što z pačatku hoda bolš za 10 byłych siabraŭ «Harta» byli vyklikany ŭ kdb, dzie im padčas tak zvanych «prafilaktyčnych hutarak» pahražali kryminalnaj spravaj za dziejnaść ad imia niezarehistravanaj arhanizacyi. Tamu 21 lipienia ŭ prakuraturu Julu Siviec pad prymusam dastaviŭ učastkovy milicyjant.
Niaŭradavaja arhanizacyja «Moładzievy centar «Hart» ciaham apošnich dziesiaci hod adyhryvaŭ zaŭvažnuju rolu ŭ hramadzka-palityčnym žyćci Homielščyny. Zarehistravany ŭ 1997 hodzie, «Hart» realizavaŭ šerah značnych prajektaŭ dla moładzi, siarod jakich – škoła maładych lideraŭ, aśvietnickija sustrečy ź viadomymi dziejačami palityki, ekanomiki i kultury, škoła maładoha žurnalista. U 2001 hodzie arhanizacyja ździejśniła maštabny prajekt pa mabilizacyi moładzi dla ŭdziełu ŭ tahačasnych prezydenckich vybarach. Peŭny čas papularnaść demakratyčnaha «Hartu» siarod maładych hamielčukaŭ była navat bolšaj za moładzievuju pradziaržaŭnuju arhanizacyju brsm.
Ułada chutka prybrała niepažadanaha kankurenta ŭ baraćbie za idealahičnaje vychavańnie moładzi. Paśla niekalkich napadaŭ na ofis «Hartu» i šerahu sudovych pracesaŭ, apalnaja arhanizacyja była likvidavanaja. Pra pryčyny likvidacyi «Moładzievaha centra «Hart» havoryć jahony zasnavalnik i pieršy staršynia Aleś Karnijenka.
«Hart byŭ samaj ŭpłyvovaj moładzievaj arhanizacyjaj u Homielskim rehijonie naprykancy 90-ch – pačatku hetaha stahodździa. Tamu, naturalna, ułada vyrašyła pazbavicca centra demakratyčnaj aktyŭnaści, jaki dziejničaŭ u jaje pad bokam na lehalnych umovach».
Asobnyja siabry Homielskaha Moładzievaha centra «Hart» praciahvajuć dziejnaść pa dasiahnieńni statutnych metaŭ i zadačaŭ arhanizacyi, ale ŭžo nie vykarystoŭvajuć jejnaha brendu. Tym nia mienš miascovyja specsłužby, vidać, vyrašyli źniščyć apošnija pareštki demakratyčnaj aktyŭnaści siarod moładzi i pačali metanakiravany palityčny pieraśled. Dla hetaha ŭ zakanadaŭstvie znajšlisia i adpaviednyja punkty, jakija byli ŭviedzieny ŭ Kryminalny kodeks Respubliki Biełaruś tolki sioleta. Heta artykuł 193, a mienavita - arhanizacyja ci kiraŭnictva abjadnańniem, jakoje zamachvajecca na asobu i pravy hramadzianaŭ. Hetym kryminalnym artykułam 21 lipienia i pahražała Julii Siviec prakuror, kali dziaŭčyna budzie praciahvać svaju hramadzkuju dziejnaść. Jula Siviec ličyć, što brutalnyja dziejańni ŭładaŭ majuć za metu neŭtralizavać aktyŭnuju moładź – prymusić jaje źjechać ź Biełarusi ci lehčy na dno.
Darečy, mienavita na Homielščynie specsłužby ŭpieršyniu aprabavali na praktycy dziejańnie kryminalnaha artykuła za dziejnaść ad imia niezarehistravanaj arhanizacyi. Naprykancy červienia Radyjo Racyja aśviatlała sudovy praces nad žłobinskim aktyvistam Eduardam Zielankovym. 22-hadovaha navučenca metalurhičnaha technikumu abvinavacili ŭ dziejnaści ad imia «Maładoha frontu» – arhanizacyi, jakaja ŭvohule nikoli nie mieła aficyjnaj rehistracyi, ale aktyŭna dziejničała pa ŭsioj Biełarusi. Padstavaj dla pieraśledu Eduarda Zielankova stali hrafici «Za svabodu!», «Za Milinkieviča!», što źjavilisia ŭ Žłobinie napiaredadni prezydenckich vybaraŭ i byli padpisanyja «Maładym Frontam». Na sudzie prakuratura patrabavała dla maładoha aktyvista hod pazbaŭleńnia voli, ale sud vynies inšaje rašeńnie - štraf pamieram 30 bazavych vieličyniaŭ, ci pryblizna 350 jeŭra.
Ad našaha Radyjo Eduard Zielankoŭ daviedaŭsia pra toje, što homielskija specsłužby praciahvajuć pieraśled maładzionaŭ pavodle sumnaviadomaha 193-ha artykuła. Na dumku aktyvista sa Žłobinu, jahony sudovy praces raźviazaŭ ruki ŭładam i pakazaŭ efektyŭnaść cisku na moładź mienavita z dapamohaj žorstkich pakarańniaŭ, jakija praduhledžvajucca za parušeńnie kryminalnaha kodeksu.
«Hart» z spasyłkaj na «Radyjo Racyja»
Taćciana Zareckaja bolš nie estonskaja startapierka. Ciapier jana sprabuje stać pasiarednicaj inviestaraŭ u Saudaŭskaj Aravii26
Kamientary